വെറുക്കപ്പെട്ടവനായി ഒരു കാലത്ത് കോണ്‍ഗ്രസില്‍ നിന്നും പുറത്താക്കിയ കെ. കരുണാകരന്റെ മകന്‍ കെ. മുരളീധരന്‍ താരമായിരിക്കുകയാണ്.

തങ്ങളുടെ ജയസാധ്യതയുള്ള മണ്ഡലങ്ങളില്‍ തോല്‍പ്പിക്കാനിറങ്ങിയാല്‍ ആ നേതാക്കളെ തെരഞ്ഞ് പിടിച്ച് തോല്‍പ്പിക്കുമെന്ന കെ. സുരേന്ദ്രന്റെ വെല്ലുവിളിയാണ് കാര്യങ്ങള്‍ മാറി മറിഞ്ഞത്. പഴയ സുരേന്ദ്രനല്ല. പറഞ്ഞാല്‍ പറഞ്ഞതാണ്. കേരളം മൊത്തം ജയിച്ചിട്ട് തങ്ങള്‍ മാത്രം തോറ്റാല്‍ എന്തുണ്ടാകും.

അതോടെ കാര്യങ്ങള്‍ മാറി മറിഞ്ഞു. ഉമ്മന്‍ ചാണ്ടിയും അനുയായികളും പുരപ്പുറത്ത് കയറി സീനുണ്ടാക്കി. നേമത്ത് മത്സരിക്കുമെന്ന് പറഞ്ഞ രമേശ് ചെന്നിത്തലയെ കാണാതായതോടെ പുരപ്പുറത്ത് കയറാന്‍ അറിയാവുന്ന ആരുമില്ലെ എന്ന് പറഞ്ഞ് പഴയ ഉസ്മാനെ വിളിക്കുന്ന ട്രോളാണ് വന്നത്.

ഏതായാലും നേമത്ത് കെ. മുരളീധരന്‍ കോണ്‍ഗ്രസ് സ്ഥാനാര്‍ഥിയാകുമെന്ന് ഉറപ്പായി. ഇത് സംബന്ധിച്ച് ഹൈക്കമാന്‍ഡ് തീരുമാനമെടുത്തതായാണ് സൂചന . ഉമ്മന്‍ചാണ്ടി പുതുപ്പള്ളിയില്‍ തന്നെ മത്സരിക്കും. കെ മുരളീധരന്‍ ഡല്‍ഹിക്ക് തിരിച്ചു. ഇനി പൊങ്ങുക നേമത്തായിരിക്കും.

പാര്‍ട്ടി ആവശ്യപ്പെട്ടാല്‍ ഏത് വെല്ലുവിളിയും ഏറ്റെടുക്കുമെന്ന് കെ. മുരളീധരന്‍ എം.പി പറഞ്ഞു. മുഖ്യമന്ത്രി സ്ഥാനാര്‍ത്ഥിയാക്കിയാല്‍ മത്സരിക്കുമെന്ന് ഒരിക്കലും പറഞ്ഞിട്ടില്ല. അത്രയ്ക്ക് ചീപ്പല്ല ഞാന്‍. പ്രതിഫലത്തിന് വേണ്ടിയല്ല ജീവിക്കുന്നത്. കെ. കരുണാകരന്‍ തന്നെ പഠിപ്പിച്ചത് അതല്ല. ഇഴഞ്ഞുകയറിച്ചെന്ന് സീറ്റ് ചോദിക്കുന്ന ആളല്ല താന്‍. നേമത്ത് മത്സരിക്കാന്‍ തയ്യാറാണോ എന്ന് എ.ഐ.സി.സി അംഗങ്ങളോ ഉമ്മന്‍ചാണ്ടിയോ മുല്ലപ്പള്ളിയോ ചെന്നിത്തലയോ തന്നോട് ചോദിച്ചിട്ടില്ല. പിന്നെ എങ്ങനെയാണ് മത്സരിക്കാന്‍ താന്‍ സന്നദ്ധത അറിയിച്ചു എന്ന തരത്തില്‍ വാര്‍ത്ത വന്നതെന്ന് അറിയില്ല. എന്നാല്‍ പാര്‍ട്ടി ആവശ്യപ്പെട്ടാല്‍ നേമത്ത് മത്സരിക്കാം.

