യുഎഇ കോണ്‍സുലേറ്റിലെ ഉന്നത ഉദ്യോഗസ്ഥര്‍ക്ക് കള്ളക്കടത്തില്‍ നിര്‍ണായക പങ്കുണ്ടെന്ന വിവരത്തിന്റെ അടിസ്ഥാനത്തിലാണ് കേസ് തന്നെ ഉപേക്ഷിക്കുന്നതിനെ കുറിച്ച് കസ്റ്റംസ് ആലോചിച്ച് തുടങ്ങിയത്. കഴിഞ്ഞ ആറേഴ് മാസമായി നടക്കുന്ന അന്വേഷണങ്ങള്‍ക്കാണ് ഇതോടെ പരിസമാപ്തിയുണ്ടാവുന്നത്. നിയമസഭാ തെരഞ്ഞടുപ്പിന് മുമ്പാണ് കേസ് ഉപേക്ഷിക്കുന്ന തീരുമാനം വരുന്നതെങ്കില്‍ അത് ഇടതു സര്‍ക്കാരിന് തീര്‍ച്ചയായും തുടര്‍ഭരണം ഉറപ്പാക്കും.

യു എ ഇ കോണ്‍സുലേറ്റിലെ അറ്റാഷെയുടെ മൊഴിയാണ് കേസിലെ പ്രതികള്‍ക്ക് പിടിവള്ളിയായിരിക്കുന്നത്. ഇക്കഴിഞ്ഞ ജൂണ്‍ 30 ന് തിരുവനന്തപുരം വിമാനത്താവളത്തില്‍ ബാഗേജ് കസ്റ്റംസ് തടഞ്ഞു വച്ചപ്പോഴാണ് അറ്റാഷെയുടെ ഫോണ്‍ വിളി പ്രതിയായ സരിത്തിന് ലഭിച്ചത്. സരിത്ത് എത്രയും വേഗം എത്തണമെന്നും ബാഗ് കുടുങ്ങിയെന്നും പറഞ്ഞാണ് അറ്റാഷെ വിളിച്ചത്. വിമാനത്താവളത്തിലെ തന്റെ ബന്ധങ്ങള്‍ ഉപയോഗിക്കാനാണ് അറ്റാഷെ സരിത്തിനെ വിളിച്ചത്. ഇക്കാര്യം അറ്റാഷെ തന്നെ കസ്റ്റംസിന് വൊഴി നല്‍കിയിട്ടുണ്ട്. ഈ മൊഴിയാണ് നിര്‍ണായകമായി തീരുന്നത്. ഇത്തരമൊരു മൊഴിയുമായി മുന്നോട്ടു പോയാല്‍ കോടതിയില്‍ നിന്നും തട്ടുകിട്ടുമെന്ന റിപ്പോര്‍ട്ട് കസ്റ്റംസ് കൈമാറിയിട്ടുണ്ട്.

സ്വര്‍ണ്ണം തങ്ങളുടേതാണെങ്കില്‍ എന്തിനാണ് അറ്റാഷെ വിളിച്ചതെന്നാണ് പ്രതികളുടെ ചോദ്യം. ഇതേ ചോദ്യം ഇവര്‍ കസ്റ്റംസിനോടും കോടതിയോടും ചോദിച്ചിട്ടുണ്ട്. യു. എ. ഇ. കോണ്‍സുലേറ്റിലെ ഉന്നതരുടേതാണ് സ്വര്‍ണ്ണം എന്ന നിഗമനത്തിലേക്ക് കസ്റ്റംസ് പതിയെ പതിയെ നീങ്ങുന്ന കാഴ്ചയാണ് കാണുന്നത്. സ്വര്‍ണ്ണകടത്തില്‍ യു എ ഇ കോണ്‍സുലേറ്റിലെ ഉന്നതര്‍ക്ക് വ്യക്തമായ പങ്കുണ്ടെന്ന് കസ്റ്റംസിന് നേരത്തെ അറിയാമായിരുന്നു. എന്നാല്‍ അവരെയൊന്നും ചോദ്യം ചെയ്യാനുള്ള അവസരം കസ്റ്റംസിന് ലഭിച്ചിരുന്നില്ല.

