മഹിളാ കോണ്‍ഗ്രസ് അദ്ധ്യക്ഷ ലതിക സുഭാഷിന്റെ ദിനമായിരുന്നു ഇന്നലെ. മുല്ലപ്പള്ളിയുടെ ദിനമായി മാറേണ്ടതാണ് ലതിക സുഭാഷ് തന്റേതാക്കി മാറ്റിയത്. മുല്ലപ്പള്ളി കൊട്ടിഘോഷിച്ച് സ്ഥാനാര്‍ത്ഥി നിര്‍ണയം പൂര്‍ത്തിയാകും മുമ്പ് ലതിക സുഭാഷ് മുല്ലപ്പള്ളിയുടെ ആസ്ഥാനമായ കെപിസിസി ആസ്ഥാനം കയ്യടക്കുകയായിരുന്നു.

മഹിള അധ്യക്ഷ പദവിയില്‍ നിന്നുള്ള രാജി പ്രഖ്യാപിച്ച ലതിക സുഭാഷ് അപ്രതീക്ഷിതമായി അവിടെ വച്ചുതന്നെ തല മുണ്ഡനം ചെയ്തത് കണ്ട് ഇന്ദിരാഭവനിലുണ്ടായിരുന്ന നേതാക്കളും അമ്പരന്നു. അനുനയിപ്പിക്കാനായി യു.ഡി.എഫ് കണ്‍വീനര്‍ എം.എം. ഹസന്‍ ചാടിയിറങ്ങിയെങ്കിലും നിരാശയായിരുന്നു ഫലം.

നമുക്ക് കാര്യങ്ങള്‍ പരിഹരിക്കാമെന്ന് ഹസന്‍ പറഞ്ഞപ്പോള്‍, 'നിങ്ങള്‍ക്ക് ശ്രമിക്കാമെങ്കില്‍ ഏറ്റുമാനൂര്‍ സീറ്റ് എനിക്ക് വാങ്ങിത്തരൂ...' എന്ന് ലതിക ഉച്ചത്തില്‍ തിരിച്ചടിച്ചു. ഞാന്‍ 15 വയസുള്ള കുട്ടിയല്ല, 56 വയസ്സായി എന്നും പറഞ്ഞു.

അതോടെ ഹസന്‍ അമ്പരന്നു. തനിക്ക് മാത്രമായി ഉറപ്പ് നല്‍കാനാവില്ല. അതോടെ ഹസന്റെ കാല് തൊട്ട് ലതിക സുഭാഷ് നമസ്‌കരിച്ചു. ഹസനാകട്ടെ കൈയ്യെടുതത്ത് അനുഗ്രഹിച്ചു.

ലതിക സുഭാഷ് അച്ചടക്കമുള്ള പ്രവര്‍ത്തകയാണെന്നും ,അവര്‍ പാര്‍ട്ടിക്ക് ദോഷമുണ്ടാക്കുന്ന ഒന്നും ചെയ്യില്ലെന്നും ഡല്‍ഹി വാര്‍ത്താസമ്മേളനത്തിലെ ചോദ്യത്തിന് മുല്ലപ്പള്ളി മറുപടി പറഞ്ഞതിന് പിന്നാലെ, ഇന്ദിരാഭവന് മുന്നില്‍ മാദ്ധ്യമങ്ങള്‍ക്ക് മുന്നിലെത്തിയ ലതിക പൊട്ടിത്തെറിച്ചു.

അഭിമാനത്തോടെ കൊട്ടിഘോഷിച്ച് പ്രഖ്യാപിച്ച കോണ്‍ഗ്രസിന്റെ സ്ഥാനാര്‍ത്ഥി പട്ടിക കേട്ടപ്പോള്‍ വനിതയെന്ന നിലയില്‍ ഏറെ ദു:ഖമുണ്ടെന്ന് പറഞ്ഞാണ് ലതിക തുടങ്ങിയത്. നാടകീയമായാണ് മഹിളാ കോണ്‍ഗ്രസ് അദ്ധ്യക്ഷ പദവി ഒഴിയുന്നതായി പ്രഖ്യാപിച്ചത്.

തൊട്ടുപിന്നാലെ, തല മുണ്ഡനം ചെയ്യുന്നതായും . പിണറായി വിജയന്‍ സര്‍ക്കാരിന്റെ സ്ത്രീവിരുദ്ധ നയങ്ങളിലും കത്വ സംഭവത്തിലടക്കം നരേന്ദ്രമോദി സര്‍ക്കാരിന്റെ നയങ്ങളിലും പ്രതിഷേധിച്ചാണ് പകുതി തല മുണ്ഡനം ചെയ്യുന്നതെന്നാണ് പറഞ്ഞത്.

ബാക്കി പകുതി, പാര്‍ട്ടി നിലപാടില്‍ പ്രതിഷേധിച്ചും. തല മുണ്ഡനം ചെയ്യുന്നതിനിടയില്‍ വിതുമ്പലടക്കാനാവാതെ ചിലര്‍ ലതികയുടെ മുഖം ചേര്‍ത്തുപിടിച്ചു. അവരെ തിരിച്ചാശ്വസിപ്പിച്ച് ലതിക.

സ്ഥാനാര്‍ത്ഥിത്വമില്ലാത്തതിന് തല മുണ്ഡനം ചെയ്യുമെന്ന് കരുതുന്നില്ലെന്ന് കെ.പി.സി.സി അദ്ധ്യക്ഷന്‍ പ്രതികരിച്ചതിനെപ്പറ്റി ചോദിച്ചപ്പോള്‍, അദ്ദേഹം വലിയ നേതാവാണെന്നായിരുന്നു മറുപടി. പിന്നാലെയാണ് ഹസന്റെ കടന്നുവരവ്. തനിക്ക് എല്ലാവരോടും ബഹുമാനമുണ്ടെന്നും ഏറ്റുമാനൂരിലെ സാധാരണപ്രവര്‍ത്തകര്‍ തന്നെ കാത്തിരിക്കുകയാണെന്നും ലതിക ഹസനോട് പറഞ്ഞു.

ഹസന്‍ തന്റെ സഹോദരനാണെന്ന് മാദ്ധ്യമങ്ങളോടും ലതിക പറഞ്ഞു. ലതികയുടെ പ്രതിഷേധവും വികാരവും ഇവിടെ ഇല്ലാത്ത നേതാക്കളെ അറിയിക്കുമെന്ന് ഹസന്‍ വ്യക്തമാക്കി. ലതിക സുഭാഷിന് സീറ്റ് നല്‍കാന്‍ അതിയായ ആഗ്രഹമുണ്ടായിരുന്നു. അതിനായി കേരള കോണ്‍ഗ്രസുമായുള്ള ചര്‍ച്ചയില്‍ വളരെയധികം ശ്രമിച്ചു. അവര്‍ 12 സീറ്റിനായാണ് വാദിച്ചത്. അവരുമായുള്ള ധാരണയ്ക്ക് പ്രതിബന്ധമായി നിന്നത് ഏറ്റുമാനൂരായിരുന്നു.

ലതിക സുഭാഷിന് സീറ്റ് നല്‍കാന്‍ പരമാവധി ശ്രമിച്ചു. അവര്‍ക്ക് സീറ്റ് നിഷേധിക്കപ്പെട്ടതില്‍ വളരെ ദു:ഖമുള്ളയാളാണ് താനെന്നും ഹസന്‍ പറഞ്ഞു. എന്തായാലും ലതിക സുഭാഷിന്റെ പ്രതിഷേധം ഇപ്പോഴും അലയടിക്കുകയാണ്.