തെരഞ്ഞെടുപ്പു ജാഥകളുടെ ആദ്യനാളുകളില്‍ കോണ്‍ഗ്രസ് ശബരിമല വിഷയം കൊണ്ടുവന്നെങ്കിലും ആഴക്കടലും ഉദ്യോഗാര്‍ത്ഥികളുടെ സമരവും ഒക്കെയായപ്പോള്‍ ഒന്നും വേണ്ടത്ര ശ്രദ്ധിച്ചില്ല. ഇപ്പോള്‍ രാഹുല്‍ ഗാന്ധിയെ പരാജയപ്പെടുത്തിയ സാക്ഷാല്‍ സ്മൃതി ഇറാനി തന്നെ രംഗത്തെത്തിയിരിക്കുകയാണ്.

ശബരിമലയിലെ ആചാരങ്ങള്‍ സംരക്ഷിക്കപ്പെടുകതന്നെ ചെയ്യുമെന്നാണ് കേന്ദ്രമന്ത്രി സ്മൃതി ഇറാനി പറയുന്നത്. അയോധ്യയില്‍ രാമക്ഷേത്രമുണ്ടാക്കുമെന്നു പറഞ്ഞ ബി.ജെ.പി.തന്നെയാണ് ഇക്കാര്യവും പറയുന്നതെന്നും ജനങ്ങള്‍ അതു വിശ്വസിക്കുമെന്നും അവര്‍ പറഞ്ഞു.

ബി.ജെ.പി. സംസ്ഥാന അധ്യക്ഷന്‍ കെ. സുരേന്ദ്രന്‍ നയിക്കുന്ന വിജയയാത്രയുടെ കോട്ടയം ജില്ലയിലെ സമാപനസമ്മേളനത്തില്‍ സംസാരിക്കുകയായിരുന്നു കേന്ദ്രമന്ത്രി.

ആഴക്കടല്‍ മത്സ്യബന്ധനത്തിന്റെ പേരില്‍ 5,000 കോടിയുടെ അഴിമതി നടത്തിയത് ആരാണ്? പാര്‍ട്ടിക്കാരോ മന്ത്രിമാരോ ഉദ്യോഗസ്ഥരോ? തന്റെ ഓഫീസില്‍ നടന്ന സ്വര്‍ണക്കടത്തിനെപ്പറ്റിയും കരാറുകളെപ്പറ്റിയും മുഖ്യമന്ത്രിക്ക് അറിയില്ല. ഇങ്ങനെയുള്ള ഒരു മുഖ്യമന്ത്രിയെ എന്തിനു ജയിപ്പിക്കണം? ബി.ജെ.പി. കേരളത്തില്‍ അധികാരത്തില്‍ വന്നാല്‍മാത്രമേ കൊലപാതക രാഷ്ട്രീയം അവസാനിക്കൂ. അമേഠിയില്‍നിന്നു കേരളത്തിലേക്ക് ഓടിയൊളിച്ച രാഹുല്‍ഗാന്ധി കേരളത്തിലും പരാജിതനാകും

ഗുജറാത്തില്‍ തദ്ദേശ തെരഞ്ഞെടുപ്പില്‍ കോണ്‍ഗ്രസ് തകര്‍ന്നടിഞ്ഞുകഴിഞ്ഞു. എല്ലാ സ്ഥലത്തും പരാജയപ്പെട്ട കോണ്‍ഗ്രസിന്റെ നേതാവാണോ കേരളത്തില്‍ പാര്‍ട്ടിയെ വിജയിപ്പിക്കുക? ഇന്ത്യയില്‍ മത്സ്യബന്ധനത്തിന് ഒരു വകുപ്പുണ്ടാക്കുമെന്നാണ് രാഹുല്‍ പറയുന്നത്. എന്നാല്‍, നരേന്ദ്രമോദി ഫിഷറീസ് വകുപ്പുണ്ടാക്കിയിട്ടുണ്ട്, അതിനു മന്ത്രിയെയും വച്ചിട്ടുണ്ട്.

