മലപ്പുറം കത്തി, മെഷീന്‍ ഗണ്ണ്, ഉലക്കേര മൂട് എന്നതുപോലെയായിരുന്നു നേമം പോയ പോക്ക്. നേമത്തെ ദേശീയ ശ്രദ്ധയിലെത്തിച്ച ശേഷം നേതാക്കള്‍ വിട്ടുകളയുകയായിരുന്നു.

കഴിഞ്ഞ നിയമസഭാ തിരഞ്ഞെടുപ്പില്‍ വെറും 13,860 വോട്ടുകള്‍ മാത്രം ലഭിച്ച കോണ്‍ഗ്രസ് എങ്ങനെ ജയിക്കാനാ. ഉമ്മന്‍ ചാണ്ടി മത്സരിച്ചാല്‍ എന്തിന് കമ്മ്യൂണിസ്റ്റുകാര്‍ വരെ ബിജെപിക്ക് വോട്ട് ചെയ്ത് തോല്‍പ്പിക്കും.

അതേസമയം കെ. സുരേന്ദ്രന്റേ വെല്ലുവിളിയും നേതാക്കളെ പിന്നോട്ട് വലിച്ചു. ബിജെപിയുടെ ജയിക്കാവുന്ന സീറ്റില്‍ തോല്‍പ്പിച്ചാല്‍ യുഡിഎഫിലേയും എല്‍ഡിഎഫിലേയും നേതാക്കളെ തെരഞ്ഞ് പിടിച്ച് തോല്‍പ്പിക്കുമെന്നാണ് കെ. സുരേന്ദ്രന്‍ പറഞ്ഞത്.

അങ്ങനെ വന്നാല്‍ മുഖ്യമന്ത്രി പദം സ്വപ്നം കണ്ട സകലരും തോല്‍ക്കും. പിന്നെ കോണ്‍ഗ്രസിന്റെ കാര്യം പറയേണ്ടല്ലോ. അതോടെ ഉമ്മന്‍ചാണ്ടിയോ രമേശ് ചെന്നിത്തലയോ ശശി തരൂരോ കെ. മുരളീധരനോ മത്സരിക്കാനില്ല എന്ന വിവരമാണ് വരുന്നത്. വേണമെങ്കില്‍ ജഗതി പറയുന്നതു പോലെ ശശി, പാലാരിവട്ടം ശശി വരും.

മുഖ്യമന്ത്രിയുടെ മണ്ഡലമായ ധര്‍മ്മടത്ത് മത്സരിക്കാമോ എന്ന് ഫോര്‍വേഡ് ബ്ലോക്ക് അഖിലേന്ത്യാ ജനറല്‍ സെക്രട്ടറി ജി. ദേവരാജനോട് കോണ്‍ഗ്രസ് ചോദിച്ചിട്ടുണ്ട്.

പക്ഷേ, ബംഗാളില്‍ ഫോര്‍വേഡ് ബ്‌ളോക്ക് ഇടതു മുന്നണിയിലുള്ളതിനാല്‍, പിണറായി വിജയനെതിരെ ദേവരാജനെ മത്സരിപ്പിക്കാന്‍ അവര്‍ തയ്യാറാകില്ല. ധര്‍മ്മടം ഫോര്‍വേഡ് ബ്ലോക്കിന് വേണ്ടെങ്കില്‍ അതുകൂടി കോണ്‍ഗ്രസ് ഏറ്റെടുക്കും. വടകരയില്‍ ആര്‍.എം.പി നേതാവ് കെ.കെ. രമ മത്സരിക്കുന്നെങ്കില്‍ യു.ഡി.എഫ് പിന്തുണയ്ക്കും.

തര്‍ക്കത്തിലെ പത്ത് കോണ്‍ഗ്രസ് സ്ഥാനാര്‍ത്ഥി നിര്‍ണയത്തില്‍ തര്‍ക്കം നിലനില്‍ക്കുന്ന പത്തു മണ്ഡലങ്ങള്‍ നേമം, കൊല്ലം, കുണ്ടറ, തൃപ്പൂണിത്തുറ, കല്‍പ്പറ്റ, നിലമ്പൂര്‍, തവനൂര്‍, ആറന്മുള, കാഞ്ഞിരപ്പള്ളി, പട്ടാമ്പി എന്നിവയാണെന്നാണ് നേതൃത്വം നല്‍കുന്ന സൂചന. ഇതിനു പുറമെ കഴക്കൂട്ടം, വട്ടിയൂര്‍ക്കാവ് മണ്ഡലങ്ങളുടെ കാര്യത്തിലും ആശയക്കുഴപ്പമുണ്ട്.

