പിടികിട്ടാതെ നേമം... ഉമ്മന്ചാണ്ടിയോ രമേശ് ചെന്നിത്തലയോ നേമത്ത് മത്സരിച്ചാല് രാഹുല് ഗാന്ധിയെ അമേഠിയില് മലര്ത്തിയടിച്ച പോലെ അവതാര പുരുഷനെ ഇറക്കും; നേമത്ത് നിന്നും ഒളിച്ചോടാന് നേതാക്കളുടെ കൂട്ടയടി; ഉമ്മന്ചാണ്ടിയുടെ മനസമ്മതം തേടി ഹൈക്കമാന്ഡ്; മത്സരിക്കരുതെന്ന് ഉപദേശിച്ച് ഗ്രൂപ്പ് അണികള്
പാവങ്ങളുടെ ഗുജറാത്തിനെ കോണ്ഗ്രസുകാര് ചര്ച്ച ചെയ്ത് വലിയ സംഭവമാക്കി മാറ്റിയിരിക്കുകയാണ്. ഉമ്മന്ചാണ്ടിയേയോ രമേശ് ചെന്നിത്തലയേയോ മത്സരിപ്പിച്ച് ദേശീയ ശ്രദ്ധ നേടാനാണ് കോണ്ഗ്രസ് ശ്രമിക്കുന്നത്. എന്നാല് മത്സരിക്കുന്ന ആരായാലും അവര് ആത്മഹത്യ ചെയ്യുന്നത് പോലെയായിരിക്കും. ഇവരിലാര് മത്സരിച്ചാലും തോറ്റാല് പിന്നെ 5 വര്ഷം വനവാസമായിരിക്കും യോഗം. അതിനാല് തന്നെ നേമത്ത് മത്സരിക്കരുതെന്നാണ് ഗ്രൂപ്പുകാര് നല്കുന്ന ഉപദേശം. ഇത് ഒതുക്കാനുള്ള ചതിയായും വ്യാഖ്യാനിക്കുന്നു.
അതേസമയം ഉമ്മന്ചാണ്ടിയോ രമേശ് ചെന്നിത്തലയോ നേമത്ത് മത്സരിച്ചാല് രാഹുല് ഗാന്ധിയെ അമേഠിയില് മലര്ത്തിയടിച്ച പോലെ അവതാര പുരുഷനെ ഇറക്കാനാണ് അമിത് ഷാ ശ്രമിക്കുന്നത്. ഇവരാരെങ്കിലും നേമത്ത് മത്സരിച്ചാല് വേണ്ടിവന്നാല് രാജഗോപാലിനെ ഇറക്കും. അതോടെ സുസമ്മതനായ രാജഗോപാലിന് സിപിഎമ്മുകാരും വോട്ട് നല്കും.
ബി.ജെ.പിക്ക് എതിരെ നേമം സീറ്റില് അഭിമാന മത്സരത്തിന് കച്ചമുറുക്കുന്ന കോണ്ഗ്രസ്, അങ്കത്തട്ടിലെ ശക്തന് ആരായിരിക്കുമെന്ന സസ്പെന്സ് നിലനിറുത്തി മാരത്തണ് ചര്ച്ചകള് അവസാന റൗണ്ടിലാണ്. നേമത്ത് ബി.ജെ.പിയും സി.പി.എമ്മും ഉയര്ത്തുന്ന വെല്ലുവിളികളെ ഒരുപോലെ പ്രതിരോധിക്കാന് കരുത്തന് തന്നെ വേണമെന്ന ആലോചനകളില് കെ. മുരളീധരനു പുറമെ ഉമ്മന്ചാണ്ടിക്കു മേലും സമ്മര്ദ്ദം ശക്തം.
അതേസമയം, നേമത്ത് മത്സരിക്കാന് താന് സമ്മതിച്ചെന്ന വാര്ത്തകള് ഉമ്മന്ചാണ്ടി നിഷേധിച്ചു. നേമത്ത് മത്സരിക്കുമോ എന്ന ചോദ്യത്തിന് 50 കൊല്ലമായി തന്റെ മണ്ഡലം പുതുപ്പള്ളിയാണെന്നായിരുന്നു അദ്ദേഹത്തിന്റെ മറുപടി. നേമത്തിന്റെ കാര്യത്തില് തീരുമാനമായില്ലെന്ന് പ്രതിപക്ഷ നേതാവ് രമേശ് ചെന്നത്തല കൂടി പ്രതികരിച്ചതോടെ ഇന്ന്, ആ നാടകീയ പ്രഖ്യാപനത്തിനു കാക്കുകയാണ് മുന്നണികള്.
