നെയ്യാറ്റിന്‍കര സംഭവവുമായി ബന്ധപ്പെട്ട് എത്രയും വേഗം റിപ്പോര്‍ട്ട് സമര്‍പ്പിക്കാന്‍ റൂറല്‍ എസ്.പി.യോട് പോലീസ് മേധാവി ആവശ്യപ്പെട്ടെങ്കിലും കാര്യമായ നടപടിയുണ്ടായില്ല. മരിച്ചവരുടെ മക്കളുടെ മൊഴിയെടുക്കാന്‍പോലും റൂറല്‍ എസ്.പി.യോ ചുമതലപ്പെടുത്തിയവരോ എത്തിയില്ല.

അതേസമയം, തങ്ങള്‍ ചെയ്തത് ഡ്യൂട്ടിയാണെന്ന വാദമാണ് പോലീസുകാര്‍ക്കിടയില്‍ നിന്ന് ഉയരുന്നത്. പൊള്ളലേറ്റ് ചികിത്സയില്‍ കഴിയുന്ന പോലീസ് ഉദ്യോഗസ്ഥനെക്കുറിച്ച് ആരും ചര്‍ച്ച ചെയ്യുന്നില്ലെന്നും പോലീസ് ചൂണ്ടിക്കാട്ടുന്നു. മരിച്ച രാജന്റെ മൊഴിയുടെ അടിസ്ഥാനത്തില്‍ വിശദമായ അന്വേഷണത്തിനുശേഷമാകും നടപടി.നെയ്യാറ്റിന്‍കര സംഭവത്തില്‍ പോലീസ് മേധാവിക്ക് പുറമേ സംസ്ഥാന മനുഷ്യാവകാശ കമ്മിഷന്‍, ബാലാവകാശ കമ്മിഷന്‍ എന്നിവരും റൂറല്‍ എസ്.പി.യോട് റിപ്പോര്‍ട്ട് ആവശ്യപ്പെട്ടിരുന്നു.

ഇരുഭാഗത്തുനിന്നും പ്രതിഷേധങ്ങള്‍ ഉയരുന്ന സാഹചര്യത്തില്‍ സര്‍ക്കാര്‍ നിര്‍ദേശപ്രകാരം നടപടികള്‍ സ്വീകരിക്കുകയാണ് ഉചിതമെന്ന അഭിപ്രായവും മുതിര്‍ന്ന ഉദ്യോഗസ്ഥര്‍ പങ്കുവെക്കുന്നു. പ്രാഥമിക റിപ്പോര്‍ട്ട് പോലീസ് മേധാവിക്ക് നല്‍കിയശേഷം നിര്‍ദേശങ്ങള്‍ക്കനുസരിച്ച് മാത്രമേ പോലീസുകാര്‍ക്കെതിരേയുള്ള നടപടികളിലേക്ക് നീങ്ങൂവെന്നാണ് സൂചന.

നാലാഴ്ചയ്ക്കകം സംഭവത്തെക്കുറിച്ച് റിപ്പോര്‍ട്ട് നല്‍കാനാണ് മനുഷ്യാവകാശ കമ്മിഷന്‍ നിര്‍ദേശിച്ചിരിക്കുന്നത്. കുട്ടികളോടുള്ള പെരുമാറ്റത്തിന്റെ അടിസ്ഥാനത്തില്‍ റിപ്പോര്‍ട്ട് സമര്‍പ്പിക്കാന്‍ ബാലാവകാശ കമ്മിഷനും റൂറല്‍ എസ്.പി.യോട് ആവശ്യപ്പെട്ടിട്ടുണ്ട്. മരിച്ച രാജനെതിരേ കോടതി ഉദ്യോഗസ്ഥരുടെ ജോലി തടസ്സപ്പെടുത്തിയതിനും ആത്മഹത്യക്കും നെയ്യാറ്റിന്‍കര പോലീസ് കേസെടുത്തു.