30 കിലോ സ്വര്‍ണ്ണത്തിന്റെ അവകാശികളെയാണ് കസ്റ്റംസിന് കണ്ടെത്തേണ്ടത്. അത് കണ്ടെത്തണമെങ്കില്‍ വിദേശത്തുള്ള പ്രതികളെ ചോദ്യം ചെയ്യണം. ഇതില്‍ പ്രധാനി ഫൈസല്‍ ഫരിദാണ്. കേരളത്തിലെ ചാനല്‍ മാധ്യമ പ്രവര്‍ത്തകര്‍ പോലും കണ്ട ഫരീദിനെ കസ്റ്റംസിന് കണ്ടെത്താന്‍ കഴിഞ്ഞിട്ടില്ലെന്നതാണ് വാര്‍ത്തകള്‍. ഫൈസലിനെ വിട്ടു തരാന്‍ യു എ ഇ തയ്യാറല്ല.

ഫരീദിനെ വിട്ടു തരണമെനാവശ്യപ്പെട്ട് ഒരു ക്രിയാത്മക ചുവടു വയ്പും കസ്റ്റംസോ കേന്ദ്ര സര്‍ക്കാരിന്റെ വിദേശകാര്യ മന്ത്രാലയമോ നടത്തിയിട്ടില്ല. ഫരീദിനെ ഇന്ത്യക്ക് വിട്ടുകൊടുത്താല്‍ യു എ ഇ കോണ്‍സുലേറ്റിലെ ചില ഉദ്യോഗസ്ഥര്‍ അഴിക്കുള്ളിലാകുമെന്ന സംശയമാണ് യു എ ഇക്കുള്ളത്. ഇന്റര്‍പോള്‍ വഴിയാണ് ഫൈസലിനെ ഇന്ത്യയിലെത്തിക്കാന്‍ കസ്റ്റംസ് ശ്രമിച്ചത്. ഇന്റര്‍പോള്‍ പുറപ്പെടുവിച്ച ബ്ലൂ കോര്‍ണര്‍ നോട്ടീസിലൂടെ ഫൈസല്‍ ഫരീദ് എവിടെയാണെന്ന് കണ്ടെത്തിയിട്ടുണ്ട്. എന്നാല്‍ റെഡ് കോര്‍ണര്‍ നോട്ടിസ് ഉണ്ടെങ്കില്‍ മാത്രമേ പ്രതിയെ അറസ്റ്റ് ചെയ്യാന്‍ കഴിയുകയുള്ളു.അത് പുറപ്പെടുവിക്കാന്‍ അധിക്യതര്‍ തയ്യാറായിട്ടില്ല. ഇനി പുറപ്പെടുവിക്കാന്‍ സാധ്യതയുമില്ല.

മൂവാറ്റുപുഴ സ്വദേശി റബില്‍സിനെയാണ് യു എ ഇ വിട്ടു നല്‍കിയത്. അയാളെ കൊണ്ട് കസ്റ്റംസിന് ഒരു പ്രയോജനവുമില്ല. അയാളില്‍ നിന്നും കാര്യമാത്ര പ്രസക്തമായ യാതൊരു വിവരവും ലഭ്യമായിട്ടില്ല. നയതന്ത്ര കള്ളക്കടത്തില്‍ റബിന്‍സിന്റെ പങ്ക് തെളിയാത്തതിനാല്‍ അയാളെ ചോദ്യം ചെയ്യുന്നത് ഇ ഡി ഉപേക്ഷിച്ചു. ഫൈസല്‍ ഫരീദിനെ വിട്ടുതരാത്തതിനെ കുറിച്ച് കസ്റ്റംസോ ഇ.ഡിയോ ഒരക്ഷരം മിണ്ടുന്നില്ല. അവര്‍ക്ക് കാരണമറിയാം. പക്ഷേ പറയാന്‍ കഴിയില്ല. പറഞ്ഞാല്‍ ജോലി പള്ളിപുറത്താകും.

ഇനി കേസുകെട്ട് പൂട്ടുക എന്ന ഐഡിയ മാത്രമാണ് കസ്റ്റംസിന് മുന്നിലുള്ളത്. അപ്പോള്‍ ഒരു ചോദ്യം ബാക്കിയാവും. ഇത്രയും കാലം ജയിലില്‍ കഴിഞ്ഞവരും ഇപ്പോള്‍ കഴിയുന്നവരും എന്ത് തെറ്റാണ് കസ്റ്റംസിനോട് ചെയ്തത്?