പി.സി ജോര്‍ജിന്റെ മകന്‍ ഷോണ്‍ ജോര്‍ജും നിയമസഭാ തിരഞ്ഞെടുപ്പില്‍ മത്സരിച്ചേയ്ക്കുമെന്നു സൂചന. ഷോണ്‍ ജോര്‍ജിനു മത്സരിക്കാന്‍ അയോഗ്യതയില്ലെന്ന പി.സി ജോര്‍ജിന്റെ പ്രസ്താവനയോടെയാണ് ചിത്രം ചൂടുപിടിച്ചത്. തന്റെ ജില്ലാ പഞ്ചായത്ത് ഡിവിഷനിലെ മൂന്നിലൊന്നു ഭാഗം പാലാ മണ്ഡലത്തിലുണ്ടെന്നു പറഞ്ഞ ഷോണ്‍ ജോര്‍ജും, മത്സരിക്കാനുള്ള താല്പര്യം വ്യക്തമാക്കി.

പ്രസ്‌ക്ലബിന്റെ മുഖാമുഖം പരിപാടിയിലാണ് പിതാവും മകനും മനസുതുറന്നത്. കഴിഞ്ഞ നിയമസഭാ തിരഞ്ഞെടുപ്പില്‍ പി.സി ജോര്‍ജ് പൂഞ്ഞാറില്‍ ഒറ്റയ്ക്ക് മത്സരിച്ചാണ് വിജയിച്ചത്. ഇക്കുറി പക്ഷേ, പി.സി ജോര്‍ജ് യു.ഡി.എഫ് മുന്നണിയുടെ ഭാഗമായി മത്സരിക്കുന്നതിനുള്ള ശ്രമങ്ങള്‍ ആരംഭിച്ചു കഴിഞ്ഞിട്ടുണ്ട്. ഇതിനിടെയാണ് പ്രസ്‌ക്ലബിന്റെ മുഖാമുഖം പരിപാടിയില്‍ ജോര്‍ജും ഷോണും മത്സരം സംബന്ധിച്ചു മനസ് തുറന്നത്.

മകന്‍ ഷോണ്‍ ജില്ലാ പഞ്ചായത്ത് ഡിവിഷനില്‍ മത്സരിക്കുതിനോടു പോലും തനിക്ക് താല്പര്യമില്ലായിരുന്നതായി പി.സി ജോര്‍ജ് പറയുന്നു. ഷോണിനു പകരം പൂഞ്ഞാറില്‍ മറ്റൊരു സ്ഥാനാര്‍ത്ഥിയെയാണ് കണ്ടിരുന്നത്. എന്നാല്‍, ഇവിടെ മത്സരിക്കാനായി താന്‍ മനസില്‍ കണ്ടിരുന്ന സ്ഥാനാര്‍ത്ഥി തന്നെ നാമനിര്‍ദേശ പത്രിക സമര്‍പ്പിക്കുന്നതിനു തൊട്ടുമുന്‍പ് വീട്ടിലെത്തി ചാക്കോച്ചന്‍ തന്നെ സ്ഥാനാര്‍ത്ഥിയാകണമെന്നു പറഞ്ഞാതായി പി.സി ജോര്‍ജ് പറയുന്നു.

ഇതേ തുടര്‍ന്നാണ് ഷോണിനെ പൂഞ്ഞാറില്‍ മത്സരിപ്പിച്ചതെന്നാണ് പി.സി ജോര്‍ജിന്റെ വാദം. ഷോണിനു നിലവില്‍ എം.എം.എ ആകാനുള്ള എല്ലാ യോഗ്യതയുമുണ്ടെന്നും ജോര്‍ജ് പറയുന്നു. ഏറ്റുമാനൂരിലോ, പാലായിലോ, കാഞ്ഞിരപ്പള്ളിയിലോ മത്സരിക്കാമെന്നും ജോര്‍ജ് ആത്മവിശ്വാസം പ്രകടിപ്പിച്ചു. താനേതായാലും പൂഞ്ഞാര്‍ വിട്ടു പോകാന്‍ ഉദ്ദേശിച്ചിട്ടില്ല. പൂഞ്ഞാറില്‍ തന്നെ മത്സിക്കുമെന്നും അദ്ദേഹം പറഞ്ഞു.

എന്നാല്‍, പാര്‍ട്ടി പറഞ്ഞാല്‍ നിയമസഭയിലേയ്ക്കു മത്സരിക്കുമെന്ന നിലപാട് എടുത്ത ഷോണ്‍ ജോര്‍ജ്, പാലാ തന്നെയാണ് ലക്ഷ്യമെന്നു പറയാതെ പറയുന്നുണ്ടായിരുന്നു. തന്റെ പൂഞ്ഞാര്‍ ജില്ലാ പഞ്ചായത്ത് ഡിവിഷന്റെ മൂന്നിലൊന്നും പാലായിലാണ്. ജില്ലയില്‍ പുതുപ്പള്ളിയും, കോട്ടയവും ഒഴികെ ഏതു സീറ്റിലും മത്സരിക്കാനാവുമെന്നും ഷോണ്‍ വ്യക്തമാക്കി. പാര്‍ട്ടി പറഞ്ഞാല്‍ ഏതു സീറ്റിലും മത്സരിക്കും. ധര്‍മ്മടത്തോ, കണ്ണൂരിലോ മത്സരിക്കാന്‍ പാര്‍ട്ടി ഏതായാലും പറയില്ലെന്നും ഷോണ്‍ പറഞ്ഞു.


മാപ്പ് പറഞ്ഞു പി.സി ജോര്‍ജ്

ഈരാറ്റുപേട്ടയില്‍ മുസ്ലീം സമുദായവുമായുണ്ടായ പ്രശ്‌നങ്ങളില്‍ മാപ്പ് പറഞ്ഞ് പി.സി ജോര്‍ജ്. തനിക്കെതിരെ ആരോപണം ഉയര്‍ന്നപ്പോള്‍ അല്‍പം വൈകാരികമായാണ് പ്രതികരിച്ചത്. ഇത് സമുദായത്തിനു വേദനയുണ്ടാക്കിയെങ്കില്‍ മാപ്പ് പറയുന്നതായും പി.സി ജോര്‍ജ് എം.എല്‍.എ പറഞ്ഞു.