ധനമന്ത്രി കെ.എം.മാണിയുള്‍പ്പെടെയുള്ള മന്ത്രിമാര്‍ക്കെതിരെ ഉയര്‍ന്ന വന്ന ബാര്‍ കോഴ ആരോപണം രാഷ്ട്രീയ കാപട്യമായിരുന്നുവെന്നു മുഖ്യമന്ത്രി ഉമ്മന്‍ ചാണ്ടി. ഇതുവരെയുള്ള സാഹചര്യങ്ങളില്‍ നിന്നാണ് ഇക്കാര്യം മനസിലാക്കുന്നതെന്നും ണമുഖ്യമന്ത്രി പറഞ്ഞു.
കേസുമായി ബന്ധപ്പെട്ട് 309 സാക്ഷികളെ വിസ്തരിച്ചു എന്നാല്‍ ആരും കെ.എം.മാണിക്കെതിരെ തെളിവു നല്‍കിയില്ല. പത്ര മാധ്യമങ്ങളിലൂടെയാണ് മാണിക്കെതിരെ ആരും തെളിവു നല്‍കിയിട്ടില്ലെന്നു മനസിലായത്. ബാര്‍ കോഴക്കേസ് തിരഞ്ഞെടുപ്പു വിഷയമായി ഉന്നയിക്കുകയാണെങ്കില്‍ അത് ഇടതുമുന്നണിക്കു തിരിച്ചടിയാകാതെയിരുന്നാല്‍ നല്ലതെന്നും അദ്ദേഹം പറഞ്ഞു.
നേരത്തെ, ബാര്‍ കോഴക്കേസിലെ വിജിലന്‍സ് അന്വേഷണത്തില്‍ ഇടപെട്ടില്ലെന്ന് ആഭ്യന്തരമന്ത്രി രമേശ് ചെന്നിത്തല പ്രതികരിച്ചിരുന്നു. വിജിലന്‍സ് അന്വേഷണ റിപ്പോര്‍ട്ടിന്റെ ഉള്ളടക്കം തനിക്ക് അറിയില്ല. ആക്ഷേപമുള്ളവര്‍ക്ക് കോടതിയില്‍ ചോദ്യം ചെയ്യാമെന്നും മന്ത്രി രമേശ് ചെന്നിത്തല ഇന്നലെ വ്യക്തമാക്കി.
എന്നാല്‍, ബാര്‍ കോഴ കേസില്‍ മന്ത്രി കെ.എം. മാണിക്കെതിരെ കുറ്റപത്രം സമര്‍പ്പിക്കാനുള്ള തെളിവില്ലെന്നു വിജിലന്‍സ് ഡയറക്ടര്‍ വിന്‍സണ്‍ എം. പോളിന് എഡിജിപി: ഷേയ്ക്ക് ദര്‍വേഷ് സാഹിബ് റിപ്പോര്‍ട്ട് നല്‍കിയ കാര്യം മുഖ്യമന്ത്രി സ്ഥിരീകരിക്കുന്നില്ല. പത്രദൃശ്യ മാധ്യമങ്ങളില്‍ വന്ന വാര്‍ത്തകളുടെ അടിസ്ഥാനത്തിലാണ് കേസിന്റെ വിശദാംശങ്ങള്‍ മനസിലാക്കിയതെന്നും മുഖ്യമന്ത്രി വ്യക്തമാക്കുന്നു.മാണിക്കെതിരെ കുറ്റപത്രത്തിനു മതിയായ തെളിവില്ലെന്ന വിജിലന്‍സ് നിയമോപദേഷ്ടാവ് സി.സി. അഗസ്റ്റിന്റെ നിയമോപദേശം എഡിജിപി ശരിവയ്ക്കുകയായിരുന്നു.
മതിയായ തെളിവുണ്ടെന്ന നിലയില്‍ അന്വേഷണ ഉദ്യോഗസ്ഥനായ എസ്പി ആര്‍. സുകേശന്‍ നല്‍കിയ റിപ്പോര്‍ട്ടിനോട് എഡിജിപി വിയോജിച്ചു. ഇനി ഇക്കാര്യത്തില്‍ വിജിലന്‍സ് ഡയറക്ടറാണ് അന്തിമ തീരുമാനം എടുക്കുക. അതിനു മുന്‍പായി വിജിലന്‍സ് അഡീഷനല്‍ ഡയറക്ടര്‍ (പ്രോസിക്യൂഷന്‍) ശശീന്ദ്രന്റെയും അഡ്വക്കറ്റ് ജനറലിന്റെയും നിയമോപദേശം ഡയറക്ടര്‍ തേടിയേക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha