കോണ്‍ഗ്രസ് സ്ഥാനാര്‍ത്ഥി പട്ടികയിലെ തര്‍ക്കങ്ങള്‍ അവസാനിക്കുമ്പോള്‍ ഉമ്മന്‍ചാണ്ടി ഏറ്റവുമധികം കടപ്പെട്ടിരിക്കുന്നതും മുരളിയോട് തന്നെ. ഇനി ഉമ്മന്‍ ചാണ്ടിക്ക് പുതുപ്പള്ളിയില്‍ തന്നെ മത്സരിക്കാം.

മുരളീധരനെ ഹൈക്കമാന്‍ഡ് ദില്ലിക്ക് വിളിപ്പിച്ചിത് നേമത്ത് മത്സരിക്കണം എന്നാവശ്യപ്പെടാനാണ്. കൊല്ലത്ത് ബിന്ദുകൃഷ്ണയും തൃപ്പൂണിത്തുറയില്‍ കെ ബാബുവും സ്ഥാനാര്‍ത്ഥിത്വം ഉറപ്പിച്ചു. ഇരുവര്‍ക്കും സംസ്ഥാന നേതൃത്വത്തില്‍ നിന്ന് അറിയിപ്പ് ലഭിച്ചു. ഇതില്‍ കെ ബാബുവിന് സീറ്റുറപ്പിച്ച് നല്‍കിയത് ഉമ്മന്‍ ചാണ്ടിയാണ്. ബിന്ദുകൃഷ്ണക്ക് ചെന്നിത്തലയും.

എന്നാല്‍ വിഷ്ണുനാഥ് സ്ഥാനാര്‍ത്ഥിയാകുമെന്ന് കരുതിയിരുന്ന വട്ടിയൂര്‍ക്കാവില്‍ കെ പി അനില്‍കുമാര്‍ സ്ഥാനാര്‍ത്ഥിയാകും. പി സി വിഷ്ണുനാഥ് കുണ്ടറയിലേക്ക് മാറും.

അനില്‍കുമാറിന്റെ സാധ്യത കണ്ടറിയേണ്ടതുണ്ട്. ലത്തീന്‍ വിഭാഗത്തിന്റെ എതിര്‍പ്പിനിടയില്‍ വിഷ്ണുനാഥിന് കുണ്ടറയില്‍ ജയ സാധ്യതയുണ്ട്. ലത്തീന്‍ സഭ ആഴക്കടല്‍ മത്സ്യ ബന്ധന കരാറിന്റെ പേരില്‍ മേഴ്‌സിക്കുട്ടിയോട് എതിര്‍ത്ത് നില്‍ക്കുകയാണ്.

നിയമസഭാ തെരഞ്ഞെടുപ്പില്‍ എംപിമാര്‍ മത്സരിക്കേണ്ടതില്ലെന്നായിരുന്നു തുടക്കത്തില്‍ ഹൈക്കമാന്റ് തീരുമാനിച്ചിരുന്നതെങ്കിലും നേമം പിടിച്ചെടുക്കാന്‍ കരുത്തന്‍ തന്നെ വേണമെന്ന നിര്‍ബന്ധമാണ് ഒടുവില്‍ കെ മുരളീധരനെ തന്നെ മത്സരിപ്പിക്കാനുള്ള തീരുമാനത്തിന് പിന്നിലെ കാരണം . വെല്ലുവിളി ഏറ്റെടുത്ത് നേമത്ത് മത്സരിക്കാന്‍ തയ്യാറാണെന്ന് കെ മുരളീധരന്‍ ശനിയാഴ്ച മാധ്യമങ്ങളോട് പറഞ്ഞു .

