ഇത് ഇവിടെ നില്‍ക്കില്ല... സിബിഐയ്ക്ക് വീണ്ടും പൂട്ടിടാനുറച്ച് സംസ്ഥാന സര്‍ക്കാര്‍; ലൈഫ് മിഷനില്‍ സിബിഐ അന്വേഷണത്തിനെതിരെ സര്‍ക്കാര്‍ സുപ്രീം കോടതിയില്‍ അപ്പീല്‍ ഫയല്‍ ചെയ്തു; നിര്‍ണായക നീക്കവുമായി സര്‍ക്കാരിനെ തടയിടാന്‍ സിബിഐ; ലൈഫ് മിഷന്‍ ഫയലുകള്‍ തേടി സി.ബി.ഐ. രംഗത്തിറങ്ങി
കേരളത്തില്‍ നിന്നും സിബിഐയെ നിയമ നിര്‍മ്മാണത്തോടെ സംസ്ഥാനം കെട്ടുകെട്ടിച്ചിരുന്നു. അതിന് മുമ്പേ വന്ന സിബിഐ സംഘത്തെ ഹൈക്കോടതി സ്റ്റേയോടെ പൂട്ടിയിരുന്നു. എന്നാല്‍ ഡല്‍ഹിയില്‍ നിന്നും പുലികളെ ഇറക്കി വലിയ കളി കളിച്ചതോടെ ആ സ്റ്റേ മാറുകയും വീണ്ടും സിബിഐ കളത്തിലിറങ്ങുകയും ചെയ്തു. അതിന് പിന്നാലെ സര്‍ക്കാര്‍ സുപ്രീം കോടതിയെ സമീപിച്ചിരിക്കുകയാണ്. എന്നാല്‍ സിബിഐ അന്വേഷണം ശക്തമാക്കിയിട്ടുണ്ട്.
ലൈഫ് മിഷന്‍ വടക്കാഞ്ചേരി ഫ്‌ളാറ്റ് ഇടപാടിന്റെ രേഖകള്‍ക്ക് സി.ബി.ഐ ചീഫ് സെക്രട്ടറിയെ സമീപിക്കാനൊരുങ്ങുകയാണ്. കേസില്‍ സി.ബി.ഐ അന്വേഷണം തുടരാമെന്ന ഹൈക്കോടതി വിധിയുടെ പശ്ചാത്തലത്തിലാണിത്. സി.ബി.ഐക്ക് മുമ്പേ ലൈഫ് മിഷന്‍ ആസ്ഥാനത്ത് എത്തിയ വിജിലന്‍സ് യഥാര്‍ത്ഥ രേഖകളെല്ലാം കൈവശപ്പെടുത്തുകയും പ്രാഥമിക അന്വേഷണത്തിനു ശേഷം എഫ്.ഐ.ആര്‍ രജിസ്റ്റര്‍ ചെയ്യുകയും ചെയ്തിരുന്നു. ഈ രേഖകള്‍ കൈമാറാന്‍ വിജിലന്‍സിനോടും ആവശ്യപ്പെടും.
രേഖകള്‍ ഹാജരാക്കാന്‍ ലൈഫ് മിഷന്‍ സി.ഇ.ഒ യു.വി ജോസിന് സി.ബി.ഐ നോട്ടീസ് നല്‍കിയെങ്കിലും പകര്‍പ്പുകളാണ് ജോസ് ഹാജരാക്കിയത്. യഥാര്‍ത്ഥ ഫയലുകള്‍ വിജിലന്‍സില്‍ നിന്ന് വാങ്ങിനല്‍കാന്‍ ലൈഫ് മിഷന്‍ ഉദ്യോഗസ്ഥര്‍ക്ക് സിബിഐ നിര്‍ദ്ദേശം നല്‍കിയെങ്കിലും അവര്‍ നിസഹായത അറിയിച്ചിരുന്നു. സെക്രട്ടേറിയറ്റില്‍ നിന്ന് പിടിച്ചെടുത്ത രേഖകള്‍ വിജിലന്‍സ് കോടതിയില്‍ ഹാജരാക്കിയിട്ടുണ്ട്. തുടരന്വേഷണത്തിനായി കോടതി തന്നെ ഈ രേഖകള്‍ തിരികെ നല്‍കി. അതിനാല്‍ ഇനി കോടതി നിര്‍ദ്ദേശം ഇല്ലാതെ രേഖകള്‍ സിബിഐക്ക് നല്‍കേണ്ടെന്നായിരുന്നു വിജിലന്‍സിന്റെ തീരുമാനം. സിബിഐ അന്വേഷണം തുടരാമെന്ന് ഹൈക്കോടതി ഉത്തരവിട്ട സാഹചര്യത്തില്‍ രേഖകള്‍ സിബിഐക്ക് കൈമാറേണ്ടിവരും.
