പഴയ കിങ്ങിണിക്കുട്ടനല്ല... ഒരു നേമം കൊണ്ട് കേരളം ഭരിക്കാന് കഴിയില്ലെന്ന തിരിച്ചറിവ് വന്നതോടെ ഉമ്മന്ചാണ്ടിയും ചെന്നിത്തലയും കളം വിട്ടു; കിട്ടിയ അവസരം മുതലാക്കി വെല്ലുവിളി ഏറ്റെടുത്ത കെ. മുരളീധരന് താരമാകുമ്പോള് ചങ്കിടിക്കുന്നത് ചെന്നിത്തലയ്ക്ക്; മുരളീധരന് ജയിച്ചാല് ബാധ്യതയാകുമെന്നതിനാല് കളി തുടങ്ങി
വെറുതേ ഉറങ്ങിക്കിടന്ന നേമത്തെ തട്ടിയുണര്ത്തിയത് കെ. മുരളീധരന് വേണ്ടിയാണോ എന്ന ചോദ്യമാണ് ഉയരുന്നത്. ചെന്നിത്തലയും ഉമ്മന്ചാണ്ടിയും വെല്ലുവിളി ഏറ്റെടുക്കാതെ വന്നപ്പോള് ധൈര്യസമേതം മുന്നോട്ട് വന്ന കെ മുരളീധരന് താരമായിരിക്കുകയാണ്.
ഇതോടെ മുഖ്യമന്ത്രിപദം സ്വപ്നം കാണുന്ന ചെന്നിത്തലയ്ക്ക് കനത്ത തിരിച്ചടിയാണ് ഉണ്ടാകുന്നത്. മുരളീധരന് ജയിച്ച് വന്നാല് വലിയ വെല്ലുവിളിയാകും. അതിനാല് തന്നെ മുരളീധരനെ വാഴ്ത്തുന്നതിന് പകരം വീഴ്ത്താനായിരിക്കും ശ്രമിക്കുക.
ഒരു തിരഞ്ഞെടുപ്പു ഫലപ്രഖ്യാപന ദിനത്തിലെന്ന പോലെ ആകാംക്ഷയുടെ മുള്മുനയിലാണ് നേമം. യുഡിഎഫ്, ബിജെപി സ്ഥാനാര്ഥി പ്രഖ്യാപനത്തിനായി ഇന്നു കണ്ണൂം കാതു കൂര്പ്പിച്ചിരിക്കുന്നത് നേമത്തുള്ളവര് മാത്രമല്ല, കേരളമാകെയാണ്.
എല്ഡിഎഫിനായി വി. ശിവന്കുട്ടി സ്ഥാനാര്ഥി പ്രഖ്യാപനത്തിനു മുന്പേ കളത്തിലിറങ്ങിയിരുന്നു. ഏറെനാളായി നേമം നാടാക്കി മാറ്റിയ കുമ്മനം രാജശേഖരന് തന്നെ ബിജെപി സ്ഥാനാര്ഥിയാവുകയും യുഡിഎഫ് തുറുപ്പു ചീട്ടായി ഒരു വമ്പന് കൂടി എത്തുകയും ചെയ്താല് വലിയ പോരാട്ടമായി മാറും.
യുഡിഎഫില് ആരെന്നത് ഒരാഴ്ച മുന്പുവരെ വലിയ ചര്ച്ചാ വിഷയമായിരുന്നില്ല. കഴിഞ്ഞ 2 തവണയെന്ന പോലെ ഘടക കക്ഷികളിലാര്ക്കെങ്കിലുമാവും സീറ്റെന്നു കരുതിയവരാണ് ഏറെ.
പക്ഷേ, കോണ്ഗ്രസിന്റെ സ്ഥാനാര്ഥി ചര്ച്ചകള്ക്കിടെ ഉമ്മന് ചാണ്ടി നേമത്തേയ്ക്ക് എന്ന വാര്ത്ത വന്നതോടെ സ്ഥിതി മാറി. അങ്ങനെയെങ്കില് കുമ്മനം മണ്ഡലം മാറുമെന്ന അഭ്യൂഹവും പരന്നു. ഒടുവില് ഉമ്മന് ചാണ്ടി പുതുപ്പള്ളിയില്ത്തന്നെ തുടര്ന്നേക്കുമെന്ന സംസാരവുമെത്തി. സസ്പെന്സുകള്ക്കെല്ലാം ഇന്ന് ഉത്തരമാവും.
