പോലീസ് വാഹനങ്ങള്ക്കെല്ലാം സമ്പൂര്ണ ഇന്ഷുറന്സ് പരിരക്ഷ ഒരുക്കാന് പോലീസ് മേധാവിയുടെ നിര്ദേശം
പോലീസ് വാഹനങ്ങള്ക്കെല്ലാം സമ്പൂര്ണ ഇന്ഷുറന്സ് പരിരക്ഷ ഒരുക്കാന് പോലീസ് മേധാവിയുടെ നിര്ദേശം. അപകടത്തില്പ്പെടുന്ന പൊലീസ് വാഹനങ്ങളിലെ ഉദ്യോഗസ്ഥര്ക്ക് അര്ഹമായ നഷ്ടപരിഹാരം ലഭിക്കാതിരിക്കുന്നതിനെത്തുടര്ന്നാണ് നടപടി.
നിലവില് പൊലീസിന്റെ കൈവശമുള്ള ഭൂരിഭാഗം വാഹനങ്ങള്ക്കും തേര്ഡ്പാര്ട്ടി ഇന്ഷുറന്സ് മാത്രമാണുള്ളത്. ഇതുപ്രകാരം പൊലീസ് വാഹനം ഇടിച്ച് ആര്ക്കെങ്കിലും പരിക്കേറ്റാല് നഷ്ടപരിഹാരം ലഭിക്കും. എന്നാല് വാഹനത്തിലുണ്ടായിരുന്ന ഉദ്യോഗസ്ഥര്ക്ക് അര്ഹമായ നഷ്ടപരിഹാരം നല്കാന് ഇന്ഷുറന്സ് കമ്പനികള് വിസമ്മതിക്കുന്ന സാഹചര്യമാണുള്ളത്. കൂടാതെ അപകടത്തില് സ്വന്തം വാഹനത്തിനുണ്ടായ കേടുപാട് പൊലീസ്തന്നെ നന്നാക്കേണ്ടതായും വന്നിരുന്നു.
അടുത്തിടെ ഒരു പൊലീസ് ജീപ്പ് അപകടത്തില്പ്പെട്ടപ്പോള് പൊലീസുകാര്ക്കും ഗുരുതരമായി പരിക്കേറ്റു. എന്നാല്, പൊലീസുകാര്ക്ക് പൂര്ണ നഷ്ടപരിഹാരം അനുവദിക്കാന് ഇന്ഷുറന്സ് കമ്പനി വിസമ്മതിച്ചു. കീഴ്ക്കോടതി വിധിക്കെതിരേ ഹൈക്കോടതിയെ സമീപിച്ചു. തേര്ഡ്പാര്ട്ടി ഇന്ഷുറന്സാണ് പൊലീസ് വാഹനത്തിനുള്ളതെന്നും യാത്രക്കാരായ പൊലീസുകാര് വാഹന ഉടമയായ പൊലീസ് വകുപ്പിന്റെ ഭാഗമാണെന്നും പുറമേയുള്ളവര്ക്ക് നല്കേണ്ട പരിരക്ഷയ്ക്ക് പൊലീസുകാര് അര്ഹരല്ലെന്നുമായിരുന്നു കമ്പനിയുടെ വാദം. ഇത് അംഗീകരിച്ച ഹൈക്കോടതി നഷ്ടപരിഹാരത്തുക കുറച്ചു.
സര്ക്കാര് വാഹനങ്ങള് പലതും ഇന്ഷുറന്സ് എടുക്കുന്നില്ലെന്നും കോടതി നിരീക്ഷിച്ചു. മിക്ക സര്ക്കാര്വകുപ്പുകളും സംസ്ഥാന സര്ക്കാരിന്റെ ഇന്ഷുറന്സ് പോളിസിയാണ് എടുക്കുന്നത്. ഇതേരീതിയില് പോലീസിനും സമ്പൂര്ണ പോളിസി എടുക്കാനാണ് പോലീസ് മേധാവി നിര്ദേശം നല്കിയിട്ടുള്ളത്.
"
https://www.facebook.com/Malayalivartha
