ചതിച്ച പത്താംക്ലാസ് ബുദ്ധി... ആയുര്വേദ ആശുപത്രിയില് നിന്നും പൊക്കിയ ശിവശങ്കര് മാസങ്ങളായി ജയിലിലാണ്; ഒന്നും ചെയ്തിട്ടില്ലെന്നു പറഞ്ഞ ശിവശങ്കറെ ഇഡിയും കസ്റ്റംസും കൂടി വരിഞ്ഞു മുറുക്കിയപ്പോള് പുറം ലോകം കാണാന് പറ്റിയില്ല; ശിവശങ്കറിന്റെ ജാമ്യാപേക്ഷയില് വിധി ഇന്ന്; ജാമ്യം കിട്ടിയാല് പുറത്തിറങ്ങാം
മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം ശിവശങ്കറെ സംബന്ധിച്ച് ഇന്ന് നിര്ണായകമാണ്. എം ശിവശങ്കറിന്റെ ജാമ്യാപേക്ഷയില് വിധി ഇന്നാണ്. സാമ്പത്തിക കുറ്റകൃത്യങ്ങള്ക്കുള്ള അഡീഷണല് സിജെഎം കോടതിയാണ് ഹര്ജി പരിഗണിക്കുന്നത്.
ഇന്ന് ജാമ്യം ലഭിച്ചാല് ശിവശങ്കറിന് ജയില് മോചിതനാകാം. കസ്റ്റംസ് രജിസ്റ്റര് ചെയ്ത സ്വര്ണക്കടത്ത് കേസിലും, എന്ഫോഴ്സ്മെന്റ് ഡയറക്ടറേറ്റിന്റെ കളളപ്പണ കേസിലും നേരത്തെ ശിവശങ്കറിന് ജാമ്യം ലഭിച്ചിരുന്നു.
തിരുവനന്തപുരത്തെ ആയുര്വേദ ആശുപത്രിയില് നിന്നാണ് അന്വേഷണ സംഘം ശിവശങ്കറിനെ കസ്റ്റഡിയിലെടുത്തത്. താനൊരു കുറ്റവും ചെയ്തിട്ടില്ലെന്നു പറഞ്ഞ ശിവശങ്കര് അവസാനം പെട്ടുപോകുകയായിരുന്നു. ജയിലിടിഞ്ഞാലും ഇറങ്ങാന് പറ്റാത്ത കേസുകളാണ് ഉണ്ടായത്. സ്വപ്നയുടെ പത്താംക്ലാസ് ബുദ്ധിയില് വീണതാണ് ശിവശങ്കറിന് കുരുക്കായത്.
ഡോളര് കടത്തിയ കേസില് പങ്കില്ല. തനിക്കെതിരെ യാതൊരു തെളിവും ഹാജരാക്കാന് അന്വേഷണ സംഘത്തിന് കഴിഞ്ഞിട്ടില്ല. കസ്റ്റഡിയില് വെച്ച് പ്രതികള് നല്കിയ മൊഴികള് മാത്രമാണ് തനിക്കെതിരെയുള്ളതെന്നുമാണ് ശിവശങ്കറിന്റെ വാദം.
എന്നാല് ഡോളര് കടത്തില് ശിവശങ്കറിനെതിരെ ശക്തമായ തെളിവുകളുണ്ടെന്നും, ജാമ്യം നല്കരുതെന്നും കസ്റ്റംസ് കോടതിയെ അറിയിച്ചിരുന്നു. ഒന്നരക്കോടി രൂപയുടെ ഡോളര് കടത്തില് ശിവശങ്കറിന് പങ്കുണ്ടെന്നാണ് അന്വേഷണസംഘം ആരോപിക്കുന്നത്.