ഉമ്മന്‍ചാണ്ടിയുടെ പേര് നേമത്തേക്ക് വന്നതിന് പിന്നില്‍ സംഘടിതമായ ശ്രമങ്ങളുണ്ട്. ഉമ്മന്‍ചാണ്ടി പുതുപ്പള്ളിയില്‍ത്തന്നെ മത്സരിക്കണമെന്നാണ് ആഗ്രഹം. ഉമ്മന്‍ചാണ്ടി മാറിയാല്‍ പുതുപ്പള്ളിയില്‍ തിരിച്ചടിയുണ്ടാകും. നേമം കോണ്‍ഗ്രസ് ഏറ്റെടുത്ത ശേഷം ശക്തര്‍, ദുര്‍ബലര്‍ എന്ന വാദങ്ങളാണ് പ്രതിസന്ധി സൃഷ്ടിച്ചത്. കോണ്‍ഗ്രസ് സീറ്റ് ഏറ്റെടുത്തപ്പോള്‍ത്തന്നെ തര്‍ക്കങ്ങള്‍ അവസാനിക്കേണ്ടതായിരുന്നു.

കേന്ദ്രമന്ത്രിയാക്കും എന്ന് മോഹിച്ചിട്ടല്ല വടകരയില്‍ മത്സരിച്ചത്. കൂട്ടുകക്ഷി സര്‍ക്കാരുണ്ടാക്കി ഭരിച്ചാല്‍പോലും ആന്റണി, തരൂര്‍, കൊടിക്കുന്നില്‍ എന്നീ മുന്‍ മന്ത്രിമാരും ഘടകകക്ഷി നേതാക്കളുമുള്ളപ്പോള്‍ മന്ത്രിസ്ഥാനം കിട്ടില്ലെന്ന് എനിക്കുറപ്പാണ്. കോണ്‍ഗ്രസ് സ്ഥാനാര്‍ത്ഥി പ്രഖ്യാപനം നീട്ടേണ്ട കാര്യമില്ല. ഐശ്വര്യ കേരളയാത്രയുടെ ഐശ്വര്യം നേതൃത്വം കളയരുത്. സ്ഥിരമായി തോല്‍ക്കുന്ന സീറ്റുകളെങ്കിലും ഘടകകക്ഷികള്‍ക്ക് കൊടുക്കാന്‍ സമ്മതിച്ചില്ലെങ്കില്‍ എങ്ങനെയാണ് മുന്നോട്ട് പോവുകയെന്നും കെ. മുരളീധരന്‍ ചോദിച്ചു.

എരണംകെട്ടവന്‍ ഭരിച്ചാല്‍ ദോഷമാണെന്നാണ് പൊതുവേ പറയാറുള്ളതെന്ന് കെ. മുരളീധരന്‍ എം.പി പറഞ്ഞു. കൂത്തുപറമ്പിലെ യു.ഡി.എഫ് സ്ഥാനാര്‍ത്ഥി പൊട്ടങ്കണ്ടി അബ്ദുള്ളയുടെ തിരഞ്ഞെടുപ്പ് കണ്‍വെന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. അഞ്ചു വര്‍ഷത്തിനുള്ളില്‍ ഓണമോ പെരുന്നാളോ ക്രിസ്മസോ തൃശൂര്‍ പൂരമോ ആഘോഷിക്കാനായിട്ടില്ല. അഞ്ചുവര്‍ഷവും ദുരന്തത്തില്‍ നിന്ന് ദുരന്തത്തിലേക്കുള്ള യാത്രയാണ് കണ്ടത്. ഭരിക്കുന്നവര്‍ ദുഷ്ട പ്രവൃത്തി ചെയ്താല്‍ നാട്ടില്‍ ദുരന്തമുണ്ടാവും.

ആകാശവും ഭൂമിയും വിറ്റവര്‍ കേന്ദ്രവും കടല്‍ വിറ്റവര്‍ കേരളവും ഭരിക്കുകയാണ്. കിറ്റ് കൊടുത്താല്‍ എല്ലാ പാപവും തീരില്ല. പാവങ്ങളെ സഹായിക്കുന്ന കാരുണ്യ പദ്ധതി ഇല്ലാതാക്കുകയും എല്ലാം വിറ്റുതുലയ്ക്കുകയുമാണ് പിണറായി സര്‍ക്കാര്‍ ചെയ്തതെന്നും മുരളീധരന്‍ ആരോപിച്ചു. എന്തായാലും ഇനി മുരളീധരന്റെ ഒന്നൊന്നര വരവ് കാണാം.