എട്ടുവയസ്സുകാരിയുടെ ശ്വാസനാളത്തില്‍ കുടുങ്ങിയ ഷൂ വിസില്‍ പുറത്തെടുത്തത് സങ്കീര്‍ണ റിജിഡ് ബ്രോങ്കോസ്‌കോപ്പി വഴി
കണ്ണൂര്‍ ഗവ. മെഡിക്കല്‍ കോളേജ് ആസ്പത്രിയില്‍ സങ്കീര്‍ണ റിജിഡ് ബ്രോങ്കോസ്‌കോപ്പി വഴി എട്ടുവയസ്സുകാരിയുടെ ജീവന്‍ രക്ഷിച്ചു. കാസര്‍കോട് സ്വദേശിനിയുടെ ശ്വാസനാളത്തില്‍ കുടുങ്ങിയ ഷൂ വിസില്‍ കണ്ടെത്തി പുറത്തെടുത്താണ് രക്ഷപ്പെടുത്തിയത്.
ഒരു മാസത്തിലേറെയായി നിര്‍ത്താതെയുള്ള ചുമയും ശ്വാസതടസ്സവും കാരണം കാസര്‍കോട് ഗവ. ആസ്പത്രിയില്‍നിന്ന് കണ്ണൂര്‍ ഗവ. മെഡിക്കല്‍ കോളേജ് ആസ്പത്രിയിലേക്ക് റഫര്‍ചെയ്യുകയായിരുന്നു. പരിയാരത്ത് വിദഗ്ധ പരിശോധനയ്ക്ക് വിധേയമാക്കിയപ്പോള്‍ ശ്വാസനാളത്തില്‍ മറ്റെന്തോവസ്തു കുടുങ്ങിക്കിടക്കുന്നതായി തെളിഞ്ഞു.
വലത്തേ ശ്വാസകോശത്തിലെ താഴെഭാഗം പൂര്‍ണമായും അടഞ്ഞ കുട്ടി ഗുരുതരാവസ്ഥയിലായിരുന്നു. ഉടന്‍ പീഡിയാട്രിക് റിജിഡ് ബ്രോങ്കോസ്‌കോപ്പി ചികിത്സയ്ക്ക് കുട്ടിയെ വിധേയമാക്കുകയും കുടുങ്ങിക്കിടന്ന വിസില്‍ പുറത്തെടുക്കുകയുമായിരുന്നു.
ശ്വാസകോശവിഭാഗത്തിലെ ഡോ. ഡി.കെ.മനോജ്, ഡോ. രാജീവ് റാം, ഡോ. രജനി, ഡോ. മുഹമ്മദ് ഷഫീഖ്, ഡോ. പദ്മനാഭന്‍, അനസ്‌തേഷ്യ വിഭാഗത്തിലെ ഡോ. ചാള്‍സ്, ഡോ. ദിവ്യ, ഡോ. സജിന എന്നിവര്‍ നേതൃത്വം നല്‍കി.
കുട്ടി സുഖംപ്രാപിച്ചുവരുന്നു. മെഡിക്കല്‍ സംഘത്തെ പ്രിന്‍സിപ്പല്‍ ഡോ. കെ.എം. കുര്യാക്കോസും ആസ്പത്രി സൂപ്രണ്ട് ഡോ. കെ.സുദീപും അഭിനന്ദിച്ചു.
https://www.facebook.com/Malayalivartha
