ഭാര്യയെ തലയ്ക്കടിച്ച് കൊലപ്പെടുത്തിയ ശേഷം ഭര്‍ത്താവ് തൂങ്ങിമരിച്ചു. കോഴിക്കോട്‌ അത്തോളി കൊടക്കല്ലില്‍ കൃഷ്ണനാണ് (59) ഉറങ്ങുകയായിരുന്ന ഭാര്യ ശോഭനയെ (50) മരത്തടി കൊണ്ടടിച്ചു കൊലപ്പെടുത്തിയശേഷം തൂങ്ങിമരിച്ചത്.രാത്രി 12 മണിയോടെയാണു സംഭവം.

കൊലയ്ക്ക് ശേഷം വീട് വിട്ടിറങ്ങിയ കൃഷ്ണനെ നാട്ടുകാരും പോലീസും അന്വേഷിച്ചെങ്കിലും രാവിലെ തറവാട് വീടിന് സമീപത്തെ മരത്തില്‍ തൂങ്ങി മരിച്ച നിലയിലാണ് കണ്ടെത്തിയത്. സംഭവസമയം വീട്ടില്‍ മറ്റാരും ഉണ്ടായിരുന്നില്ല.


നിലവിളി കേട്ട് അയല്‍വാസികള്‍ എത്തുമ്‌ബോഴേക്ക് കൃഷ്ണന്‍ രക്ഷപ്പെട്ടിരുന്നു.കുടുംബപ്രശ്‌നമാണ് കൊലയിലേക്ക് നയിച്ചതെന്ന് പോലീസും നാട്ടുകാരും പറയുന്നു. വടകര റൂറല്‍ എസ്.പിയുടെ നിര്‍ദേശപ്രകാരം ഫൊറന്‍സിക് ഫിംഗര്‍ പ്രിന്റ് സംഘങ്ങള്‍ പരിശോധന നടത്തി.


കൂരാച്ചുണ്ട് ഇന്‍സ്‌പെക്ടര്‍ അനില്‍ കുമാറിന്റെ നിര്‍ദേശ പ്രകാരം അത്തോളി എസ്.ഐ: ബാലചന്ദ്രന്റെ നേതൃത്വത്തില്‍ ഇന്‍ക്വസ്റ്റ് പൂര്‍ത്തിയാക്കി. രണ്ടുപേരുടേയും മൃതദേഹങ്ങള്‍ പോസ്റ്റ്‌മോര്‍ട്ടത്തിനായി കോഴിക്കോട് മെഡിക്കല്‍ കോളജിലേക്ക് മാറ്റി. എരഞ്ഞിക്കല്‍ സ്വദേശിയാണ് ശോഭന. മക്കള്‍: രമ്യ (കൂത്താളി), ധന്യ (ചേളന്നൂര്‍).

കൊല്ലപ്പെട്ട ശോഭ കൃഷ്ണന്‍ ദമ്പതികള്‍ക്ക് രണ്ട് പെണ്‍മക്കളാണ് ഉണ്ടായിരുന്നത്. ഇരുവരുടെയും വിവാഹം കഴിഞ്ഞതിനാല്‍ വീട്ടില്‍ ദമ്പതികള്‍ തനിച്ചായിരുന്നു താമസം.

അതേസമയം കഴിഞ്ഞ മാസം കാസര്‍കോടു നിന്നും സമാനമായ ഒരു സംഭവം റിപ്പോര്‍ട്ട് ചെയ്യപ്പെട്ടിരുന്നു. കുടുംബ വഴക്കിനെ തുടര്‍ന്ന് ഭര്‍ത്താവ് ഭാര്യയെ വെടിവച്ചു കൊലപ്പെടുത്തുകയായിരുന്നു. കാസര്‍കോട് കാനത്തൂര്‍ വടക്കേക്കരയിലാണ് സംഭവം. വടക്കേക്കര സ്വദേശി വിജയനാണ് ഭാര്യ ബേബി(35)യെ വെടിവെച്ച് കൊലപ്പെടുത്തിയ ശേഷം തൂങ്ങിമരിച്ചത്.തലയ്ക്കു വെടിയേറ്റ ബേബിയെ വീടിന്റെ സ്വീകരണമുറിയില്‍ലാണ് മരിച്ച നിലയില്‍ കണ്ടെത്തിയത്.

ഭര്‍ത്താവ് വിജയനെ പിന്നീട് തൂങ്ങിമരിച്ച നിലയില്‍ കണ്ടെത്തുകയായിരുന്നു. ഇയാളുടെ കൈവശമുണ്ടായിരുന്ന നാടന്‍തോക്ക് ഉപയോഗിച്ചാണ് കൃത്യം നടത്തിയത്. കുടുംബവഴക്കാണ് കൊലപാതകത്തിനും ആത്മഹത്യയ്ക്കും കാരണമായത്. വഴക്കിനെ തുടര്‍ന്നു വെടിയൊച്ച കേട്ടതോടെ അയല്‍വാസികള്‍ പൊലീസില്‍ അറിയിക്കുകയായിരുന്നു.