ഡോളര്‍ കടത്തുകേസില്‍ സ്പീക്കര്‍ പി. ശ്രീരാമകൃഷ്ണന്റെ അഡീ. പ്രൈവറ്റ് സെക്രട്ടറി കെ. അയ്യപ്പനെ കസ്റ്റംസ് ചോദ്യം ചെയ്തതോടെ കാര്യങ്ങള്‍ സങ്കീര്‍ണമാകുകയാണ്. സ്വപ്നയും സരിത്തും നല്‍കിയ മൊഴികളെ തള്ളുന്നതാണ് അയ്യപ്പന്റെ മൊഴി. സ്പീക്കര്‍ പലതവണ വിദേശയാത്ര നടത്തിയിട്ടുണ്ടെങ്കിലും താന്‍ പോയിട്ടില്ലെന്നാണ് അയ്യപ്പന്‍ വെളിപ്പെടുത്തുന്നത്. താന്‍ ഒരിക്കല്‍പോലും വിദേശരാജ്യം സന്ദര്‍ശിച്ചിട്ടില്ല. സ്പീക്കര്‍ ഔദ്യോഗിക വിദേശ യാത്രകള്‍ക്കു പുറമേ, സ്വകാര്യയാത്രകളും നടത്തിയിട്ടുണ്ടെന്നും അയ്യപ്പന്‍ വ്യക്തമാക്കി.

സ്പീക്കറുടെ വിദേശയാത്രകളില്‍ അയ്യപ്പനും ഉണ്ടായിരുന്നെന്ന സ്വര്‍ണക്കടത്തുകേസ് പ്രതികളായ സ്വപ്‌നയുടെയും സരിത്തിന്റെയും രഹസ്യമൊഴിയുടെ അടിസ്ഥാനത്തിലാണു അയ്യപ്പനെ ചോദ്യംചെയ്തത്. തങ്ങളെ ഫഌറ്റിലേക്കു വിളിച്ചുവരുത്തിയാണു ഡോളര്‍ അടങ്ങിയ ബാഗ് ഏല്‍പിച്ചതെന്നും ആ സമയം അയ്യപ്പനെയും കെണ്ടന്നുമാണു ഇരുവരുടെയും മൊഴി. എന്നാല്‍, പ്രതികള്‍ പറയുന്ന സമയങ്ങളില്‍ താന്‍ ഓഫീസിലും വീട്ടിലുമായിരുന്നെന്ന് അയ്യപ്പന്‍ പറഞ്ഞു. മൊബൈല്‍ ടവര്‍ ലൊക്കേഷന്‍ വ്യക്തമാക്കുന്ന രേഖകളും കസ്റ്റംസിനു കൈമാറി.

സ്പീക്കറുടെ വിദേശയാത്രകള്‍ തയാറാക്കുന്നതിന്റെ ചുമതല തനിക്കാണെങ്കിലും ഇന്നുവരെ വിദേശത്തു പോയിട്ടില്ല. സ്പീക്കറുടെ ഓഫീസില്‍ സ്വപ്‌നയും സരിത്തും പലതവണ വന്നിട്ടുണ്ട്. അങ്ങനെ ഇവരെ പരിചയമുണ്ട്. മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയായിരുന്ന എം. ശിവശങ്കറെ അറിയാം. 1987 മുതല്‍ വിവിധ സര്‍ക്കാരുകളുടെ കാലത്തു താന്‍ പഴ്‌സണല്‍ സ്റ്റാഫുണ്ടായിട്ടുണ്ട്. വിഎസ്. അച്യുതാനന്ദന്‍ മുഖ്യമന്ത്രിയായിരുന്ന കാലത്തും പഴ്‌സണല്‍ സ്റ്റാഫിലുണ്ടായിരുന്നു. യു.എ.ഇ. കോണ്‍സുലേറ്റ് ജനറലിനേയോ അഡ്മിന്‍ അറ്റാഷെയെയോ തനിക്കു പരിചയമില്ലെന്നും അയ്യപ്പന്‍ മൊഴി നല്‍കി.

