ഒരു കേന്ദ്രത്തിൽ 100 പേർ എന്ന ക്രമത്തിൽ ദിവസവും 13,300 പേർക്കു വാക്സീൻ നൽകും. സമയം രാവിലെ 9 മുതൽ 5 വരെ. സർക്കാർ മേഖലയിലെ അലോപ്പതി, ആയുഷ് ആരോഗ്യ കേന്ദ്രങ്ങളും സ്വകാര്യ ആശുപത്രികളുമാണ് കുത്തിവയ്പ്പു കേന്ദ്രങ്ങൾ.

വാക്സീൻ എപ്പോൾ കേരളത്തിലെത്തുമെന്ന് നാളെ പ്രധാനമന്ത്രി നരേന്ദ്ര മോദി നടത്തുന്ന മുഖ്യമന്ത്രിമാരുടെ യോഗത്തിൽ അറിയാനാകുമെന്നു കരുതുന്നു.

കേരളത്തിൽ ഇതുവരെ റജിസ്റ്റർ ചെയ്തത് 3,54,897 ആരോഗ്യപ്രവർത്തകർ– സർക്കാർ ആശുപത്രികളിലെ 1,67,751 പേരും സ്വകാര്യ ആശുപത്രികളിലെ 1,87,146 പേരും. ആശ പ്രവർത്തകർ, ആംബുലൻസ് ജീവനക്കാർ, വയോമിത്രം പദ്ധതി ജീവനക്കാർ, അങ്കണവാടി ജീവനക്കാർ എന്നിവരുടെ റജിസ്ട്രേഷനും പുരോഗമിക്കുന്നു.