കടയ്ക്കാവൂര് പോക്സോ കേസില് അമ്മക്ക് ജാമ്യമില്ല; 21 ദിവസം ജയിലില് കഴിയണം; പരാതി നല്കിയ കുട്ടിയും മുതിര്ന്ന കുട്ടിയും ഉറച്ചു നിന്നും; ബാലക്ഷേമ സമിതി റിപ്പോര്ട്ട് അമ്മക്ക് എതിരായി; കേസ് ഐ ജി ഹര്ഷിത അട്ടല്ലൂര് അന്വേഷിക്കും; എസ്.ഐയെ വിളിച്ചു വരുത്തി
വിവാദമായ കടയ്ക്കാവൂര് പോക്സോ കേസില് അമ്മയുടെ ജാമ്യാപേക്ഷ കോടതി തളളി. തിരുവനന്തപുരം പോക്സോ കോടതിയാണ് ജാമ്യാപേക്ഷ തളളിയത്. അമ്മയില് നിന്ന് ലൈംഗികപീഡനമുണ്ടായെന്ന പരാതിയില് കുട്ടി ഉറച്ചു നില്ക്കുന്നതായി ബാലക്ഷേമസമിതി പോലീസിന് നല്കിയ റിപ്പോര്ട്ട് പുറത്തുവന്നിരുന്നു. അമ്മക്കെതിരെയുളളത് കളള പരാതിയാണോ എന്ന് അന്വേഷിക്കുന്നതിന്റെ ഭാഗമായി ഐ ജി ഹര്ഷിത അട്ടല്ലൂരി കടയ്ക്കാവൂര് എസ് ഐയെ വിളിച്ചുവരുത്തി.
14 വയസുകാരനായ മകനെ ലൈംഗികമായി പീഡിപ്പിച്ച കേസിലാണ് വക്കം സ്വദേശിയായ യുവതിയെ പോലീസ് അറസ്റ്റ് ചെയ്തത്. പോക്സോ കേസില് ഇരയുടെ അമ്മ അറസ്റ്റിലാകുന്ന സംസ്ഥാനത്തെ ആദ്യത്തെ കേസാണിത്. കുട്ടിയുടെ അച്ഛന് ചൈല്ഡ് ലൈനില് പരാതി നല്കിയതോടെയാണ് സംഭവം പുറത്തറിയുന്നത്. എന്നാല് ഇത് കളളക്കേസ് ആണെന്നും കുട്ടിയുടെ പിതാവിന് മറ്റൊരു വിവാഹം കഴിക്കാന് കുട്ടിയെ കരുവാക്കി അമ്മയ്ക്കെതിരെ പരാതി കൊടുക്കുകയായിരുന്നുവെന്നും ആരോപിച്ച് യുവതിയുടെ മാതാപിതാക്കള് രംഗത്തെത്തിയിരുന്നു.
ഇരയായ കുട്ടിയുടെ ഇളയസഹോദരനും അമ്മയ്ക്ക് അനുകൂലമായി മൊഴി നല്കിയിരുന്നു. എന്നാല് ഇരയായ കുട്ടിയും കുട്ടിയുടെ മൂത്ത സഹോദരനും അമ്മയ്ക്കെതിരായ പരാതിയില് ഉറച്ചുനില്ക്കുകയാണ്. സംഭവത്തില് യുവതിയുടെ കുടുംബം ഇന്ന് മുഖ്യമന്ത്രിക്കും ഡി ജി പിക്കും പരാതി നല്കുന്നുണ്ട്.
അതെ സമയം അമ്മയ്ക്കെതിരായ പോക്സോ കേസിലെ എഫ്ഐആറില് പരാതിക്കാരന്റെ സ്ഥാനത്ത് സിഡബ്ലുസിയുടെ പേരു ചേര്ത്ത സംഭവത്തില് ചൈല്ഡ് വെല്ഫെയര് കമ്മിറ്റി ചെയര്പേഴ്സന് എന്.സുനന്ദ ഇന്ന് സര്ക്കാരിനു പരാതി നല്കും. ആഭ്യന്തര സെക്രട്ടറി, ഡിജിപി, കേസിന്റെ ചുമതലയുള്ള ഐജി എന്നിവര്ക്കു പരാതി നല്കും.
ചൈല്ഡ് വെല്ഫെയര് കമ്മിറ്റിക്കു കുട്ടി നല്കിയ മൊഴി, സിഡബ്ല്യുസി നല്കിയ റിപ്പോര്ട്ട് എന്നിവ പ്രകാരമാണ് അമ്മയ്ക്കെതിരെ കേസെടുത്തത് എന്നാണ് കടയ്ക്കാവൂര് പോലീസ് കോടതിയെ അറിയിച്ചത്. കേസിനെക്കുറിച്ച് ആദ്യവിവരം നല്കിയ ആളായി എഫ്ഐആറില് സിഡബ്ല്യുസി ചെയര്പഴ്സന് എന്. സുനന്ദയുടെ പേരാണ് ചേര്ത്തത്.
ചൈല്ഡ് വെല്ഫെയര് കമ്മിറ്റി കുട്ടിയുടെ കൗണ്സിലിങ് നടത്തുകയോ കേസെടുക്കാന് ആവശ്യപ്പെടുകയോ ചെയ്തിട്ടില്ലെന്നു സിഡബ്ലുസി അധികൃതര് പറഞ്ഞു. ജില്ലാ ചൈല്ഡ് വെല്ഫെയര് ഓഫിസിലെ കൗണ്സിലറാണ് കൗണ്സിലിങ് നടത്തി റിപ്പോര്ട്ട് സമര്പ്പിച്ചത്. അത് പൊലീസിനു കൈമാറുക മാത്രമാണ് ചെയ്തത്. കുട്ടി പീഡനത്തിനു ഇരയായെന്ന വിവരം അറിയിച്ചത് ചൈല്ഡ് വെല്ഫെയര് കമ്മിറ്റിയാണെന്ന് എഫ്ഐആറില് രേഖപ്പെടുത്തിയത് തെറ്റാണെന്നും അധികൃതര് വ്യക്തമാക്കി.
https://www.facebook.com/Malayalivartha
