പയ്യന്നൂരിലെ വാടകകെട്ടിടത്തിൽ മൂന്ന് ദിവസത്തിന് മുൻപ് ആത്മഹത്യക്ക് ശ്രമിച്ച കമിതാക്കൾ മരിച്ചു. ഗുരുതരമായി പൊള്ളലേറ്റ് ചികിത്സയിലായിരുന്നു യുവാവും യുവതിയും. കാസർ ഗോഡ് വെസ്റ്റ് എളേരിയിലെ എളേരിത്തട്ട് സ്വദേശി വളപ്പില് ഹൗസില് വി കെ ശിവപ്രസാദും (28) പയ്യന്നൂര് കോളേജിലെ ഹിന്ദി ബിരുദ വിദ്യാര്ഥിനി ഏഴിലോട് പുറച്ചേരിയിലെ എം ഡി ആര്യ(21)യുമാണ് മരിച്ചത്.

ഇരുവരും കണ്ണൂർ മെഡിക്കൽ കോളേജില്‍ ചികിത്സയിലായിരുന്നു. കഴിഞ്ഞ 19ന് വൈകിട്ട് നാലോടെ പയ്യന്നൂർ പഴയ ബസ്റ്റാന്റിന് സമീപത്തെ വാടക കെട്ടിടത്തിലാണ് ആത്മഹത്യാശ്രമമുണ്ടായത്. തിങ്കളാഴ്ച രാത്രി ഏഴോടെ ആര്യയും ചൊവ്വാഴ്ച പുലര്‍ച്ചെ ഒന്നരയോടെ ശിവപ്രസാദും മരണപ്പെടുകയായിരുന്നു. പയ്യന്നൂർ കോളേജ് വിദ്യാർത്ഥിനിയായ ആര്യയുടെ വിവാഹ നിശ്ചയം കഴിഞ്ഞതായിരുന്നു. ഇതിനെ തുടർന്നാണ് ഇരുവരും ആത്മഹത്യയ്ക്ക് ശ്രമിച്ചത്.