എല്ലാം മായം മറിമായം... എന്‍ഐഎയ്ക്ക് മുമ്പില്‍ രഹസ്യമായി എത്തിയ മന്ത്രി കെടി ജലീലിനെ പൊക്കിയത് മനോരമ ന്യൂസ്; തിരിച്ച് എറണാകുളം ഗസ്റ്റ് ഹൗസിലേക്ക് പോയ കാര്‍ ഗസ്റ്റ് ഹൗസില്‍ എത്തിയപ്പോള്‍ ജലീലില്ല; ചാനലുകള്‍ ലൈവായി ദാ ജലീല്‍ വന്നിറങ്ങുന്നു എന്ന് പറഞ്ഞ് നാണം കെട്ടു; കൊച്ചിയില്‍ മുങ്ങിയ ജലീല്‍ പിന്നെ പൊങ്ങിയത് തിരുവനന്തപുരത്ത്
കേരളം ഇതുവരെ കാണാത്ത സിനിമയേക്കാളും വെല്ലുന്ന ട്വിസ്റ്റാണ് മന്ത്രി കെ.ടി. ജലീല്‍ സമ്മാനിച്ചത്. ഇന്നലെ കൊച്ചുവെളുപ്പാന്‍ കാലത്ത് എന്‍ഐഎ ആസ്ഥാനത്ത് ചോദ്യം ചെയ്യാനെത്തിയ മന്ത്രി കെടി ജലീലിനെ മനോരമ ന്യൂസിലെ അനില്‍ ഇമ്മാനുവല്‍ കണ്ടില്ലായിരുന്നെങ്കില്‍ ഇഡിയുടെ ചോദ്യം ചെയ്യല്‍ പോലെ ആരും അറിയില്ലായിരുന്നു. അവസാനം ചോദ്യം ചെയ്യല്‍ കഴിഞ്ഞ് ഗസ്റ്റ് ഹൗസിലേക്ക് പോയ മന്ത്രി ജലീല്‍ അവിടേയും ചാനലുകാരെ പറ്റിച്ചു.
ഇന്നലെ അതിരാവിലേയാണ് നാടകത്തിന് തുടക്കമായത്. പുലര്‍ച്ചെ മൂന്നുമണിയോടെ ഇടതടവില്ലാതെ മൊബൈല്‍ഫോണ്‍ ബെല്ലടിക്കുന്നത് കേട്ടാണ് ആലുവ മുന്‍ എം.എല്‍.എയും സി.പി.എം നേതാവുമായ എ.എം. യൂസഫ് ഞെട്ടിയുണര്‍ന്നത്. ഉറക്കച്ചടവോടെ യൂസഫ് ഫോണെടുത്തപ്പോള്‍ മറുതലയ്ക്കല്‍ മന്ത്രി കെ.ടി.ജലീല്‍. ആദ്യ ചോദ്യം, 'വീട്ടിലുണ്ടോ'. ഉണ്ടല്ലോ. കാറുണ്ടോ ഉണ്ട് െ്രെഡവറും വീട്ടിലുണ്ടാകുമോ ഇല്ല വിളിച്ചാല്‍ വരുമോ 20 മിനിട്ടിനകം എത്തിക്കാം എന്നാ വിളിച്ചോ. അരമണിക്കൂറിനകം ജലീലിന്റെ കാള്‍ വീണ്ടുമെത്തി ജലീല്‍: അരമണിക്കൂറിനകം കമളമശേരി റെസ്റ്റ്ഹൗസിന് സമീപം എത്തും, അവിടെ കാത്തുകിടക്കണം. കളമശേരിയിലാണ് യൂസഫിന്റെ വീട്. യൂസഫ് കാറിന്റെ നമ്പരും ഡ്രൈവറുടെ മൊബൈല്‍ നമ്പരും പറഞ്ഞു കൊടുത്തു. സമയം 5.30. ജലീലിന്റെ വാഹനം റെസ്റ്റ് ഹൗസിന് മുന്നിലെത്തി. മന്ത്രിയും ഗണ്‍മാനും യൂസഫിന്റെ കാറിലേക്ക്. കൃത്യം ആറിന് മന്ത്രിയുമായി കാര്‍ എറണാകുളം ഗിരിനഗറിലുള്ള എന്‍.ഐ.എയുടെ ഓഫീനു മുന്നില്‍. മന്ത്രിയുടെ വരവറിഞ്ഞ് ഗേറ്റ് തുറന്നിട്ടിരുന്നു. അര്‍ദ്ധരാത്രി മന്ത്രി ജലീല്‍ തിരുവനന്തപുരത്തു നിന്ന് പുറപ്പെട്ടതായാണ് വിവരം. ആലപ്പുഴയില്‍ എത്തിയപ്പോഴാണ് യൂസഫിനെ വിളിച്ചത്.