അതേസമയം ഹൈക്കോടതി വിധിക്കെതിരേ സുപ്രീംകോടതിയില്‍ അപ്പീല്‍ നല്‍കാനാകുമെന്ന് സര്‍ക്കാരിന് നിയമോപദേശം ലഭിച്ചു. ഇതിന്റെയടിസ്ഥാനത്തില്‍ ലൈഫ് മിഷന്‍ പദ്ധതിയില്‍ സിബിഐ അന്വേഷണം അനുവദിച്ച ഹൈക്കോടതി ഉത്തരവിനെതിരെ സംസ്ഥാന സര്‍ക്കാര്‍ സുപ്രീം കോടതിയെ സമീപിച്ചു. വിധി അടിയന്തരമായി സ്റ്റേ ചെയ്യണമെന്നാണ് കേരളസര്‍ക്കാരിന്റെ ആവശ്യം. എഫ്‌സിആര്‍ഐ ചട്ടലംഘനം ഉണ്ടായിട്ടില്ലെന്നാണ് സര്‍ക്കാര്‍ ഹര്‍ജിയില്‍ പറയുന്നത്. സിബിഐ അന്വേഷണത്തിനെതിരെ സംസ്ഥാനസര്‍ക്കാരും നിര്‍മാണ കരാറുകാരായ യുണിടാകും നല്‍കിയ ഹര്‍ജി ഹൈക്കോടതി തള്ളിയതിനെ തുടര്‍ന്നാണ് സുപ്രീം കോടതിയില്‍ ഹര്‍ജി ഫയല്‍ ചെയ്തത്.
ഫോറിന്‍ കോണ്‍ട്രിബൂഷന്‍ റെഗുലേഷന്‍ ആക്ട് പ്രകാരം ആണ് സിബിഐ കേസ് എടുത്തിരിക്കുന്നത്. യൂനിടെക് മാനേജിംഗ് ഡയറക്ടര്‍ സന്തോഷ് ഈപ്പന്‍, സെയ്ന്‍ വെഞ്ച്വേര്‍സ് തുടങ്ങിയവര്‍ക്കെതിരെയാണ് എഫ്‌ഐആര്‍ രജിസ്റ്റര്‍ ചെയ്തിരിക്കുന്നത്. കേസ് രജിസ്റ്റര്‍ ചെയ്തതായി കാണിച്ച് കൊച്ചിയിലെ പ്രത്യേക സിബിഐ കോടതിയില്‍ റിപ്പോര്‍ട്ട് നല്‍കിയിട്ടുണ്ട്. സ്വര്‍ണക്കടത്ത് കേസ് അന്വേഷിക്കുന്ന എന്‍ഫോഴ്‌സ്‌മെന്റ് ഡയറക്ടറേറ്റ് നേരത്തെ ലൈഫ് മിഷന്‍ സിഇഒ യുവി ജോസിനെ ചോദ്യം ചെയ്തിരുന്നു.
ലൈഫ് മിഷന്‍ പദ്ധതി കേരളത്തില്‍ കൈക്കാര്യം ചെയ്യുന്ന യൂനിടെക് എംഡി സ്വര്‍ണക്കടത്ത് കേസ് പ്രതികളായ സ്വപ്നയും സരിത്തും സന്ദീപും ഒരു കോടി രൂപ കമ്മീഷന്‍ ആവശ്യപ്പെട്ടിരുന്നതായി കേന്ദ്രഏജന്‍സികള്‍ക്ക് മൊഴി നല്‍കിയിരുന്നു. വിദേശത്ത് നിന്നും ഫണ്ട് സ്വീകരിക്കുന്നതുമായി ബന്ധപ്പെട്ട ചട്ടലംഘനം ലൈഫ് മിഷനില്‍ ഉണ്ടായി എന്നതിന്റെ അടിസ്ഥാനത്തിലാണ് സിബിഐ കേസ് എടുത്തത്.
എന്തായാലും തെരഞ്ഞെടുപ്പ് അടുത്ത വേളയില്‍ ലൈഫിലെ സിബിഐ അന്വേഷണം എങ്ങോട്ട് പോകുമെന്ന് എല്ലാവര്‍ക്കും ആകാംക്ഷയുണ്ട്. സുപ്രീം കോടതിയില്‍ നിന്നും സ്റ്റേ കിട്ടിയാല്‍ ഈ തെരഞ്ഞെടുപ്പ് വരെ പിടിച്ചു നില്‍ക്കാനാകും. സ്റ്റേ കിട്ടിയില്ലെങ്കില്‍ സിബിഐ കളം നിറയും.
https://www.facebook.com/Malayalivartha
