ഒരു തെരഞ്ഞെടുപ്പ് വരുമ്പോള്‍ എപ്പോഴും കേള്‍ക്കുന്ന പഴിയാണ് കിവവന്‍മാര്‍ക്ക് മാത്രമായിരിക്കും സ്ഥാനമെന്ന്. എന്നാല്‍ അതിന് ഈ തെരഞ്ഞെടുപ്പോടെ മാറ്റം വരുമെന്നാണ് സൂചന. എല്ലാത്തിനും കാരണമായത് തലസ്ഥാനത്തെ 21കാരി മേയറായ ആര്യ രാജേന്ദ്രനാണ്. ആര്യയെ തലസ്ഥാന മേയറായി സിപിഎം തെരഞ്ഞെടുത്തപ്പോള്‍ അത് വലിയ ചലനം ഉണ്ടാക്കുമെന്നാരും കരുതിയില്ല. എന്നാല്‍ കടല്‍ കടന്ന പ്രശസ്തിയാണ് ആര്യക്കുണ്ടാക്കിയത്. മാത്രമല്ല യൂത്ത് കോണ്‍ഗ്രസും ആ വഴിയ്ക്ക് ചര്‍ച്ചയാക്കി യുവാക്കള്‍ക്ക് വളരെ പ്രാധാന്യം നല്‍കണമെന്ന് ഭീഷണിപ്പെടുത്തിയിട്ടുമുണ്ട്. തമിഴ്‌നാട്ടിലൊക്കെ ആര്യയാണ് താരം. ബിജെപിയും യുവാക്കള്‍ക്ക് മുന്‍ഗണന നല്‍കുമെന്നാണ് അറിയുന്നത്.

ഇതെല്ലാം മുന്നില്‍ കണ്ട് നിയമസഭ തിരഞ്ഞെടുപ്പില്‍ യുവജനങ്ങള്‍ക്ക് അര്‍ഹമായ പരിഗണന നല്‍കാന്‍ സിപിഎം തീരുമാനം. ആര്യ രാജേന്ദ്രനെ തിരുവനന്തപുരം കോര്‍പ്പറേഷന്‍ മേയര്‍ സ്ഥാനത്തേക്കു പരിഗണിച്ച മാതൃക സംസ്ഥാനമാകെ പിന്തുടരാനാണു നീക്കം. ശക്തമായ മത്സരം നടക്കുന്ന മണ്ഡലങ്ങളില്‍ യുവജനങ്ങളെ ഇറക്കിയാല്‍ ഫലം അനുകൂലമാകുമെന്നു പാര്‍ട്ടി കണക്കുകൂട്ടുന്നു. അതോടെ ഉറച്ച കോട്ടകളിലുള്ള വയസന്‍മാര്‍ വീഴുമെന്നാണ് വിലയിരുത്തല്‍.

ഡിവൈഎഫ്‌ഐ ദേശീയ പ്രസിഡന്റ് മുഹമ്മദ് റിയാസിനെ ഏലത്തൂരില്‍ മത്സരിപ്പിക്കാനാണ് നീക്കം. ഗതാഗതമന്ത്രിയും എന്‍സിപി നേതാവുമായ എ.കെ. ശശീന്ദ്രന്‍ 29,057 വോട്ടിനു വിജയിച്ച മണ്ഡലമാണിത്. ശശീന്ദ്രനു കണ്ണൂര്‍ മണ്ഡലം പകരം നല്‍കാനാണ് ആലോചന. കോണ്‍ഗ്രസ് എസ് നേതാവും മന്ത്രിയുമായ രാമചന്ദ്രന്‍ കടന്നപ്പള്ളിക്ക് ഇത്തവണ സീറ്റ് ലഭിക്കാന്‍ സാധ്യതയില്ല.