എന്‍ഫോഴ്‌സ്‌മെന്റ് ഓഫീസില്‍ ആരുമറിയാതെ എത്തിയ മന്ത്രി ഓപ്പറേഷന്‍ വീണ്ടും നടപ്പാക്കാനാണ് ശ്രമിച്ചത്. എന്നാല്‍ സംഭവം കൈവിട്ടു പോകുകയായിരുന്നു. ജലീന്‍ എന്‍.ഐ.എ ഓഫീസില്‍ വന്നിറങ്ങുന്നത് യാദൃച്ഛികമായി കണ്ട മാദ്ധ്യമ പ്രവര്‍ത്തകന്‍ മൊബൈല്‍ ഫോണില്‍ രംഗം പകര്‍ത്തി. തുടര്‍ന്ന് മിനിസ്റ്റര്‍ എന്നു വിളിച്ചതോടെ ജലീല്‍ ഓഫീസിലേക്ക് ഓടിക്കയറി. ഓട്ടത്തിനിടയില്‍, അവിടെ നിന്ന സുരക്ഷാ ഉദ്യോഗസ്ഥന്‍ മന്ത്രിയുടെ കൈകളില്‍ സാനിറ്റൈസര്‍ അടിച്ചു കൊടുത്തു. പുലര്‍കാല നാടകം അങ്ങനെ ദയനീയമായി പൊളിയുകയായിരുന്നു.
നയതന്ത്ര ചാനലിലൂടെയുള്ള സ്വര്‍ണക്കടത്തു കേസില്‍ എന്‍ഫോഴ്‌സ്‌മെന്റ് ഡയറക്ടറേറ്റിനു പിന്നാലെ ദേശീയ അന്വേഷണ ഏജന്‍സിയും ചോദ്യം ചെയ്തതോടെ മന്ത്രി കെ.ടി. ജലീലിന്റെ നില കൂടുതല്‍ പരുങ്ങലിലായി. എന്‍.ഐ.എയുടെ ചോദ്യം ചെയ്യല്‍ ഇന്നലെ എട്ടു മണിക്കൂര്‍ നീണ്ടു. ദേശവിരുദ്ധ പ്രവര്‍ത്തനങ്ങള്‍ അന്വേഷിക്കുന്ന എന്‍.ഐ.എ ചോദ്യം ചെയ്യുന്ന സംസ്ഥാനത്തെ ആദ്യ മന്ത്രിയാണ് ജലീല്‍. അതേസമയം തന്നെ സാക്ഷിയായാണ് വിളിച്ചതെന്ന എന്‍ഐഎയുടെ നോട്ടീസ് ജലീല്‍ പുറത്ത് വിടുകയും ചെയ്തു.
വൈകിട്ട് ചോദ്യം ചെയ്യല്‍ കഴിഞ്ഞ് ജലീല്‍ പോയപ്പോഴും നാടകം തുടര്‍ന്നു. ചോദ്യം ചെയ്യലിനുശേഷം വൈ കിട്ട് 5ന് ജലീല്‍ പുറത്തിറങ്ങി രാവിലെ എത്തിയ കെ.എല്‍.07 സി.ഡി 6444 എന്ന യൂസഫിന്റെ കാറില്‍ കയറി. നിറചിരിയുമായി മാദ്ധ്യമങ്ങള്‍ക്ക് സലാം. എന്‍.ഐ.എ ഓഫീസിന് പുറത്തേക്ക്. രണ്ടു പൈലറ്റ് വാഹനങ്ങളുടെ അകമ്പടി. ഏതു ദിശയിലേക്കും പോകാം. വലതുവശത്ത് കൂടുതല്‍ പൊലീസ്. കാമറകള്‍ അങ്ങോട്ട് ഫോക്കസ് ചെയ്തതോടെ കാര്‍ ഇടതുവശത്തേക്ക് പാഞ്ഞു. എറണാകുളം ഗസ്റ്റ് ഹൗസിലെത്തി ഔദ്യോഗിക വാഹനത്തില്‍ തിരുവനന്തപുരത്തേക്ക് മടക്കമെന്നായിരുന്നു വിവരം. കാര്‍ നിമിഷങ്ങള്‍ക്കുള്ളില്‍ ഗസ്റ്റ് ഹൗസിലെത്തിയെങ്കിലും അതില്‍ മന്ത്രിയുണ്ടായിരുന്നില്ല. മൂന്നര കിലോമീറ്റര്‍ ദൂരത്തിനിടെ മറ്റൊരു വാഹനത്തില്‍ മന്ത്രി സ്ഥലംവിട്ടു. രാത്രി ഒന്‍പതു മണിയോടെ മന്ത്രി ജലീല്‍ സ്വകാര്യ വാഹനത്തില്‍ തിരുവനന്തപുരത്തെ ഔദ്യോഗിക വസതയിലെത്തി. ആതോടെ ദാ ജലീല്‍ വന്നിറങ്ങുന്നു എന്ന് പറഞ്ഞ ചാനലുകള്‍ പ്ലിങ്ങായി.
https://www.facebook.com/Malayalivartha
