മൂക്കില് നിന്ന് രക്തം വന്ന നിലയിലും നാക്ക് കടിച്ച അവസ്ഥയിലും ആയിരുന്നു... ധരിച്ചിരുന്ന ആഭരണങ്ങള് കാണാനില്ല.. മുന്വാതിലിന്റെ അകത്തെ കൊളുത്ത് നീക്കിയ നിലയില്! 78കാരിയെ വീടിനുള്ളില് മരിച്ച നിലയില് കണ്ടെത്തിയ സംഭവത്തില് ദുരൂഹത....
വണ്ടിത്തടം പാലപ്പൂരു റോഡില് ദാറുസലാം വീട്ടില് ചാന്ബീവീയെ(78) വീടിന് ഉള്ളില് മരിച്ച നിലയില് കണ്ടെത്തിയ സംഭവത്തില് ദുരൂഹത. ധരിച്ചിരുന്ന ആഭരണങ്ങള് കാണാനില്ല എന്നതും മുന് വാതിലിന്റെ അകത്തെ കൊളുത്ത് നീക്കിയ നിലയില് കണ്ടെത്തിയതാണ് ദുരൂഹത വര്ധിപ്പിക്കുന്നത്. തിരുവല്ലം പൊലീസ് വിശദമായ അന്വേഷണം തുടങ്ങി. രണ്ടര പവന് മാലയും ഓരോ പവന് വീതമുള്ള രണ്ടു വളകളും ആണ് ധരിച്ചിരുന്നത്.
പിടിവലിയുടേതോ തളളിയിട്ടതിന്റെയോ ലക്ഷണങ്ങളില്ല എന്നാണ് പ്രാഥമിക നിഗമനം. എന്നാല് മൂക്കില് നിന്ന് രക്തം വന്ന നിലയിലും നാക്ക് കടിച്ച അവസ്ഥയിലും ആയിരുന്നു. ദുരൂഹത മാറാന് പോസ്റ്റ്മോര്ട്ടം റിപ്പോര്ട്ട് ലഭിക്കണം എന്നു തിരുവല്ലം ഇന്സ്പെക്ടര് വി.സജികുമാര് പറഞ്ഞു. പരിചാരിക പതിവനുസരിച്ച് വൈകിട്ട് എത്തിയപ്പോഴാണ് ചാന്ബീവിയെ മുറിയില് തറയില് മരിച്ച നിലയില് കണ്ടത്. ജനാല തുറന്നു കിടന്നിരുന്നു. മുന് വശത്തെ വാതില് തുറക്കാവുന്ന സ്ഥിതിയിലും ആയിരുന്നു.
വശത്തെ തുറന്നു കിടക്കുന്ന ജനാലയിലൂടെ വിളിക്കുമ്പോള് ആളെ തിരിച്ചറിഞ്ഞ ശേഷമാണ് ചാന്ബീവി മുന് വാതില് തുറക്കാറ്. സെക്രട്ടേറിയറ്റില് അണ്ടര് സെക്രട്ടറിയായ മകന് അന്വര് ഹുസൈന് ഉള്പ്പെടെയുള്ളവരെ വിവരമറിയിച്ചു. ഫോര്ട്ട് അസി. കമ്മിഷണര് ആര്.പ്രതാപന് നായരുടെ നേതൃത്വത്തില് ആയിരുന്നു ഇന്ക്വസ്റ്റ് നടപടികള്.
വണ്ടിത്തടം-പാലപ്പൂര് റോഡില് യക്ഷിഅമ്മന് ക്ഷേത്രത്തിനു സമീപത്താണ് സംഭവം നടന്ന വീട്. സെക്രട്ടേറിയറ്റ് എംപ്ലോയീസ് സൊസൈറ്റിയുടെ പ്രദേശത്തെ ഹൗസിങ് കോളനിയിലെ വീടുകളില് ഒന്നാണിത്. മകന് രാവിലെ പോകും. രാവിലെയും വൈകിട്ടും വേലക്കാരി വരുന്നത് ഒഴികെ ഉള്ള സമയങ്ങളില് ചാന്ബീവി വീട്ടില് ഏക ആണ്. മരണ ശേഷം ആഭരണം കവര്ന്നത് ആണോ അതിനു മുന്പാണോ എന്ന കാര്യത്തിലാണ് അന്വേഷണം.
https://www.facebook.com/Malayalivartha
