നവോത്ഥാനം എന്താണെന്ന് തനിക്കറിയില്ലെന്ന് ട്വന്റി-20യില്‍ ചേര്‍ന്ന നടന്‍ ശ്രീനിവാസന്‍ പറഞ്ഞിരുന്നു. നവോത്ഥാനത്തിന് നില്‍ക്കണമെന്നൊന്നും ഞാന്‍ പറയുന്നില്ല. ച്യവനപ്രാശം ലേഹ്യം പോലെയുളള സാധനമാണോ നവോത്ഥാനമെന്നും ശ്രീനിവാസന്‍ ചോദിച്ചു. മതനിരപേക്ഷത, സുസ്ഥിര വികസനം തുടങ്ങിയ വാദങ്ങള്‍ തട്ടിപ്പാണെന്നും അദ്ദേഹം പറഞ്ഞു. എല്ലാ സംഘടിത മതങ്ങളും അതിശക്തമായി തമ്മിലടിക്കുകയാണ്. അതാണോ മതനിരപേക്ഷതയെന്നും അദ്ദേഹം ചോദിച്ചിരുന്നു.
  ഏതായാലും സിനിമയില്‍ മാത്രമല്ല രാഷ്ട്രീയത്തിലും കുറിക്ക് കൊള്ളുന്ന നര്‍മവും വിമര്‍ശനവും മല്‍സരവുമൊക്കെ  തനിക്ക് വഴങ്ങുമെന്ന്  ശ്രീനിവാസന്‍ തെളിയിച്ചിരിക്കുകയാണ്.  നടന്‍ ശ്രീനിവാസനെ പരിഹസിച്ച സിപിഎം നേതാവ് പി.ജയരാജന് ഉരുളയ്ക്ക് ഉപ്പേരി പോലെ മറുപടി നല്‍കിയിരിക്കുകയാണ് ശ്രീനിവാസന്‍.   തനിക്ക് അല്‍പ്പം പോലും ബുദ്ധിയില്ലാതിരുന്ന കാലത്ത് എസ്എഫ്ഐയോടായിരുന്നു ആഭിമുഖ്യമെന്നാണ് പി. ജയരാജന് ശ്രീനിവാസന്‍ നല്‍കിയ മറുപടി. ഭരണഘടന അനുസരിച്ച് ഒരാള്‍ക്ക് എത്ര പാര്‍ട്ടിയില്‍ ചേരാം. തനിക്ക് തോന്നുകയാണെങ്കില്‍ ട്വന്റി ട്വന്റിയില്‍ നിന്നും മാറും. അല്‍പ്പംപോലും ബുദ്ധിയില്ലാതിരുന്ന കാലത്ത് തനിക്ക് എസ്എഫ്ഐയോടായിരുന്നു ആഭിമുഖ്യം.   പിന്നീട് കുറച്ചുകൂടി ബുദ്ധിവെച്ചപ്പോള്‍ താന്‍ കെഎസ്യുവും, എബിവിപിയിലേക്ക്ും മാറി. അതിനുശേഷമാണ് താന്‍ ട്വന്റി ട്വന്റിയിലേക്ക് എത്തിയതെന്നും സിപിഎം നേതാവിന് മറുപടിയുമായി നടന്‍ ശ്രീനിവാസന്‍ വന്നതോടെ മലബാറില്‍ കാര്യങ്ങള്‍ കുശാലായി.     ഇതെല്ലാം താത്കാലികമാണ്. വേണമെങ്കില്‍ ഇനിയും മാറാനുള്ള മുന്നൊരുക്കമാണിതെന്ന് പറയാമെന്നും ശ്രീനിവാസന്‍ പ്രതികരിച്ചു. ട്വന്റി ട്വന്റിയെ പിന്തുണയ്ക്കുന്നതായി കഴിഞ്ഞ ദിവസമാണ് നടന്‍ അറിയിച്ചത്. ഇതിനെ തുടര്‍ന്ന് ശ്രീനിവാസന് കൃത്യമായ രാഷ്ട്രീയ നിലപാടില്ലെന്നും ചാഞ്ചാട്ട നിലപാട് സ്വീകരിക്കുന്ന നടനാണ് എന്നും പി. ജയരാജന്‍ വിമര്‍ശിച്ചിരുന്നു.    രാഷ്ട്രീയം കൃത്യമായി മനസിലാക്കുന്ന ആളല്ല ശ്രീനിവാസനെന്ന് ജയരാജന്‍ പറഞ്ഞു. പഠിക്കുന്ന കാലത്ത് ശ്രീനിവാസന്‍ എബിവിപി പ്രവര്‍ത്തകനായിരുന്നു. പില്‍ക്കാലത്ത് ഇടതുപക്ഷ രാഷ്ട്രീയവുമായി സഹകരിച്ചിട്ടുണ്ടെന്നും ജയരാജന്‍ പറഞ്ഞു. രാഷ്ട്രീയത്തില്‍ ചാഞ്ചാട്ട നിലപാട് സ്വീകരിക്കുന്ന നടനാണ് ശ്രീനിവാസനെന്നും ജയരാജന്‍ പറഞ്ഞതിന് പിന്നാലെയാണ് ശ്രീനിയുടെ പതിവ് ശൈലിയിലെ പ്രതികരണം.   ട്വന്റി ട്വന്റിക്കെതിരെയും ജയരാജന്‍ വിമര്‍ശനം ഉന്നയിച്ചു. ട്വന്റി ട്വന്റിയുടെ വികസിത രൂപമാണ് അംബാനിമാരും ആദാനിമാരും. ജനങ്ങളെ പ്രലോഭിപ്പിച്ച് വിധേയമാക്കുന്നതാണ് അവരുടെ രീതിയെന്നും ജയരാജന്‍ വിമര്‍ശിച്ചു.  ഏതായാലും ശ്രീനിയുടെ രാഷ്ട്രീയ നിലപാടിനെ തള്ളിപ്പറഞ്ഞ പി.ജെ. അഭിനയത്തെ വാനോളം പുകഴ്ത്തിയിട്ടുണ്ട്.   ശ്രീനിവാസന്റെ അഭിനയത്തെ കുറിച്ച് തനിക്ക് നല്ല അഭിപ്രായമാണെന്നും അദ്ദേഹത്തിന്റെ അഭിനയം താന്‍ ആസ്വദിക്കാറുണ്ടെന്നും ജയരാജന്‍ പറഞ്ഞു. മാറ്റിപറഞ്ഞാല്‍ അതിനുള്ള മറുപടി എന്താണെന്ന് ശ്രീനിയെ അടുത്തറിയുന്ന സിനിമാക്കാര്‍ക്കും പ്രേക്ഷകര്‍ക്കും അറിയാം.    "