നേമം ചര്‍ച്ച ചെയ്ത് ചര്‍ച്ച ചെയ്ത് കോണ്‍ഗ്രസ് നേതാക്കള്‍ വലിയ സംഭവമാക്കി മാറ്റിയിരിക്കുകയാണ്. ഇനി നല്ല സ്ഥാനാര്‍ത്ഥിയെ നിര്‍ത്തിയില്ലെങ്കിലും തോറ്റാലും വലിയ സംഭവമായി മാറും. നേമത്ത് മത്സരിക്കാന്‍ ഉമ്മന്‍ചാണ്ടിയും രമേശ് ചെന്നിത്തലയും തയ്യാറായില്ലെന്ന് മാത്രമല്ല മുന്നോട്ട് വന്ന കെ. മുരളീധരനെ ഒഴിവാക്കുകയും ചെയ്തു.

നിയമസഭാ തിരഞ്ഞെടുപ്പില്‍ കെ. മുരളീധരന്‍ എം.പി മത്സരിക്കുമെന്ന അഭ്യൂഹങ്ങള്‍ക്ക് വിരാമമായി. എം.പിമാര്‍ മത്സരിക്കില്ലെന്ന് കെ.പി.സി.സി അദ്ധ്യക്ഷന്‍ മുല്ലപ്പളളി രാമചന്ദ്രന്‍ വ്യക്തമാക്കിയതോടെ മുരളീധരന്‍ മത്സരിക്കില്ലെന്നകാര്യം ഏകദേശം ഉറപ്പായി. സ്ഥാനാര്‍ത്ഥി നിര്‍ണയവുമായി ബന്ധപ്പെട്ട് ഡല്‍ഹിയില്‍ എ.ഐ.സി.സി നേതൃത്വവുമായി നടത്തിയ ചര്‍ച്ചകള്‍ക്ക് ശേഷം മാദ്ധ്യമങ്ങളോട് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.

കോണ്‍ഗ്രസ് സ്ഥാനാര്‍ത്ഥി നിര്‍ണയത്തിന്റെ ആദ്യഘട്ടത്തില്‍ തന്നെ മുരളീധരന്‍ മത്സരിക്കാന്‍ സന്നദ്ധത അറിയിച്ചിരുന്നു.

എം.പിമാര്‍ മത്സരിക്കേണ്ടതില്ലെന്ന നിലപാടിലേക്ക് ഹൈക്കമാന്റും സംസ്ഥാന നേതൃത്വവും പോയെങ്കിലും ചില നിര്‍ണായക മണ്ഡലങ്ങളില്‍ കരുത്തരായ സ്ഥാനാര്‍ത്ഥികള്‍ വേണമെന്ന കേന്ദ്ര നേതൃത്വത്തിന്റെ തീരുമാനം അദ്ദേഹം മത്സരിക്കുമെന്ന അഭ്യൂഹങ്ങള്‍ക്ക് ശക്തിപകര്‍ന്നു. എന്നാല്‍ അഭ്യൂഹങ്ങള്‍ക്കും പ്രതീക്ഷകള്‍ക്കും വിരാമമിട്ടുകൊണ്ട് കെ.പി.സി.സി അദ്ധ്യക്ഷന്‍ എം.പിമാര്‍ മത്സരിക്കേണ്ടതില്ലെന്ന തീരുമാനം പരസ്യമാക്കുകയായിരുന്നു.

ഏറ്റവും ശക്തമായ മത്സരം നടക്കുന്ന നേമം മണ്ഡലത്തില്‍ ഏറ്റവും സാദ്ധ്യത കല്‍പിച്ചിരുന്ന നേതാവായിരുന്നു മുരളീധരന്‍. ഏറ്റവും ശക്തമായ സ്ഥാനാര്‍ത്ഥിയെ ആകും ഇവിടെ മത്സരിപ്പിക്കുകയെന്ന് കോണ്‍ഗ്രസ് നേതൃത്വവും വ്യക്തമാക്കിയിരുന്നു.

നേമത്തെ സ്ഥാനാര്‍ത്ഥി ആരെന്ന കാര്യത്തില്‍ തുടക്കം മുതല്‍ ആകാംക്ഷ നിലനിര്‍ത്താന്‍ കോണ്‍ഗ്രസ് ശ്രമിക്കുന്നുമുണ്ട്. മുരളീധരന്‍ മത്സരിക്കില്ലെന്ന കാര്യം ഉറപ്പായതോടെ കോണ്‍ഗ്രസ് നേമത്തിനു വേണ്ടി കണ്ടുവെച്ചിരിക്കുന്ന സ്ഥാനാര്‍ത്ഥിയാരെന്ന കാത്തിരിപ്പിലാണ് രാഷ്ട്രീയ കേരളം.

സ്ഥാനാര്‍ത്ഥി നിര്‍ണയ ചര്‍ച്ചകള്‍ ഡല്‍ഹിയില്‍ പുരോഗമിക്കുമ്പോള്‍ നേമത്തെ സ്ഥാനാര്‍ത്ഥിത്വം കോണ്‍ഗ്രസിനെ കുഴയ്ക്കുന്ന പ്രശ്‌നമായി മാറിയിരിക്കുകയാണ്.