നയതന്ത്ര സ്വര്ണക്കള്ളക്കടത്ത് കേസില് ആറ് പ്രതികളെ ഇന്നലെ കോടതിയില് ഹാജരാക്കി. എം ശിവശങ്കര് അടക്കമുള്ള പ്രതികളെയാണ് ഹാജരാക്കുക. കസ്റ്റംസ് അന്വഷിക്കുന്ന കേസില് ജുഡീഷ്യല് കസ്റ്റഡിയുടെ കാലാവധി അവസാനിക്കുന്ന സാഹചര്യത്തിലാണ് സാമ്പത്തിക കുറ്റകൃത്യം പരിഗണിക്കുന്ന അഡീഷണല് സിജെഎം കോടതിയില് പ്രതികളെ ഹാജരാക്കിയത്.
പ്രതികള്ക്കെല്ലാം കോടതി ഈ കേസില് ജാമ്യം അനുവദിച്ചിട്ടുണ്ടെങ്കിലും പ്രതികള് ഇത് വരെ ബോണ്ട് വ്യവസ്ഥകള് പാലിച്ച് കൊണ്ട് ജാമ്യം എടുത്തിട്ടില്ല. എല്ലാവര്ക്കുമെതിരെ കോഫപോസ ചുമത്തിയ സാഹചര്യത്തിലാണിത്. ഇത് മൂലം റിമാന്ഡ് കാലാവധി തീരുന്ന മുറക്ക് കോടതിയില് ഹാജരാാക്കണം. വീഡിയോ കോണ്ഫറന്സ് വഴിയാണ് പ്രതികളെ ഹാജരാക്കിയത്.
അതേസമയം ശിവശങ്കര് സമര്പ്പിച്ച ജാമ്യഹര്ജിയില് എറണാകുളത്തെ പ്രത്യേക സാമ്പത്തിക കോടതി ഇന്ന് വിധി പറയുന്നത്. സ്വര്ണക്കടത്ത് കേസ്, കള്ളപ്പണക്കേസ്, ഡോളര് കടത്ത് എന്നിങ്ങനെ മൂന്ന് കേസുകളിലാണ് ശിവശങ്കറിനെ കസ്റ്റംസും ഇഡിയും അറസ്റ്റ് ചെയ്യുന്നത്. ഒക്ടോബര് 28നാണ് ശിവശങ്കറിനെ ഇഡി അറസ്റ്റ് ചെയ്യുന്നത്.
കള്ളപ്പണക്കേസില് ചോദ്യം ചെയ്യല് തുടരുന്നതിനിടെ നവംബറില് സ്വര്ണക്കടത്ത് കേസിലും ജനുവരിയില് ഡോളര് കടത്ത് കേസിലും കസ്റ്റംസ് അദ്ദേഹത്തെ അറസ്റ്റ് ചെയ്തു. സ്വര്ണക്കടത്ത് കേസില് കുറ്റപത്രം സമര്പ്പിക്കാത്തതിനാല് ഇതിനോടകം ശിവശങ്കറിനെ ജാമ്യം ലഭിച്ചിട്ടുണ്ട്. ശിവശങ്കര് കള്ളപ്പണം സമ്പാദിച്ചതായി കണ്ടെത്താന് പ്രോസിക്യൂഷന് കണ്ടെത്താന് സാധിച്ചില്ലെന്ന് ചൂണ്ടിക്കാട്ടി ആ കേസിലും ഹൈക്കോടതി അദ്ദേഹത്തിന് ജാമ്യം നല്കി.
എന്നാല് ഡോളര് കടത്ത് കേസില് ഉള്പ്പെട്ടതിനാല് ശിവശങ്കറിന് ജാമ്യം ലഭിച്ചില്ല. എന്നാല് കഴിഞ്ഞ ദിവസം ശിവശങ്കറിന്റെ പുതിയ ജാമ്യഹര്ജിയില് കസ്റ്റംസ് കാര്യമായ എതിര്പ്പ് ഉന്നയിച്ചില്ല. ഇതോടെയാണ് അദ്ദേഹത്തിന് ഡോളര് കേസിലും ജാമ്യം ലഭിച്ചേക്കുമെന്ന അഭ്യൂഹം ശക്തമായത്. എന്തായാലും ശിവശങ്കറിന് ജാമ്യം ലഭിക്കുമോയെന്ന് കണ്ടറിയാം.
https://www.facebook.com/Malayalivartha
