നയതന്ത്ര ചാനല്‍വഴി സ്വര്‍ണം കടത്തിയതുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില് എന്‍ഫോഴ്സ്മെന്റ് ഡയറക്ടറേറ്റ്(ഇ.ഡി.) സമര്‍പ്പിച്ച കുറ്റപത്രം അപൂര്‍ണമായതിനാല്‍ ജാമ്യം നല്‍കണമെന്ന് ശിവശങ്കര്‍ കോടതിയില്‍....
നയതന്ത്ര ചാനല്‍വഴി സ്വര്‍ണം കടത്തിയതുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില് എന്‍ഫോഴ്സ്മെന്റ് ഡയറക്ടറേറ്റ്(ഇ.ഡി.) സമര്‍പ്പിച്ച കുറ്റപത്രം അപൂര്‍ണമായതിനാല്‍ ജാമ്യം നല്‍കണമെന്ന് മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍ കോടതിയില്‍.
ശിവശങ്കര്‍ ഇപ്പോഴും സംസ്ഥാന സര്‍ക്കാരിന് കീഴില്‍ ജോലി ചെയ്യുന്നതിനാല്‍ കുറ്റപത്രം നല്‍കുംമുമ്പ് സംസ്ഥാന സര്‍ക്കാറില്‍ നിന്ന് മുന്‍കൂര്‍ അനുമതി വാങ്ങേണ്ടിയിരുന്നു. ഇത് ചെയ്യാത്ത സാഹചര്യത്തില്‍ കുറ്റപത്രം പൂര്‍ണമല്ലെന്ന് കണക്കാക്കി ജാമ്യം നല്‍കണമെന്നാണ് ശിവശങ്കറുടെ ആവശ്യം. ഈ മാസം 24നാണ്് ശിവശങ്കറിനെതിരെ ഇ.ഡി കുറ്റപത്രം നല്‍കിയത്. ശിവശങ്കറിന്റെ ജാമ്യാപേക്ഷ ഇന്നു കോടതി വീണ്ടും പരിഗണിക്കും.
അതേസമയം മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയെന്ന പദവി സ്വര്‍ണക്കള്ളക്കടത്തിനായി എം.ശിവശങ്കര്‍ ദുരുപയോഗം ചെയ്തുവെന്നും സ്വര്‍ണക്കടത്തിലെമുഖ്യആസൂത്രകരില്‍ ഒരാളാണ് ശിവശങ്കറെന്നും ജാമ്യാപേക്ഷ എതിര്‍ത്തു കൊണ്ടുള്ള സത്യവാങ്മൂലത്തില്‍ കസ്റ്റംസ് വ്യക്തമാക്കി. ദുബായില്‍നിന്നു തിരുവനന്തപുരം വിമാനത്താവളംവഴി നയതന്ത്രബാഗിലൂടെ നടത്തിയ സ്വര്‍ണക്കടത്തില്‍ സ്വപ്ന, സരിത്, സന്ദീപ് എന്നിവര്‍ക്കൊപ്പം എം.ശിവശങ്കര്‍ സജീവമായി പങ്കെടുത്തിരുന്നുവെന്നും കസ്റ്റംസിന്റെ സത്യവാങ്മൂലത്തില്‍ പറയുന്നു. കള്ളക്കടത്തില്‍ കോണ്‍സുലേറ്റ് ഉദ്യോസ്ഥരുടെ പങ്കാളിത്തവും ശിവശങ്കറിന് അറിയാമായിരുന്നു. മുതിര്‍ന്ന ഐഎഎസ് ഉദ്യോഗസ്ഥന്‍ എന്ന നിലയില്‍ കോണ്‍സുലേറ്റ് ഉദ്യോഗസ്ഥരുടെ നടപടിയെക്കുറിച്ച് സര്‍ക്കാരിനെ ശിവശങ്കര്‍ അറിയിക്കേണ്ടതായിരുന്നു.
എന്നാല്‍ അതു ചെയ്യാതെ അവര്‍ക്ക് വേണ്ട എല്ലാ ഒത്താശയും ചെയ്യുകയായിരുന്നുവെന്നും കസ്റ്റംസ് വ്യക്തമാക്കി. ശിവശങ്കര്‍ അന്വേഷണവുമായി സഹകരിക്കുന്നില്ല. തെളിവുകള്‍ സഹിതം ചോദ്യം ചെയ്തിട്ടും പല ചോദ്യങ്ങളില്‍ നിന്നും അദ്ദേഹം ഒഴിഞ്ഞുമാറുകയാണെന്നും കസ്റ്റംസ് കോടതിയെ അറിയിച്ചു. ജാമ്യം അനുവദിച്ചാല്‍ തെളിവുകള്‍ നശിപ്പിക്കാന്‍ സാധ്യതയുണ്ട്. സരിതും സ്വപ്നയും ശിവശങ്കര്‍ക്കെതിരെ ഗുരുതരമായ മൊഴികള്‍ നല്‍കിയിട്ടുണ്ടെന്നും കസ്റ്റംസ് നല്‍കിയ എതിര്‍ സത്യവാങ്ങ്മൂലത്തില്‍ വ്യക്തമാക്കി. ഗുരുതരമായ ആരോഗ്യപ്രശ്നങ്ങളുണ്ടെന്നും കാന്‍സര്‍ രോഗബാധ സംശയിക്കുന്നുവെന്നും ചൂണ്ടിക്കാട്ടിയാണ് കസ്റ്റംസ് രജിസ്റ്റര്‍ ചെയ്ത കേസില് ശിവശങ്കര്‍ ജാമ്യാപേക്ഷ നല്‍കിയത്.
ജയിലില്‍ തുടരുന്നത് ആരോഗ്യപ്രശ്നം ഗുരുതരമാക്കും. പ്രതിയുടെ മൊഴിയല്ലാതെ കള്ളക്കടത്തില്‍ തന്റെ പങ്കു സംബന്ധിച്ച ഒരു തെളിവും ഹാജരാക്കാന്‍ കസ്റ്റംസിന് കഴിഞ്ഞിട്ടില്ലെന്നും ശിവശങ്കര്‍ വാദിക്കുന്നു. ഹര്‍ജി ഇന്ന് പരിഗണിക്കും
https://www.facebook.com/Malayalivartha
