ക്വാറന്റീന്‍ ഉള്‍പ്പെടെ നിബന്ധനകളില്‍ ഇളവ് അനുവദിക്കണമെന്ന് സംസ്ഥാന സര്‍ക്കാരിനുമേല്‍ സമ്മര്‍ദം. കേന്ദ്രസര്‍ക്കാരിന്റെ അണ്‍ലോക്4 മാര്‍ഗരേഖയുടെ അടിസ്ഥാനത്തില്‍ 21 മുതല്‍ ഇളവ് അനുവദിക്കണമെന്നാണ് ആവശ്യം. എന്നാല്‍, ദിനംപ്രതി കോവിഡ് ബാധിതരുടെ എണ്ണം വര്‍ധിക്കുന്ന സാഹചര്യത്തില്‍ ഇളവുകള്‍ അനുവദിക്കരുതെന്ന കടുത്ത നിലപാടിലാണ് ആരോഗ്യവകുപ്പ്.

വിദഗ്ധസമിതിയുടെ അഭിപ്രായം തേടിയിട്ടുണ്ട്. മുഖ്യമന്ത്രി പിണറായി വിജയന്റെ നേതൃത്വത്തില്‍ നടക്കുന്ന അവലോകനയോഗത്തില്‍ ചര്‍ച്ച ചെയ്ത ശേഷമാകും അന്തിമ തീരുമാനം.

പൊതുചടങ്ങുകള്‍ 21-ാം തീയതി മുതല്‍ നടത്താന്‍ കേന്ദ്രസര്‍ക്കാര്‍ അനുമതി നല്‍കിയിരുന്നു. അതേ തുടര്‍ന്ന് കര്‍ണാടകയടക്കം സംസ്ഥാനങ്ങള്‍ ഇതരസംസ്ഥാനങ്ങളില്‍നിന്നു വരുന്നവര്‍ക്ക് ക്വാറന്റീന്‍ ഉള്‍പ്പെടെയുള്ള നിബന്ധനകള്‍ നീക്കി. എന്നാല്‍, 14 ദിവസത്തെ ക്വാറന്റീനും ഓണ്‍ലൈന്‍ റജിസ്‌ട്രേഷനും കര്‍ശനമായി തുടരാനായിരുന്നു കേരളത്തിന്റെ തീരുമാനം.

എന്നാല്‍, ഇതരസംസ്ഥാനങ്ങളില്‍ നിന്ന് കേരളത്തിലെത്തുന്നവര്‍ക്ക് 14 ദിവസത്തെ ക്വാറന്റീന്‍ ബുദ്ധിമുട്ടു സൃഷ്ടിക്കുന്നു എന്ന പരാതി സര്‍ക്കാരിനു ലഭിക്കുന്നുണ്ട്. ക്വാറന്റീന്‍ പൂര്‍ണമായി ഒഴിവാക്കുന്നില്ലെങ്കില്‍ 7 ദിവസമാക്കണമെന്ന നിര്‍ദേശവുമുണ്ട്.