ഡിവൈഎഫ്‌ഐ സംസ്ഥാന സെക്രട്ടറി എ.എ. റഹീമിനെ കളമശേരിയില്‍ മത്സരിപ്പിക്കാനാണ് ആലോചന. ലീഗിനെതിരെ ശക്തമായ മത്സരം കാഴ്ചവയ്ക്കാന്‍ കഴിയുന്ന മണ്ഡലവും പരിഗണിക്കുന്നു. കെ. ബാബുവിനെതിരെ എം.സ്വരാജിനെ രംഗത്തിറക്കി തൃപ്പൂണിത്തുറ പിടിച്ച മാതൃകയാണ് നേതൃത്വത്തിന്റെ മനസില്‍.

ബാര്‍ കോഴ വിഷയത്തില്‍ ആരോപണങ്ങള്‍ നേരിട്ട ബാബുവിനെ 4467 വോട്ടിനാണ് സ്വരാജ് പരാജയപ്പെടുത്തിയത്. പാലാരിവട്ടം പാലം അഴിമതിക്കേസില്‍ വിജിലന്‍സ് അന്വേഷണം നേരിടുന്ന മുന്‍മന്ത്രി വി.കെ.ഇബ്രാഹിംകുഞ്ഞിന്റെ മണ്ഡലം പിടിക്കാന്‍ കഴിയുമെന്ന വിശ്വാസത്തിലാണ് പാര്‍ട്ടി. കഴിഞ്ഞ തവണ 12,118 വോട്ടുകള്‍ക്കാണ് സിപിഎമ്മിലെ എ.എം.യൂസഫിനെ ഇബ്രാഹിംകുഞ്ഞ് പരാജയപ്പെടുത്തിയത്. ഇത്തവണ ഇബ്രാഹിംകുഞ്ഞിനെ യുഡിഎഫ് പരിഗണിക്കാനിടയില്ല.

എം. സ്വരാജ് തൃപ്പൂണിത്തുറയില്‍ വീണ്ടും മത്സരിക്കും. പുതുപ്പള്ളിയില്‍ ജെയ്ക് സി. തോമസിനാണ് സാധ്യത. മലമ്പുഴയിലോ തൃത്താലയിലോ എം.ബി. രാജേഷ് മത്സരിച്ചേക്കും. പി. രാജീവിനെ പെരുമ്പാവൂരില്‍ പരിഗണിക്കുന്നു. എ.എന്‍.ഷംസീര്‍ തലശേരിയില്‍ തുടരും. അരൂരില്‍ മനു സി.പുളിക്കലിനെ മത്സരിപ്പിക്കാനാണ് നീക്കം.

ഡിവൈഎഫ്‌ഐ സംസ്ഥാന സെക്രട്ടേറിയറ്റില്‍നിന്ന് മനുവിനെ മാറ്റി. ജില്ലയിലെ പാര്‍ട്ടിയില്‍ കേന്ദ്രീകരിക്കാനാണെന്നാണ് നേതൃത്വത്തിന്റെ വിശദീകരണം. കല്യാശേരിയില്‍ ടി.വി. രാജേഷിനു പകരം ഡിവൈഎഫ്‌ഐ വൈസ് പ്രസിഡന്റ് എം. വിജിന്റെ പേര് പരിഗണനയിലുണ്ട്. കൊല്ലത്ത് കെ.എന്‍.ബാലഗോപാലിനെയും മത്സരരംഗത്തിറക്കിയേക്കും.

ഇങ്ങനെ സിപിഎം രംഗത്തിറക്കുമ്പോള്‍ മറുപക്ഷത്ത് കോണ്‍ഗ്രസിലും യുവാക്കളെ നിര്‍ത്തണമെന്ന് വലിയ മുറവിളി ഉയരുകയാണ്. യുവാവായി രംഗത്തെത്തി തിളങ്ങിയ ചെന്നിത്തലയും വേണുഗോപാലും തലപ്പത്തുള്ളപ്പോള്‍ യുവാക്കളെ തഴഞ്ഞാല്‍ ഫലം പമ്പകടക്കും.