ഉമ്മന്‍ചാണ്ടി, രമേശ് ചെന്നിത്തല, കെ.സി വേണുഗോപാല്‍, ശശിതരൂര്‍ തുടങ്ങി ആരെ ഇറക്കിയാലും പണിയെടുക്കാതെ നേമത്ത് കോണ്‍ഗ്രസിന് വിജയിക്കാനാകില്ലയെന്നതാണ് യാഥാര്‍ത്ഥ്യം. സിംഹത്തെ അതിന്റെ മടയില്‍ പോയി നേരിടുന്ന ശൈലിയാണ് നേമത്ത് കരുത്തനെ രംഗത്തിറക്കുന്നത് വഴി കോണ്‍ഗ്രസ് പദ്ധതിയിടുന്നത്.

കഴിഞ്ഞ രണ്ട് നിയമസഭാ തിരഞ്ഞെടുപ്പിലും ഘടകക്ഷിക്ക് സീറ്റ് നല്‍കി ബി.ജെ.പികോണ്‍ഗ്രസ് രഹസ്യബാന്ധവമെന്ന പേരാണ് പാര്‍ട്ടി സമ്പാദിച്ചത്. അത് മാറ്റിയെടുത്ത് ബി.ജെ.പിയുടെ തേരോട്ടം മുളയിലെ നുളളുകയെന്നതാണ് നേമത്ത് സ്ഥാനാര്‍ത്ഥി നിര്‍ണയത്തിലെ സസ്‌പെന്‍സ് നീളുന്നതിലെ പ്രധാന കാരണം.

ബൂത്ത് കമ്മിറ്റികള്‍ പോലുമില്ലാത്ത നേമത്ത് ജയിച്ചുകയറുകയെന്നത് കോണ്‍ഗ്രസിന് എളുപ്പമല്ല. ചുരുക്കം കമ്മിറ്റികള്‍ ഒഴിച്ച് ഒട്ടുമിക്ക വാര്‍ഡ് കമ്മിറ്റികള്‍ പോലും കാര്യക്ഷമമല്ല. കഴിഞ്ഞ ബൂത്ത് പുന:സംഘടനയില്‍ എക്‌സിക്യൂട്ടീവ് അംഗങ്ങളെ തികയ്ക്കാന്‍പ്പെട്ട പാട് കോണ്‍ഗ്രസിലെ പ്രാദേശിക നേതാക്കള്‍ക്കേ അറിയാവൂ. മണ്ഡലത്തിലെ ഭൂരിപക്ഷം പ്രാദേശിക നേതാക്കള്‍ക്കും പ്രവര്‍ത്തകരുമായും വോട്ടര്‍മാരുമായും അടുത്ത ബന്ധം പോലുമില്ല.

തദ്ദേശ തിരഞ്ഞെടുപ്പിലടക്കം നേമം സീറ്റ് ലക്ഷ്യമിട്ട് മണ്ഡലത്തില്‍ മുന്നണിയെ മുന്നില്‍ നിന്ന് നയിച്ച വിജയന്‍ തോമസ് ഇപ്പോള്‍ കോണ്‍ഗ്രസിന് അകത്താണോ പുറത്താണോയെന്ന് പാര്‍ട്ടിക്കാര്‍ക്ക് പോലും നിശ്ചയമില്ല. മണ്ഡലത്തിലെ പരമ്പരഗത കോണ്‍ഗ്രസ് കുടുംബങ്ങളില്‍ ഭൂരിപക്ഷവും ഇന്ന് ബി.ജെ.പിയിലാണ്.

തദ്ദേശ തിരഞ്ഞെടുപ്പില്‍ മണ്ഡലത്തിലെ 21 വാര്‍ഡുകളില്‍ ഒന്നുപോലും നേടാന്‍ കോണ്‍ഗ്രസിനായിട്ടില്ല. പലയിടത്തും മൂന്നാം സ്ഥാനത്തേക്ക് ബഹുദൂരം വോട്ടുകളുടെ വ്യത്യാസത്തിലാണ് പിന്തളളപ്പെട്ടത്. കഴിഞ്ഞ നിയമസഭാ തിരഞ്ഞെടുപ്പില്‍ വെറും 13860 വോട്ടുകള്‍ മാത്രമായിരുന്നു യു ഡി എഫ് സ്ഥാനാര്‍ത്ഥിക്ക് കിട്ടിയത്. 2019ലെ ലോക്‌സഭാ തിരഞ്ഞെടുപ്പില്‍ ശശിതരൂര്‍ പിന്നില്‍ പോയ ഏക മണ്ഡലവും നേമമാണ്. തരൂര്‍ വന്‍ജയം നേടിയപ്പോള്‍ പോലും നേമത്ത് ബി ജെ പിയേക്കാള്‍ പന്ത്രണ്ടായിരം വോട്ടിന് പിന്നിലായിരുന്നു കോണ്‍ഗ്രസ്. 2014ല്‍ ഇത് പതിനെണ്ണായിരമായിരുന്നു.