ചില ദുരന്തങ്ങള്‍ മനുഷ്യരാശിയെ വലിയ പാഠങ്ങള്‍ പഠിപ്പിച്ചിട്ടുണ്ട്. മരണസംഖ്യ എത്ര തന്നെ ആയാലും മനുഷ്യരെ മാറി ചിന്തിക്കാന്‍ പ്രേരിപ്പിച്ചിട്ടുണ്ട്. അത്തരം ചില ദുരന്തങ്ങളെ കുറിച്ച് അറിയാം... പലതും ഉറക്കം കെടുത്തും,  ചിലത് കരയിക്കും... മറ്റ് ചിലത് അനുഭവപാഠങ്ങളാകും.

2010 ലെ ഹെയ്തി ഭൂമികുലുക്കം ഇന്നും ലോകത്തിന് നടുക്കുന്ന ഓര്‍മയാണ്. 7.0 സ്‌കെയില്‍ ഭൂചലനത്തില്‍ 220,000 ല്‍ അധികം ആളുകള്‍ കൊല്ലപ്പെട്ടു, ഭൂകമ്പം അന്താരാഷ്ട്ര സഹായങ്ങളിലെ പിഴവുകളും വെളിപ്പെടുത്തി. മെഡിക്കല്‍ ടീമുകളെ നിശ്ചയിക്കാനും അവയുടെ അംഗീകാരത്തിനുമായി ലോകാരോഗ്യ സംഘടന പുതിയ നടപടിക്രമങ്ങള്‍ വരെ വികസിപ്പിച്ചത് ഈ ദുരന്തത്തിന് ശേഷമാണ്.

ഹെയ്തില്‍ നിന്നും തഹോകുവിലേയ്ക്ക് പോകുമ്പോള്‍ തഹോകു ഭൂചലനം, സുനാമി, ഫുകുഷിമ ഡൈചി ന്യൂക്ലിയര്‍ ദുരന്തം എന്നിവ 2011നെ പിടിച്ചുകുലിക്കിയത് ചില്ലറക്കൊന്നുമല്ല. 9.0 സ്‌കെയില്‍ ഭൂചലനത്തില്‍ 20,000 പേര്‍ കൊല്ലപ്പെട്ടു

1986 ലെ ചെര്‍ണോബില്‍ ദുരന്തത്തെ പോലെ ഫുകുഷിമ ഡൈചി വൈദ്യുത നിലയത്തില്‍ നിന്ന് വലിയ തോതില്‍ റേഡിയോ ആക്ടീവ് വസ്തുക്കള്‍ ചോര്‍ന്നു. ആ ദുരന്തത്തിന്റെ ആഘാതം ഇന്നും നടക്കുന്ന ഓര്‍മയാണ് ലോകത്തിന്.

2012ലെ സാന്‍ഡി ചുഴലിക്കാറ്റ് കാറ്റുകളുടെ താണ്ഡവത്തെ ജനത എത്രത്തോളം പേടിക്കുന്നു എന്ന് അടയാളപ്പെടുത്തുകയാണ് യുണൈറ്റഡ് സ്റ്റേറ്റ്‌സില്‍ മാത്രം നൂറിലധികം ആളുകള്‍ മരിച്ചു.. അന്ന് വരെ സുരക്ഷിതരെന്ന് കരുതി ജീവിച്ചിരുന്ന അമേരിക്കന്‍ ജനതയുടെ കണ്ണ് തുറപ്പിച്ച പ്രകൃതി ദുരന്തം ആയിരുന്നു ഇത്.

2013 ല്‍ ഹയാന്‍ ടൈഫൂണ്‍ ആണ് വിറപ്പിച്ചത് ലോകത്തെയാകെ. മണിക്കൂറില്‍ 200 മൈല്‍ വേഗതയില്‍ വന്ന ഈ കാറ്റഗറി 5 സൂപ്പര്‍ ടൈഫൂണ്‍'' ഫിലിപ്പീന്‍സിനെ തകര്‍ത്തു. കൊടുങ്കാറ്റില്‍ ഏകദേശം 7,000 പേര്‍ കൊല്ലപ്പെടുകയും 4 ദശലക്ഷത്തിലധികം പേര്‍ക്ക് വീട് നഷ്ടപ്പെടുകയും ചെയ്തു.

2014 മുതല്‍ 2016 വരെ ലോകത്തെ മുള്മുനയില്‍ നിര്‍ത്തിയ വെസ്റ്റ് ആഫ്രിക്കയിലെ ഇബോള വ്യാപനം. രോഗം ഗ്വിനിയയില്‍ നിന്ന് തുടങ്ങി സിയറ ലിയോണിലേക്കും ലൈബീരിയയിലേക്കും വ്യാപിച്ചു. രണ്ടുവര്‍ഷത്തിനിടെ ഇബോള രോഗം മൂലം 11,000 ത്തിലധികം ആളുകള്‍ മരിച്ചു. അമേരിക്കയിലും യൂറോപ്പിലും എബോള കേസുകള്‍ റിപ്പോര്‍ട്ട് ചെയ്തു.

