കൊല്ലത്ത് വനിതാ പ്രവര്‍ത്തകര്‍ക്ക് മുന്നില്‍ പൊട്ടികരഞ്ഞ് ബിന്ദു കൃഷ്ണ. മത്സരിക്കണമെന്ന് ആവശ്യപ്പെട്ടെത്തിയവര്‍ക്ക് മുന്നിലാണ് ബിന്ദു കൃഷ്ണ പൊട്ടികരഞ്ഞത്. കൊല്ലം ഡിസിസി ഓഫീസിലാണ് ഇന്നലെ നാടകീയ രംഗങ്ങള്‍ അരങ്ങേറിയത്.

പ്രവര്‍ത്തകരുടെ സ്‌നേഹം കണ്ടാണ് കരഞ്ഞതെന്ന് ഡിസിസി അധ്യക്ഷ ബിന്ദു കൃഷ്ണ. കരച്ചില്‍ നാടകമാണെന്ന് മനുഷ്യത്വമുള്ളവരാരും പറയില്ലെന്ന് ബിന്ദു കൃഷ്ണ പറഞ്ഞു. വിഷ്ണുനാഥുമായി പ്രശ്‌നങ്ങളില്ലെന്ന് കുണ്ടറയില്‍ വിഷ്ണുവിന്റെ വിജയം ഉറപ്പാണെന്നും ബിന്ദു കൃഷ്ണ പ്രതികരിച്ചു.



കൊല്ലത്തെ സ്ഥാനാര്‍ത്ഥിയായി ബിന്ദു കൃഷ്ണയെയാണ് പിന്തുണയ്ക്കുന്നതെന്ന് ഭൂരിഭാഗം ബ്ലോക്ക് മണ്ഡലം പ്രസിഡന്റുമാരും യോഗത്തില്‍ പറഞ്ഞിരുന്നു. ബിന്ദുവിന് സ്ഥാനാര്‍ത്ഥിത്വം നിഷേധിച്ചതില്‍ പ്രതിഷേധിച്ച് രണ്ട് ബ്ലോക്ക് കമ്മറ്റി പ്രസിഡന്റുമാരും മുഴുവന്‍ മണ്ഡലം പ്രസിഡന്റുമാരും ഇന്നലെ രാജിവച്ചിരുന്നു.

കൊല്ലം സീറ്റില്‍ വിഷ്ണുനാഥിനെയാണ് എ ഗ്രൂപ്പ് സ്ഥാനാര്‍ത്ഥിയായി നിര്‍ദേശിക്കുന്നത്. ബിന്ദുവിനെ ഐ ഗ്രൂപ്പും പിന്തുണയ്ക്കുന്നുണ്ട്. വിശ്വസ്തനായ വിഷ്ണുനാഥിന് സീറ്റ് ഉറപ്പിക്കാനായി കനത്ത സമ്മര്‍ദ്ദമാണ് ഉമ്മന്‍ ചാണ്ടി ചെലുത്തുന്നത്. ഇതേ തുടര്‍ന്ന് കുണ്ടറ സീറ്റില്‍ മത്സരിക്കാന്‍ ചെന്നിത്തല ബിന്ദു കൃഷ്ണയോട് ആവശ്യപ്പെട്ടിരുന്നുവെന്നാണ് സൂചന.



എന്നാല്‍ ബിന്ദു കൃഷ്ണ കൊല്ലത്തോ, ചാത്തന്നൂരോ എന്ന ചോദ്യങ്ങള്‍ ഇടക്ക് ഉയര്‍ന്നു വന്നിരുന്നു. കൊല്ലം നിയമസഭാ സീറ്റിനെ ചൊല്ലി കൊണ്‍ഗ്രസിനുള്ളില്‍ തര്‍ക്കം രൂക്ഷമായ സാഹചര്യത്തില്‍ ശൂരനാട് രാജശേഖരന് രാജ്യസഭ നല്‍കി പരിഹാരം കാണാനുള്ള സമവായ നീക്കവും നടന്നിരുന്നു.

ഇതിനിടയില്‍ കുന്നംകുളം സീറ്റ് ശൂരനാടിന് നല്‍കാമെന്ന് നേതൃത്വം അറിയിച്ചെങ്കിലും സീറ്റ് നിരസിച്ചു. ബിന്ദുകൃഷ്ണ, പി സി വിഷ്ണുനാഥ്, സൂരജ് രവി എന്നിവര്‍ സീറ്റിനായി രംഗത്തുണ്ട്. അതേസമയം രാജ്യസഭാ സീറ്റ് നല്‍കാനുള്ള വാഗ്ദാനം ശൂരനാട് രാജശേഖരന്‍ സ്വീകരിച്ചിട്ടില്ല. നിലവിലെ സാഹചര്യം മാറിയാല്‍ സീറ്റ് വാഗ്ദാനത്തില്‍ നിന്ന് നേതൃത്വം പിറകോട്ട് പോകുമോ എന്ന ആശങ്കയും ശൂരനാടിനുണ്ട്.



ജില്ലയിലെത്തിയ ഉമ്മന്‍ ചാണ്ടിയുമായി എ ഗ്രൂപ്പ് നേതാക്കള്‍ ചര്‍ച്ച നടത്തി. എ ഗ്രൂപ്പ് മല്‍സരിക്കുന്ന സീറ്റുകളില്‍ ശക്തരായ സ്ഥാനാര്‍ഥികളെ നിര്‍ത്തണമെന്നും നേതാക്കള്‍ ഉമ്മന്‍ ചാണ്ടിയോട് ആവശ്യപ്പെട്ടിട്ടുണ്ട്.

സാധ്യതാ പട്ടികയിലുള്ള സ്ഥാനാര്‍ഥികളും ഉമ്മന്‍ ചാണ്ടിയെ കണ്ടിരുന്നു. എന്നാല്‍ നാല് കൊല്ലത്തോളമായി താന്‍ കൊല്ലം കേന്ദ്രീകരിച്ചു പ്രവര്‍ത്തിക്കുകയാണെന്നും കൊല്ലത്ത് അല്ലാതെ വേറൊരു സീറ്റിലും താന്‍ മത്സരിക്കാനില്ലെന്നുമുള്ള നിലപാടിലാണ് ബിന്ദു കൃഷ്ണ.