ഉമ്മന്‍ചാണ്ടി തൊട്ട് കെ. മുരളീധരനിലും ശശി തരൂരിലും വരെ എത്തിനിന്ന അഭ്യൂഹ പ്രചാരണങ്ങള്‍ക്കൊടുവിലാണ് നേമം ഉള്‍പ്പെടെ പത്ത് മണ്ഡലങ്ങളിലെ സ്ഥാനാര്‍ത്ഥികളെ ഇന്ന് തീരുമാനിക്കുമെന്ന് ഇന്നലെ രാത്രിയില്‍ നേതാക്കള്‍ വ്യക്തമാക്കിയത്. സംസ്ഥാനത്ത് ത്രികോണമത്സരം ശക്തമാകുന്ന മണ്ഡലങ്ങളിലേറ്റവും പ്രധാനമാണ് നേമം.

രണ്ട് ദിവസം മുമ്പാണ് നേമത്തെ കോണ്‍ഗ്രസ് സ്ഥാനാര്‍ത്ഥിയെ ചൊല്ലിയുള്ള ചര്‍ച്ചകള്‍ മുറുകിയത്. തുടക്കത്തില്‍ സാദ്ധ്യതാപട്ടികയില്‍ കേരളത്തില്‍ നിന്ന് പ്രചരിച്ചത് മുന്‍ സ്പീക്കര്‍ എന്‍. ശക്തന്റേതടക്കം ചില പേരുകളായിരുന്നു.

എന്നാല്‍ നേമത്ത് ഇത്തവണ ശക്തനായ സ്ഥാനാര്‍ത്ഥിയെ ഇറക്കുമെന്ന് ഡല്‍ഹിയില്‍ നിന്ന് പ്രഖ്യാപനമെത്തിയതോടെ എല്ലാ കണ്ണുകളും നേമത്തേക്കായി. ആദ്യം കെ. മുരളീധരന്റെ പേരാണ് ഉയര്‍ന്നത്. നേമത്ത് മത്സരിക്കാന്‍ തയാറെന്ന മുരളീധരന്റെ പ്രഖ്യാപനത്തോടെ, ചര്‍ച്ച മുരളീധരനെ കേന്ദ്രീകരിച്ചായി. എംപിമാര്‍ക്ക് ഇളവ് നല്‍കേണ്ടെന്ന തീരുമാനം മുരളീധരന് വേണ്ടി മാത്രമായി മാറ്റുമെന്ന അഭ്യൂഹമുയര്‍ന്നു.

എന്നാല്‍, എം.പിമാര്‍ മത്സരിക്കേണ്ടെന്ന തീരുമാനം മാറില്ലെന്ന് സംസ്ഥാന നേതാക്കള്‍ പ്രഖ്യാപിച്ചതോടെ മുരളിയെ ചുറ്റിപ്പറ്റിയുയര്‍ന്ന അഭ്യൂഹത്തിന് താത്കാലികവിരാമമായി. അടുത്ത ദിവസം മുന്‍ മുഖ്യമന്ത്രി ഉമ്മന്‍ ചാണ്ടിയുടെ പേരാണ് ഉയര്‍ന്നത്.

അദ്ദേഹം പുതുപ്പള്ളിയില്‍ നിന്ന് മാറി നേമത്ത് മത്സരിക്കാന്‍ ഹൈക്കമാന്‍ഡിനോട് സമ്മതിച്ചുവെന്നായി പ്രചാരണം. വൈകിട്ട് അദ്ദേഹം വാര്‍ത്ത നിഷേധിച്ചെങ്കിലും അഭ്യൂഹം അവസാനിച്ചില്ല. ഇന്നലെ രാവിലെ താന്‍ പുതുപ്പള്ളി വിട്ട് എവിടെയുമുണ്ടാകില്ലെന്ന് നിലപാട് വ്യക്തമാക്കിയതോടെ ചര്‍ച്ച വീണ്ടും വഴിമാറി.

നേമത്ത് മത്സരിക്കുന്നയാള്‍ മുഖ്യമന്ത്രിസ്ഥാനാര്‍ത്ഥിയാകുമെന്ന് ഹൈക്കമാന്‍ഡ് അറിയിച്ചെന്നും ഉമ്മന്‍ ചാണ്ടിയും രമേശ് ചെന്നിത്തലയും ഒരുപോലെ നേമത്തേക്ക് സന്നദ്ധത അറിയിച്ചെന്നുമൊക്കെയുള്ള പ്രചാരണങ്ങള്‍ ഡല്‍ഹിയില്‍ നിന്നുണ്ടായി. തിരുവനന്തപുരം എം.പി ശശി തരൂരിനെ നേമത്ത് മത്സരിപ്പിച്ച് കരുത്ത് കാട്ടാനൊരുങ്ങുന്നുവെന്ന വാര്‍ത്തയും പിന്നാലെയെത്തി. ഇതോടെ ചര്‍ച്ചകള്‍ തരൂരിനെ കേന്ദ്രീകരിച്ചായി. പക്ഷെ ഒന്നും നടന്നില്ലെന്നു മാത്രം.