കോണ്ഗ്രസിന്റെ സംഘടന സംവിധാനം ദുര്ബലമാണിവിടെ. തദ്ദേശ തിരഞ്ഞെടുപ്പില് മണ്ഡലത്തിലെ ഒറ്റ ഡിവിഷനില് പോലും യുഡിഎഫ് ജയിച്ചില്ലെന്നു മാത്രമല്ല, ഭൂരിഭാഗം സ്ഥലങ്ങളിലും മൂന്നാം സ്ഥാനത്തുമാണ്. അങ്ങനെയൊരു സ്ഥലത്തു സംഘടനയെ ഉത്തേജിപ്പിക്കാനും സംഘടനാ ബലത്തിനപ്പുറം വോട്ട് പിടിക്കാനും കരുത്തന് തന്നെ വേണമെന്ന കാര്യത്തില് യുഡിഎഫിനു സംശയമില്ല.
ശക്തനായ സ്ഥാനാര്ഥി വന്ന് യുഡിഎഫ് വോട്ടുകള് ബിജെപിയിലേക്കു പോകാതെ പിടിച്ചാല് അത് ശിവന്കുട്ടിയുടെ വിജയം ഉറപ്പാക്കുമെന്ന് സിപിഎം പറയുന്നു. യുഡിഎഫ് തരംഗമുണ്ടായ ലോക്സഭ തിരഞ്ഞെടുപ്പിലും എല്ഡിഎഫിന് അനുകൂലമായ തദ്ദേശ തിരഞ്ഞെടുപ്പിലും ഒപ്പം നിന്ന നേമം ആരൊക്കെ വന്നാലും കൈവിടില്ലെന്നാണു ബിജെപിക്കാരുടെ വിശ്വാസം.
അതേസമയം അനിശ്ചിതത്വത്തിനും അഭ്യൂഹങ്ങള്ക്കുമൊടുവില്, നേമത്ത് കെ. മുരളീധരന് എംപി കോണ്ഗ്രസ് സ്ഥാനാര്ഥിയാകും. ഇക്കാര്യത്തില് കോണ്ഗ്രസ് ഹൈക്കമാന്ഡ് തീരുമാനമെടുത്തതായാണു വിവരം. മുരളീധരനെ ഡല്ഹിയിലേക്കു വിളിപ്പിച്ചു.
ഉമ്മന് ചാണ്ടി പുതുപ്പള്ളിയില്ത്തന്നെ മല്സരത്തിനിറങ്ങും. തൃപ്പൂണിത്തുറയില് കെ. ബാബുവും കൊല്ലത്ത് ബിന്ദു കൃഷ്ണയും കുണ്ടറയില് പി.സി. വിഷ്ണുനാഥും മല്സരിക്കുമെന്നും വിവരമുണ്ട്. ഞായറാഴ്ച ഇക്കാര്യത്തില് ഔദ്യോഗിക പ്രഖ്യാപനം ഉണ്ടാകും. പട്ടാമ്പി, നിലമ്പൂര് സീറ്റുകളില് ശനിയാഴ്ച രാത്രി വൈകിയും തീരുമാനമായില്ല. ഈ സീറ്റുകളില് ഒഴികെയുള്ള മണ്ഡലങ്ങളില് പ്രഖ്യാപനം ഞായര് രാവിലെ ഉണ്ടാകുമെന്നാണ് സൂചന.
നിയമസഭാ തിരഞ്ഞെടുപ്പില് എംപിമാര് മല്സരിക്കണമെങ്കില് ഹൈക്കമാന്ഡിന്റെ പ്രത്യേക അനുമതി വേണമെന്ന് നേരത്തെ നിര്ദ്ദേശം ഉയര്ന്നിരുന്നു. അഭിമാനപ്പോരാട്ടത്തിലൂടെ ബിജെപിയില് നിന്ന് നേമം പിടിച്ചെടുക്കാനുള്ള ശ്രമത്തില് മണ്ഡലത്തില് ശക്തനായ സ്ഥാനാര്ഥിയെ തന്നെ രംഗത്തിറക്കുമെന്ന് കോണ്ഗ്രസ് നേതൃത്വം നേരത്തെ അറിയിച്ചിരുന്നു. കെ. മുരളീധരനെ രംഗത്തിറക്കുന്നതിലൂടെ ബിജെപിക്കെതിരെ നേമത്തും ശക്തമായ പോരാട്ടത്തിനാണ് കോണ്ഗ്രസ് ഒരുങ്ങുന്നത്.
"
https://www.facebook.com/Malayalivartha