സ്വകാര്യ റിസോര്ട്ടിലെ ജീവനക്കാരായ യുവതികള്ക്കൊപ്പം ഇന്നലെ പുലര്ച്ചെ വിഴിഞ്ഞം ആഴിമലയിലെത്തിയ യുവാക്കള് കടലില് വീണ് മരിച്ചു... ഇവര്ക്കൊപ്പം കടലില് വീണ യുവതി പരിക്കുകളോടെ രക്ഷപ്പെട്ടു
സ്വകാര്യ റിസോര്ട്ടിലെ ജീവനക്കാരായ യുവതികള്ക്കൊപ്പം ഇന്നലെ പുലര്ച്ചെ വിഴിഞ്ഞം ആഴിമലയിലെത്തിയ യുവാക്കള് കടലില് വീണ് മരിച്ചു. ഇവര്ക്കൊപ്പം കടലില് വീണ യുവതി പരിക്കുകളോടെ രക്ഷപ്പെട്ടു.
പേയാട് കാട്ടുവിള സ്കൈലൈന് റോഡ് ഹില്വ്യൂഗാര്ഡനില് റിട്ട. സെയില്സ് ടാക്സ് ഓഫീസര് പദ്മകുമാറിന്റെയും റിട്ട. അദ്ധ്യാപിക ഗിരിജദേവിയുടെയും മകന് പ്രശാന്ത് പി. കുമാര് (29), ബാലരാമപുരം രാമപുരം നവരാഗില് റിട്ട. ബാങ്ക് ഉദ്യോഗസ്ഥന് ചന്ദ്രഹാസന്റെയും റീജയുടെയും മകന് അശ്വിന്തേജി (29) എന്നിവരാണ് മരിച്ചത്.
സംഭവത്തെപ്പറ്റി പൊലീസ് പറയുന്നതിങ്ങനെ ഇന്നലെ പുലര്ച്ചെ രണ്ട് മണിയോടെ കോവളത്തെ സ്വകാര്യ റിസോര്ട്ടിലെ ജീവനക്കാരും അരുണാചല് പ്രദേശ് സ്വദേശിനികളുമായ രണ്ട് യുവതികള്ക്കൊപ്പമാണ് യുവാക്കള് കാറില് ആഴിമലയിലെത്തിയത്.
ആഴിമല ക്ഷേത്രത്തിന് സമീപം വാഹനം പാര്ക്ക് ചെയ്ത് ശേഷം ഇവര് ബീച്ചിലെ പാറക്കെട്ടില് മണിക്കൂറുകളോളം ചെലവഴിച്ചു. രാവിലെ 6 മണിയോടെ ശക്തമായ തിരിയില്പ്പെട്ട് പ്രശാന്തും ഒരു യുവതിയും കടലിലേക്ക് വീണു. തുടര്ന്ന് യുവതിയെ അശ്വിനും രണ്ടാമത്തെ യുവതിയും ചേര്ന്ന് വലിച്ച് കരയ്ക്ക് കയറ്റി.
തുടര്ന്ന് തിരയില് അകപ്പെട്ടുപോയ പ്രശാന്തിനെ രക്ഷിക്കാനായി അശ്വിന് കടലിലേക്ക് ചാടുകയായിരുന്നെന്ന് യുവതികള് മൊഴി നല്കി. യുവതികളുടെ നിലവിളികേട്ട് എത്തിയ നാട്ടുകാരും മത്സ്യതൊഴിലാളികളും തെരച്ചില് നടത്തിയെങ്കിലും ഇരുവരെയും കണ്ടെത്താനായില്ല.
തീരദേശ പൊലീസും മറൈന് എന്ഫോഴ്സ്മെന്റും ചേര്ന്ന് നടത്തിയ തെരച്ചിലിനൊടുവിലാണ് രാവിലെ 9 ഓടെ പ്രശാന്തിന്റെ മൃതദേഹം കണ്ടെത്തിയത്. ഉച്ചയ്ക്ക് ഒന്നരയോടെയാണ് പാറക്കെട്ടില് കുടുങ്ങിയ നിലയില്അശ്വിന്റെ മൃതദേഹം കിട്ടിയത്. തിരുവനന്തപുരം മെഡിക്കല് കോളേജ് ആശുപത്രിയിലെ പോസ്റ്റ്മോര്ട്ടത്തിന് ശേഷം മൃതദേഹങ്ങള് ഇന്ന് വിട്ടുകൊടുക്കും. ഇരുവരും അവിവാഹിതരാണ്.
സ്വകാര്യ ടി.വിചാനലിലെ ജീവനക്കാരനാണ് പ്രശാന്ത്. വൈശാഖ്, ശരത് എന്നിവര് സഹോദരങ്ങളാണ്. ബംഗളൂരുവിലെ സ്വകാര്യ കമ്പനി ജീവനക്കാരനാണ് അശ്വിന്. അനുരാഗ് ഏക സഹോദരനാണ്. അസ്വാഭാവിക മരണത്തിന് കേസെടുത്തതായി വിഴിഞ്ഞം സി.ഐ രമേഷ് പറഞ്ഞു.
https://www.facebook.com/Malayalivartha