തദ്ദേശ തിരഞ്ഞെടുപ്പിലെ രണ്ടാംഘട്ട വോട്ടെടുപ്പില്‍ മന്ത്രി എ സി മൊയ്തീന്‍ ഏഴുമണിക്കുമുമ്ബ് വോട്ടുചെയ്തെന്ന ആരോപണം അടിസ്ഥാന രഹിതമാണെന്ന് ജില്ലാ കളക്ടറുടെ റിപ്പോര്‍ട്ട്. പ്രിസൈഡിംഗ് ഓഫീസറുടെ വാച്ചില്‍ ഏഴു മണിയായപ്പോഴാണ് വോട്ടിംഗ് തുടങ്ങിയത്. അതിനാല്‍ ചട്ടവിരുദ്ധമായി ഒന്നും സംഭവിച്ചിട്ടില്ലെന്ന റിപ്പോര്‍ട്ടാണ് തിരഞ്ഞെടുപ്പ് കമ്മീഷണര്‍ക്ക് ജില്ലാ കളക്ടര്‍ നല്‍കിയത്. മന്ത്രി 6.55 ന് വോട്ടുചെയ്തെന്നും ഇതിലൂടെതിരഞ്ഞെടുപ്പ് ചട്ടം ലംഘിച്ചെന്ന ആരോപണവുമായി വടക്കാഞ്ചേരി എം എല്‍ എ അനില്‍ അക്കരയാണ് രംഗത്തെത്തിയത്.

തൃശ്ശൂരിലെ തെക്കുംകര പനങ്ങാട്ടുകരയിലെ പോളിംഗ് ബൂത്തിലാണ് മന്ത്രി എ സി മൊയ്തീന്‍ വോട്ട് രേഖപ്പെടുത്താനെത്തിയത്. 6.40നാണ് മന്ത്രി വോട്ട്ചെയ്യാന്‍ ബൂത്തിലെത്തിയത്. എല്ലാ ഒരുക്കങ്ങളും പൂര്‍ത്തിയായപ്പോള്‍ ഉദ്യോഗസ്ഥര്‍ ക്യൂവില്‍ ആദ്യം നിന്ന മന്ത്രിയോട് വോട്ട്ചെയ്യാന്‍ ആവശ്യപ്പെടുകയായിരുന്നു. ഇതനുസരിച്ച്‌ മന്ത്രി വോട്ടുചെയ്തു. ബൂത്തിലുണ്ടായിരുന്ന പോളിംഗ് ഏജന്റുമാരുള്‍പ്പടെ ആരും എതിര്‍ത്തുമില്ല. അനില്‍ അക്കരയുടെ പരാതി ഉയര്‍ന്നതോടെ സംഭവത്തെക്കുറിച്ച്‌ അന്വേഷിച്ച്‌ റിപ്പോര്‍ട്ട് നല്‍കാന്‍ തിരഞ്ഞെടുപ്പ് കമ്മിഷണര്‍ കളക്ടറോട് ആവശ്യപ്പെടുകയായിരുന്നു.