കേരളത്തിലെ ബി.ജെ.പിയുടെ ശക്തി മുന്നൂറോളം പ്രവര്‍ത്തകരുടെ ബലിദാനമാണ്. വിജയയാത്രയുടെ ഭാഗമായതില്‍ സന്തോഷിക്കുന്നു. കേരളത്തിലെ പാര്‍ട്ടി പ്രവര്‍ത്തകരുടെ ആവേശം ഹൃദയംകവരുന്നു. കേരളത്തില്‍ അഴിമതിയുടെയും കുറ്റകൃത്യത്തിന്റെയും കാര്യത്തില്‍ ഇടതുപക്ഷവും വലതുപക്ഷവും പരസ്പര സഹായ മുന്നണികളാണെന്നും സ്മൃതി ഇറാനി പറഞ്ഞു.



അതേസമയം സംസ്ഥാനത്തെ ബിജെപിയുടെ സ്ഥാനാര്‍ത്ഥി നിര്‍ണയ ചര്‍ച്ചകളും പുരോഗമിക്കുന്നു. ബിജെപി സംസ്ഥാന അധ്യക്ഷന്‍ കെ. സുരേന്ദ്രനായി പാര്‍ട്ടി അഞ്ച് മണ്ഡലങ്ങളാണ് പരിഗണിക്കുന്നത്. വി. മുരളീധരന്‍ പിന്മാറുന്ന സാഹചര്യത്തില്‍ കഴക്കൂട്ടത്ത് പ്രഥമ പരിഗണനയുണ്ട്. ശോഭാ സുരേന്ദ്രന്‍, സുരേഷ് ഗോപി, ടി.പി. സെന്‍കുമാര്‍ തുടങ്ങിയവര്‍ ജനവിധി തേടണമെന്നും നേതൃത്വം പറയുന്നു.

ഈ മാസം അഞ്ചാം തിയതിക്കകം ബിജെപി സാധ്യതാ സ്ഥാനാര്‍ത്ഥി പട്ടിക തയാറാക്കും. 12 ാം തിയതി സ്ഥാനാര്‍ത്ഥി പ്രഖ്യാപനവും ഉണ്ടാകും.

ബിജെപി സംസ്ഥാന അധ്യക്ഷന്‍ മത്സരിക്കുമോ ഇല്ലയോ എന്ന ചോദ്യങ്ങള്‍ക്കാണ് നിലവില്‍ അവസാനമായിരിക്കുന്നത്. കെ. സുരേന്ദ്രന്‍ മത്സരിക്കുമെന്നാണ് ബിജെപിയുടെ മുതിര്‍ന്ന നേതാക്കള്‍ പറയുന്നത്. അഞ്ച് മണ്ഡലങ്ങളാണ് കെ. സുരേന്ദ്രന് വേണ്ടി പാര്‍ട്ടി പരിഗണിക്കുന്നത്. ഇതില്‍ കഴക്കൂട്ടം മണ്ഡലത്തിനാണ് പ്രഥമ പരിഗണന നല്‍കുന്നത്. തെരഞ്ഞെടുപ്പില്‍ പ്രചാരണത്തിന് ഇറങ്ങുമെന്ന് ശോഭാ സുരേന്ദ്രന്‍ അറിയിച്ചിരുന്നു.



മണ്ഡലത്തിന് കേരളത്തില്‍ നിന്നും ഒന്നും ലഭിച്ചില്ലെന്ന് സുരേന്ദ്രന്‍ ആരോപിച്ചു. പുരോഗതിയുണ്ടെന്നു പറയുന്ന ഏത് മണ്ഡലമാണ് കേരളത്തില്‍ ഉള്ളതെന്നും സുരേന്ദ്രന്‍ ചോദിച്ചു.

പിണറായി വിജയന്റെ ധര്‍മ്മടത്തും ഉമ്മന്‍ ചാണ്ടിയുടെ പുതുപ്പള്ളിയിലും രമേശ് ചെന്നിത്തലയുടെ ഹരിപ്പാടും കാര്യമായ ഒരു വികസനവും നടക്കുന്നില്ല. ഉമ്മന്‍ ചാണ്ടി നേമത്ത് മത്സരിക്കുമെന്ന പ്രചരണം ഉണ്ടായിരുന്നു. ഒ രാജഗോപാല്‍ ഒന്നാം തരം വികസനമാണ് നേമത്ത് നടത്തിയത്. കേരളത്തില്‍ നിന്നും ഒരു കാശും കിട്ടിയില്ലെന്നും കേന്ദ്രത്തിന്റെയും മറ്റ് ഏജന്‍സികളുടേയും സഹായത്തോടെയാണ് വികസന പ്രവര്‍ത്തനങ്ങള്‍ നടത്തിയതെന്നും സുരേന്ദ്രന്‍ ആരോപിച്ചു.