2015 ലെ നേപ്പാള്‍ ഭൂചലനം വലിയ വെല്ലുവിളിയാണ് നേപ്പാള്‍ എന്ന രാജ്യത്തിനാകഎ നല്‍കിയത്. 7.8 സ്‌കെയില്‍ ഭൂചലനത്തില്‍ 9000 പേര്‍ കൊല്ലപ്പെട്ടു. ഭൂകമ്പം രാജ്യത്തിന്റെ പല ഭാഗങ്ങളിലും വീടുകള്‍ നശിപ്പിക്കുകയും തലസ്ഥാനമായ കാഠ്മണ്ഡുവിലെ ഉയരമുള്ള കെട്ടിടങ്ങള്‍ തകര്‍ക്കുകയും ചെയ്തു.

ഹാര്‍വി ചുഴലിക്കാറ്റ് 2017 ലാണ് സംഹാര താണ്ഡവമാടിയത്. മണിക്കൂറില്‍ 130 മൈല്‍ വേഗത കൈവരിച്ച കാറ്റഗറി 4 കൊടുങ്കാറ്റായിരുന്നു ഹാര്‍വി. 88 പേര് അന്ന് മരിച്ചു, ആ ദുരന്തം ഒരു സത്യം വെളിപ്പെടുത്തി: വെള്ളപൊക്കമാണ്, കാറ്റല്ല, ഒരു ചുഴലിക്കാറ്റിന്റെ ഏറ്റവും അപകടകരമായ ഭാഗം. ഹാര്‍വി തെക്കന്‍ തീരത്തേക്ക് ട്രില്യണ്‍ കണക്കിന് ഗാലന്‍ മഴയാണ് കൊണ്ടുവന്നത്.

ഇനി മരിയയിലേയ്ക്ക്...2017 ല്‍ വിനാശകരമായ ആ കൊടുങ്കാറ്റ് ആദ്യം ഡൊമിനിക്കയിലും കാറ്റഗറി 5 ചുഴലിക്കാറ്റായി തുടര്‍ന്ന് പ്യൂര്‍ട്ടോ റിക്കോയിലും ഒരു കാറ്റഗറി 4 ആയി വീശിയപ്പോള്‍, ഇരു രാജ്യങ്ങളും ഇരുട്ടിലായി- പ്യൂര്‍ട്ടോ റിക്കോയിലെ ചില സ്ഥലങ്ങളില്‍ ഒരു വര്‍ഷം വരെ കറന്റ്റ് ഇല്ലായിരുന്നു.

ഇടായ് സൈക്ലോണ്‍ 2019 ലെ വെളളിയിടിയെന്നും പറയാം. കാറ്റഗറി 3 കൊടുങ്കാറ്റ് ദക്ഷിണാഫ്രിക്കയെ തകര്‍ത്തു, മൊസാംബിക്ക്, സിംബാബ്വെ, മലാവി എന്നിവിടങ്ങളില്‍ നാശം വിതച്ചു. 1,300 പേര്‍ കൊല്ലപ്പെട്ടു; കാര്‍ഷിക ഭൂമി ഉപ്പുവെള്ളത്തില്‍ നിറഞ്ഞു. എല്ലാ ദുരന്തങ്ങളോക്കാളും വന്‍ ആഘാതം ലോകത്തിനും പരിസ്ഥിതിക്കും സമ്മാനിച്ച 2020 ലെ കാട്ടുതീകള്‍ ഇന്നും വലിയ പേടി സ്വപ്‌നമാണ്.

ഓസ്ട്രേലിയയിലെ കാട്ടുതീ 3 ബില്യണ്‍ ജീവികളുടെ ആവാസവ്യവസ്ഥയെ ബാധിച്ചു. ഉക്രൈനിലെ ചെര്‍ണോബില്‍ പ്രദേശത്തും അമേരിക്കയിലെ കാലിഫോര്‍ണിയയിലെ വ്യാപകമായി കാട്ടുതീ പടര്‍ന്നു. ഇന്ത്യയിലെ ഉത്തരാഖണ്ഡിലും കാട്ടുതീ പടര്‍ന്നിരുന്നു. ഓരോ ദുരന്തങ്ങളും വലിയ ഓര്‍മപ്പെടുത്തലാണ്. പ്രകൃതിയുടേയും പരിസ്ഥിതിയുടേയും നിലനില്‍പില്ലാതെ മനുഷ്യനില്ല എന്ന ഓര്‍മപ്പെടുത്തല്‍.