പണം കൊടുത്ത് ഡോക്ടറാകുന്നവരെ കുരുക്കാന്‍ കേന്ദ്രസര്‍ക്കാര്‍, പ്രാക്ടീസ് ചെയ്യണമെങ്കില്‍ യോഗ്യതാ പരീക്ഷ പാസാകണം
മാതാപിതാക്കളുടെ പണക്കൊഴുപ്പില്‍ ഡോക്ടറാകാന്‍ നടക്കുന്നവരുടെ തിരക്കാണ് ഇപ്പോള്‍ സ്വകാര്യ കോളേജില്‍. ഇത്തരക്കാന്‍ നാളെ കോപ്പിയടിച്ചും മറ്റും ഡോക്ടറായി പുറത്തുവരുബോള്‍ പാവം ജനങ്ങളുടെ സ്ഥിതിയെന്താകും. നേരത്തെ തന്നെ ഇതിനെതിരെ പലതരത്തിലുള്ള ആരോപണങ്ങള്‍ ഉയര്‍ന്നുവന്നിരുന്നതാണ്. അപ്പോഴെല്ലാം പലതരത്തിലുള്ള നടപടികളുമായി അധികൃതര്‍ മുന്നോട്ട് വന്നിട്ടുണ്ട്. ഇപ്പോള്‍ വീണ്ടും ഡോക്ടറായി പ്രാക്ടീസ് നടത്തണമെങ്കില്‍ ബിരുദമെടുത്ത വിദ്യാര്‍ത്ഥികള്‍ യോഗ്യതാ പരീക്ഷ കൂടി ജയിക്കണമെന്ന നിബന്ധന കൊണ്ടുവരാന്‍ ഒരുങ്ങുകയാണ് കേന്ദ്ര സര്‍ക്കാര്‍. കേന്ദ്ര ആരോഗ്യ മന്ത്രാലയം ഇത് സംബന്ധിച്ച് കരട് ശുപാര്‍ശ തയ്യാറാക്കി കഴിഞ്ഞു. ഇന്ത്യന്‍ മെഡിക്കല്‍ കൗണ്‍സില്‍ ആയിരിക്കും പരീക്ഷ നടത്തുക.
ഡോക്ടര്‍മാരുടെ നിലവാരം ഉറപ്പുവരുത്തുന്നതിന്റെ ഭാഗമായിട്ടാണ് യോഗ്യതാ പരീക്ഷസമ്പ്രദായം നടപ്പാക്കുന്നത്. പ്രതിവര്‍ഷം ഒരു ലക്ഷത്തിലേറെ പേര് ഉപരിപഠനത്തിനായുള്ള മെഡിക്കല്‍ പി.ജി. പ്രവേശന പരീക്ഷ എഴുതുന്നുണ്ടെങ്കിലും 25, 000 പേര് മാത്രമാണ് യോഗ്യത നേടുന്നത്. ബാക്കിയുള്ളവര്‍ ഡോക്ടറായി പ്രാക്ടീസ് തുടരും. രാജ്യത്തെ ഡോക്ടര്‍മാരുടെ നിലവാരം പുനഃപരിശോധിക്കേണ്ടതിന്റെ ആവശ്യകതയിലേക്ക് വിരല്‍ ചൂണ്ടുന്ന കാര്യമാണിതെന്നാണ് കൗണ്‍സിലിന്റെയും ആരോഗ്യമന്ത്രാലയത്തിന്റെയും നിലപാട്.
യോഗ്യതാ പരീക്ഷ നിലവില്‍ വരുന്നതോടെ മെഡിക്കല്‍ കോളേജുകളിലെ നിലവാരം കൂടി വിലയിരുത്താനാകുമെന്നും സര്‍ക്കാര്‍ കരുതുന്നുണ്ട്. എല്‍.എല്‍.ബി പാസായവര്‍ക്ക് ബാര്‍ കൗണ്‍സില്‍ യോഗ്യതാ പരീക്ഷ ഏര്‍പ്പെടുത്തിയിട്ടുണ്ട്. ബാര്‍ കൗണ്‍സിലിന്റെ പരീക്ഷയില്‍ ജയിക്കുന്നവര്‍ക്ക് മാത്രമേ അഭിഭാഷകവൃത്തി ചെയ്യാനാകു.