തൃപ്പൂണിത്തുറയില്‍ മത്സരിക്കണമെന്ന കാര്യം അറിയിച്ചത് ഉമ്മന്‍ചാണ്ടിയും രമേശ് ചെന്നിത്തലയുമാണെന്ന് കെ ബാബു പറഞ്ഞു . ഉമ്മന്‍ചാണ്ടി ഉള്‍പ്പെടെയുള്ള നേതാക്കളുടെ ഇടപടലാണ് സ്ഥാനാര്‍ത്ഥിത്വത്തിന് ഇടയാക്കിയത്. മണ്ഡലത്തില്‍ അനുകൂല വികാരമാണ് ഉള്ളതെന്നും കെ ബാബു പറഞ്ഞു. പിണറായിയാണ് ബാബുവിനെ സഹായിച്ചത്. കെ.എം. മാണിയുടെ മരണത്തിന് വരെ കാരണമായ ബാര്‍ക്കോഴ ആരോപണത്തില്‍ പ്രതിയായിരുന്ന ബാബുവിനെ അടുത്ത കാലത്താണ് പിണറായി സര്‍ക്കാരിന്റെ വിജിലന്‍സ് ക്ലീന്‍ ചിറ്റ് നല്‍കിയത്.

സ്ഥാനാര്‍ത്ഥിത്വം സംബന്ധിച്ച് സംസ്ഥാന നേതൃത്വത്തില്‍ നിന്ന് അറിയിപ്പ് ലഭിച്ചെന്ന് കൊല്ലം ഡിഡിസി പ്രസിഡന്റ് ബിന്ദു കൃഷ്ണയും പ്രതികരിച്ചു. ഇന്ന് മുതല്‍ പ്രചാരണത്തില്‍ സജീവമാകുമെന്നും ബിന്ദു പറഞ്ഞു.

അതിനിടെ പി സി വിഷ്ണുനാഥ് ഉമ്മന്‍ ചാണ്ടിയുമായി കൂടിക്കാഴ്ച നടത്തി. കൊല്ലം സീറ്റിലെ തര്‍ക്കത്തിനിടയിലാണ് കൂടിക്കാഴ്ച. പരസ്യ പ്രതികരണത്തിനിപ്പോള്‍ ഇല്ലെന്ന് വിഷ്ണുനാഥ് കൂടിക്കാഴ്ചയ്ക്ക് ശേഷം പ്രതികരിച്ചു.

കെ. മുരളീധരന്‍ ഉശിരുള്ള നേതാവാണെന്ന് ബി ജെ പി സംസ്ഥാന അധ്യക്ഷന്‍ കെ.സുരേന്ദ്രന്‍ പറഞ്ഞതും ചര്‍ച്ചയായി മാറി. നേമത്ത് നിന്നും മത്സരിക്കാന്‍ മുതിര്‍ന്ന നേതാക്കള്‍ മടിച്ച് നിന്നപ്പോഴും മുരളിയാണ് തുടക്കം മുതല്‍ അതിന് തയ്യാറായത്. അതുകൊണ്ടു കൂടിയാവണം കെ.സുരേന്ദ്രന്‍ മുരളിയെ അഭിനന്ദിച്ച് രംഗത്തെത്തിയത്.

അച്ഛന്‍ രാജി വച്ച മണ്ഡലത്തില്‍ നിന്നും മകന്‍ മത്സരിക്കുന്നു എന്ന പ്രാധാന്യവും നേമത്തിന് വന്നു ചേര്‍ന്നു. 1982 ല്‍ കെ. കരുണാകരന്‍ രാജി വച്ച മണ്ഡലമാണ് നേമം. അന്ന് മാളയിലും നേമത്തും കരുണാകരന്‍ മത്സരിച്ചു. രണ്ടിടത്തും ജയിച്ചപ്പോള്‍ നേമം രാജിവച്ചു. അങ്ങനെയാണ് നേമം സീറ്റ് കോണ്‍ഗ്രസില്‍ നിന്നും കൈവിട്ടു പോയത്. മകന്‍ വരുന്നതോടെ അതിന് പകരമാവുമെന്നാണ് നേമത്തെ വോട്ടര്‍മാര്‍ പറയുന്നത്.