കോണ്‍സുല്‍ ജനറലും അറ്റാഷെയും നയതന്ത്ര ചാനലിലൂടെ കടത്തിയ ഡോളര്‍ ഗള്‍ഫില്‍ രണ്ടുപേരാണു കൈപ്പറ്റിയിരുന്നതെന്നും അതിലൊരാള്‍ ഖാലിദ് എന്നയാളാണെന്നും സ്വപ്‌ന മൊഴി നല്‍കിയിരുന്നു. ഇദ്ദേഹം കോണ്‍സുലേറ്റിലെ ജീവനക്കാരനായ ഈജിപ്ഷ്യന്‍ സ്വദേശി ഖാലിദ് അല്ല. വിദേശ സര്‍വകലാശാലയുടെ ശാഖ ഷാര്‍ജയില്‍ ആരംഭിക്കാന്‍ ഈ പണം ചെലവഴിച്ചെന്നാണു കസ്റ്റംസിന്റെ കണ്ടെത്തല്‍. ഈ സ്ഥാപനത്തിന്റെ നടത്തിപ്പുകാരില്‍ രണ്ടുപേരോടു ഈയാഴ്ച ചോദ്യംചെയ്യലിനു ഹാജരാകാന്‍ കസ്റ്റംസ് ആവശ്യപ്പെട്ടിട്ടുണ്ട്. മറ്റു ബിസിനസുകളിലും പണം ചെലവഴിച്ചിട്ടുണ്ട്. പല ഉന്നതരുടെയും പണം ഡോളറാക്കി കടത്തിയിട്ടുണ്ടെന്നാണു കരുതുന്നത്. ഇവരെ ചോദ്യം ചെയ്യുന്നതോടെ ഇക്കാര്യത്തില്‍ കൂടുതല്‍ വ്യക്തത വരുമെന്നാണു കണക്കുകൂട്ടല്‍.

സ്പീക്കര്‍ ഒരു ബാഗ് തങ്ങള്‍ക്കു കെമാറിയെന്നായിരുന്നു സ്വപ്‌നയുടെയും സരിത്തിന്റെയും മൊഴി. അതേസമയം കെ. അയ്യപ്പനെ ഇനി ചോദ്യംചെയ്യാന്‍ സാധ്യതയില്ലെന്നാണു കസ്റ്റംസ് നല്‍കുന്ന സൂചന.

അതേസമയം വിദേശത്തേക്കു ഡോളര്‍ കടത്തിയെന്ന കേസില്‍ നിയമസഭാ സ്പീക്കര്‍ പി. ശ്രീരാമകൃഷ്ണനെ ചോദ്യംചെയ്യാന്‍ നിയമതടസമില്ലെന്നാണ് കസ്റ്റംസിനു ലഭിച്ച നിയമോപദേശം. നിയമസഭാ സമ്മേളനകാലത്ത് ചോദ്യം ചെയ്യല്‍ ഒഴിവാക്കുന്നതാണ് ഉചിതമെന്ന അഭിപ്രായവും കസ്റ്റംസിനു നല്‍കിയിട്ടുണ്ട്. ഈ മാസം നിയമസഭ നടക്കുന്നതിനാല്‍ അതിനിടയ്ക്ക് വിവാദം ഉണ്ടാക്കാന്‍ കസ്റ്റംസിനും താത്പര്യമില്ല. ഇതിനിടയ്ക്ക് ചോദ്യം ചെയ്യാനായി വിളിച്ചാലും സ്പീക്കര്‍ എത്താനും സാധ്യതയില്ല. സമ്മേളനം നടക്കുന്നതിനാല്‍ എത്താന്‍ കഴിയിലെന്ന കാര്യമായിരിക്കും സ്പീക്കര്‍ അറിയിക്കുക. എതായാലും സമ്മേളനം തീരും വരെ കാത്തിരിക്കാനായിരിക്കും ഈ ഘട്ടത്തില്‍ കസ്റ്റംസ് ശ്രമിക്കുക.