നിലവില്‍ എം.ബി.ബി.എസ് പഠനം പൂര്‍ത്തിയാക്കുന്നവര്‍ ഇന്ത്യന്‍ മെഡിക്കല്‍ കൗണ്‍സിലിന്റെ ബന്ധപ്പെട്ട സംസ്ഥാന ഘടകത്തില്‍ രജിസ്റ്റര്‍ ചെയ്യുകയാണ് രീതി. മറ്റ് സംസ്ഥാനങ്ങളില്‍ പ്രാക്ടീസ് ചെയ്യാന്‍ ആഗ്രഹിക്കുന്നവര്‍ രജിസ്‌ട്രേഷന്‍ അവിടേക്ക് ട്രാന്‍സ്ഫര്‍ ചെയ്യും. പുതിയ പരീക്ഷ വരുന്നതോടെ ഇത്തരം നടപടിക്രമങ്ങള്‍ ഇല്ലാതാകും. രാജ്യത്ത് എവിടെയും പ്രാക്ടീസ് ചെയ്യാന്‍ കൗണ്‍സിലിന്റെ പരീക്ഷയാകും അടിസ്ഥാന യോഗ്യത
എം.ബി.ബി.എസ് ബിരുദ പഠനം പൂര്‍ത്തിയാക്കിയതു കൊണ്ട് മാത്രം ഡോക്ടറാകാനാവില്ല.
യോഗ്യതാ പരീക്ഷ വിജയിക്കാത്തവര്‍ക്ക് പി.ജി പ്രവേശനം നിഷേധിക്കുന്നതിനും മന്ത്രാലയം ആലോചിക്കുന്നുണ്ട്. നിലവില്‍ വിദേശത്ത് മെഡിക്കല്‍ ബിരുദം നേടിയവര്‍ക്ക് ഇന്ത്യയില്‍ പ്രാക്ടീസ് ചെയ്യണമെങ്കില്‍ ഫോറിന്‍ മെഡിക്കല്‍ ഗ്രാജ്വേറ്റ് എക്‌സാമിനേഷന്‍ (എഫ്.എം.ജി.ഇ) പാസാകണം. ഇത് എല്ലാവര്‍ക്കും ബാധമാക്കുന്ന തരത്തില്‍ പൊതു യോഗ്യതാ പരീക്ഷയായി മാറ്റാനാണ് ആരോഗ്യ മന്ത്രാലയത്തിന്റെ കരട് രേഖയില്‍ പറയുന്നത്. 2002ല്‍ കൊണ്ടുവന്ന എഫ്.എം.ജി.ഇക്ക് മെഡിക്കല്‍ കൗണ്‍സിലിന്റെ അംഗീകാരമുണ്ട്.
2014ലെ മെഡിക്കല്‍ പി.ജി പ്രവേശന പരീക്ഷയില്‍ സര്‍ക്കാര്‍ കോളേജുകളില്‍ നിന്ന് 22,802 പേര് പാസായപ്പോള്‍ സ്വകാര്യ കോളേജുകളില്‍ 8862 പേരും വിദേശത്ത് പഠിച്ച 1188 പേരുമാണ് യോഗ്യത നേടിയത്. വിവിധ സംസ്ഥാനങ്ങളിലെ വിജയ ശതമാനത്തിലും ഈ വ്യത്യാസമുണ്ട്. ഈ വര്‍ഷം നടന്ന മെഡിക്കല്‍ പി.ജി പ്രവേശന പരീക്ഷയില്‍ 87.92 ആയിരുന്നു ആന്ധ്രാപ്രദേശിന്റെ വിജയശതമാനം. ചണ്ഡീഗഡ് 73.56 ശതമാനം, പശ്ചിമബംഗാള്‍ 53.58 ശതമാനം, ഉത്തര്‍പ്രദേശ് 51.56 ശതമാനം എന്നിങ്ങനെ നേടി. എന്നാല്‍ അസാമില്‍ 46.38 ശതമാനവും ജമ്മു കാശ്മീര്‍ 37.84 ശതമാനവും മാത്രമായിരുന്നു. ഇതെല്ലാം ഡോക്ടര്‍മാരുടെ നിലവാരത്തിലേക്കാണ് വിരല്‍ ചൂണ്ടുന്നതെന്നാണ് കൗണ്‍സിലിന്റെ വാദം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
