തെളിവുകളുമായി ചോദ്യം ചെയ്തപ്പോള്‍ ശിവശങ്കര്‍ ഒഴിഞ്ഞുമാറി.അനധികൃതമായി നേടിയ പണമാണെന്ന് അറിഞ്ഞുതന്നെ സ്വപ്നയെ ശിവശങ്കര്‍ സഹായിച്ചതായി വ്യക്തമെന്ന്് ഇ.ഡി. അനധികൃതമായി നേടിയ പണത്തില്‍ ശിവശങ്കറിന് താല്‍പര്യമുണ്ടായിരുന്നെന്ന് ഇടപാടുകളില്‍ വ്യക്തമാണെന്നും സ്വപ്ന സുരേഷിനെ സഹായിക്കാന്‍ ചാര്‍ട്ടേഡ് അക്കൗണ്ടന്റിനോട് പറഞ്ഞത് തെളിവാണെന്നും ഇ.ഡി റിമാന്‍ഡ് റിപ്പോര്‍ട്ടില്‍ ചൂണ്ടിക്കാട്ടി. കുറ്റകൃത്യത്തില്‍ നിന്ന് നേടിയ പണം ശിവശങ്കറിന്‍േറതാവാന്‍ സാധ്യതയുണ്ടെന്നാണ് ഇ.ഡി വിലയിരുത്തല്‍.

നയതന്ത്ര ചാനല്‍ വഴി എത്തിയ ബാഗേജ് വിട്ടുകിട്ടാന്‍ സ്വപ്ന ആവശ്യപ്പെട്ടതുപ്രകാരം മുതിര്‍ന്ന കസ്റ്റംസ് ഉദ്യോഗസ്ഥനുമായി ബന്ധപ്പെട്ടതായി ഈ മാസം 15ന് ചോദ്യം ചെയ്യലില്‍ ശിവശങ്കര്‍ സമ്മതിച്ചിരുന്നു. സ്വപ്ന നടത്തിയ കുറ്റകൃത്യങ്ങള്‍ ശിവശങ്കറുടെ അറിവോടെയാണെന്ന് ഇത് വ്യക്തമാക്കുന്നു.

കസ്റ്റംസ് പരിശോധിക്കേണ്ട ഏതാനും നയതന്ത്ര ബാഗേജുകള്‍ വിട്ടുകിട്ടാന്‍ 2019 ഏപ്രിലില്‍ ശിവശങ്കര്‍ ഉദ്യോഗസ്ഥരുമായി സംസാരിക്കുകയും മെസേജ് അയക്കുകയും ചെയ്തിട്ടുണ്ട്. എന്നാല്‍, ബുധനാഴ്ചത്തെ ചോദ്യം ചെയ്യലില്‍ ഇക്കാര്യങ്ങള്‍ ശിവശങ്കര്‍ നിഷേധിച്ചു. വാട്‌സ്ആപ് ചാറ്റുകള്‍ കൈവശമുണ്ടെന്നും 2019 ഏപ്രില്‍ മുതല്‍ കസ്റ്റംസ് ക്ലിയറന്‍സിന് ശിവശങ്കര്‍ സഹായിച്ചതായി തെളിഞ്ഞെന്നും ഇ.ഡി വ്യക്തമാക്കി.

2019 ഏപ്രിലില്‍ കസ്റ്റംസ് ക്ലിയറന്‍സിന് ശിവശങ്കര്‍ ഇടപെട്ട് രണ്ടുമാസത്തിന് ശേഷം 2019 ജൂലൈയിലാണ് പ്രതികള്‍ ഡമ്മി ബാഗേജുകള്‍ അയച്ച് പരീക്ഷണം നടത്തിയത്. ഇത് ഒരുപക്ഷേ ഡമ്മി ബാഗേജോ സ്വര്‍ണം അടങ്ങിയ ബാഗേജോ ആയിരിക്കാമെന്നും ഇ.ഡി പറയുന്നു. കള്ളപ്പണം വെളുപ്പിക്കല്‍ തടയല്‍ നിയമത്തിലെ മൂന്നാം വകുപ്പ് പ്രകാരമുള്ള കുറ്റകൃത്യത്തില്‍ പ്രതി ഏര്‍പ്പെട്ടതായി വ്യക്തമാക്കുന്ന തെളിവുകള്‍ ലഭിക്കുകയും നിരവധി പേരുടെ മൊഴി ലഭിക്കുകയും ചെയ്തിട്ടുണ്ട്.