മുരളീധരന്റെ കാര്യത്തില്, എം.പിമാര്ക്ക് മത്സരിക്കാന് ഇളവു നല്കുന്നതുമായി ബന്ധപ്പെട്ട അനിശ്ചിതത്വമുണ്ട്. എം.പിമാര് മത്സരിക്കുമോ എന്ന കാര്യം ഇന്ന് വ്യക്തമാകുമെന്നും പട്ടിക ഒറ്റഘട്ടമായിത്തന്നെ പ്രഖ്യാപിക്കുമെന്നും മുല്ലപ്പള്ളി രാമചന്ദ്രന് പറഞ്ഞു. അന്തിമ സ്ഥാനാര്ത്ഥിപ്പട്ടിക ഇന്നു വൈകിട്ട് കേന്ദ്ര തിരഞ്ഞെടുപ്പ് സമിതി ചര്ച്ച ചെയ്യും. അംഗീകരിച്ചാല് ഇന്നു തന്നെ പ്രഖ്യാപനമുണ്ടാകും.
നേമം വെല്ലുവിളി ഏറ്റെടുക്കുമോ എന്ന് രമേശ് ചെന്നിത്തലയോട് മാദ്ധ്യമ പ്രവര്ത്തകര് ചോദിച്ചപ്പോള്, 140 മണ്ഡലങ്ങളിലും പ്രതിപക്ഷ നേതാവായ താനുണ്ടെന്നായിരുന്നു മറുപടി. നേമത്ത് ബി.ജെ.പിയെ പരാജയപ്പെടുത്താനുള്ള തന്ത്രങ്ങളായിരിക്കും ആവിഷ്കരിക്കുക. നേമം സസ്പെന്സായി ഇരിക്കട്ടെയെന്നും അദ്ദേഹം പറഞ്ഞു. മാദ്ധ്യമങ്ങളുണ്ടാക്കുന്ന വാര്ത്തയ്ക്ക് സമാധാനം പറയേണ്ട അവസ്ഥയാണ്. സ്ക്രീനിംഗ് കമ്മിറ്റിയിലല്ലാതെ വേറെ ഒരു ചര്ച്ചയിലും പങ്കെടുത്തില്ല. വാര്ത്ത എങ്ങനെ വന്നുവെന്ന് അറിയില്ല.
അതേസമയം കെ.സി ജോസഫ് ഒഴികെ എല്ലാ സിറ്റിംഗ് എം.എല്.എമാരും മത്സരിക്കും. ഇവരുടെ മണ്ഡലങ്ങളില് മറ്റു പേരുകള് ഉള്പ്പെടുത്തിയിട്ടില്ല. ഉമ്മന്ചാണ്ടിയുടെ ശക്തമായ സമ്മര്ദ്ദമുണ്ടെങ്കിലും കെ.സി ജോസഫിന് സീറ്റുണ്ടാകില്ലെന്ന് ഏറെക്കുറെ ഉറപ്പായി.
തൃപ്പൂണിത്തുറയില് കെ.ബാബുവിനെച്ചൊല്ലി സ്ക്രീനിംഗ് കമ്മിറ്റി യോഗത്തില് തര്ക്കം. ബാബുവിനെ മത്സരിപ്പിക്കണമെന്ന് ഉമ്മന്ചാണ്ടി കടുത്ത നിലപാടെടുത്തപ്പോള് വലിയ വില നല്കേണ്ടിവരുമെന്ന് ഐ ഗ്രൂപ്പ് വാദിച്ചു. ബാബു ഇല്ലെങ്കില് കൊച്ചി മുന് മേയര് സൗമിനി ജെയിനിന് നറുക്കു വീണേക്കും. ബാബുവിനെ മത്സരിപ്പിച്ചാല് ജോസഫ് വാഴക്കനും സീറ്റുണ്ടാകും. മാത്യു കുഴല്നാടനെ ചാലക്കുടിയിലേക്കു മാറ്റി കാഞ്ഞിരപ്പള്ളി വാഴക്കനു നല്കിയേക്കും. അതേസമയം കെ.സി വേണുഗോപാലിന്റെ നോമിനികള്ക്കും പട്ടികയില് കാര്യമായ പ്രധാന്യം ലഭിച്ചെന്നാണ് സൂചന. ഉമ്മന് ചാണ്ടിയും രമേശ് ചെന്നിത്തലയും നിര്ദ്ദേശിച്ച പല പേരുകളോടും ഹൈക്കമാന്ഡ് വിയോജിച്ചതിനു പിന്നില് വേണുഗോപാലാണെന്നാണ് ആക്ഷേപം. എന്തായാലും നേമം ഒരു വലിയ കടമ്പയായിരിക്കും കോണ്ഗ്രസിനും.
https://www.facebook.com/Malayalivartha
