കേരളത്തില്‍ ബിജെപിയെ സംബന്ധിച്ച് ഏറെ വിജയ സാധ്യതയുള്ള സ്ഥാനാര്‍ത്ഥിയാണ് സുരേഷ് ഗോപി. എന്നാല്‍ സുരേഷ് ഗോപി ഇപ്പോഴും ആശുപത്രിയിലാണ്.

തൃശൂരിലെ തന്റെ സ്ഥാനാര്‍ത്ഥിത്വം നൂറു ശതമാനവും ഉറപ്പിക്കാറായിട്ടില്ലെന്ന് സുരേഷ് ഗോപി തന്നെ പറയുന്നു. ന്യുമോണിയ ബാധിതനായി ആശുപത്രിയില്‍ കിടക്കുന്ന സുരേഷ് ഗോപി ഫോണ്‍ വഴി ഒരു ചാനല്‍ ചര്‍ച്ചയില്‍ പങ്കെടുക്കവേയാണ് ഇക്കാര്യം പറഞ്ഞത്.

ആശുപത്രി വിട്ട് വന്നാലുള്ള തന്റെ അവസ്ഥയെ പറ്റി ബിജെപി കേന്ദ്ര നേതൃത്വം ചര്‍ച്ച ചെയ്യുകയാണെന്നും ആശുപത്രിയില്‍ നിന്നും റിപ്പോര്‍ട്ട് ലഭിച്ച ശേഷം മാത്രമേ തനിക്ക് സ്ഥാനാര്‍ത്ഥിത്വം സംബന്ധിച്ച നിര്‍ദ്ദേശം തരികയുള്ളൂ എന്നും സുരേഷ് ഗോപി പറഞ്ഞു.

അമിത് ഷായുള്‍പ്പെടെയുള്ള മൂന്ന് കേന്ദ്ര മന്ത്രിമാര്‍ അടക്കമാണ് ഇക്കാര്യത്തെ കുറിച്ച് തീരുമാനമെടുക്കുകയെന്നും അദ്ദേഹം പറഞ്ഞു. തന്റെ ആരോഗ്യനില ഇപ്പോള്‍ തൃപ്തികരമാണെന്നും എന്നാല്‍ ശ്വാസകോശത്തില്‍ ന്യുമോണിയ വന്ന് പോയതിന്റെ ഭാഗമായി ചെറിയ ഒരു കല(സ്‌കാര്‍) അവശേഷിക്കുന്നുണ്ടെന്നും അദ്ദേഹം വിശദീകരിച്ചു.

പൂര്‍ണമായും വിശ്രമിച്ചുകൊണ്ട് രോഗം മാറ്റേണ്ടതുണ്ടെന്നും ഇക്കാര്യങ്ങള്‍ സംബന്ധിച്ച് കേന്ദ്ര നേതൃത്വം തീരുമാനമെടുക്കുമെന്നും അദ്ദേഹം വിശദീകരിച്ചു. എന്നാല്‍ പോരാട്ടമാണ് മുഖ്യമെന്ന് കാണുകയാണെങ്കില്‍ ആരോഗ്യം നോക്കാതെ തന്നെ താന്‍ കളത്തിലിറങ്ങുമെന്നും സുരേഷ് ഗോപി വ്യക്തമാക്കി.

എറണാകുളത്ത് സ്വകാര്യ ആശുപത്രിയില്‍ കഴിഞ്ഞ 5 ദിവസമായി സുരേഷ് ഗോപി ചികിത്സയില്‍ തുടരുകയാണ്. ജോഷി സംവിധാനം ചെയ്യുന്ന ചിത്രമായ 'പാപ്പന്റെ' ലൊക്കേഷനില്‍ നിന്ന് സുരേഷ് ഗോപിയെ നേരിട്ട് ആശുപത്രിയില്‍ പ്രവേശിപ്പിക്കുകയായിരുന്നു. ന്യുമോണിയ ബാധ കുറഞ്ഞുവരുന്നതായി അദ്ദേഹത്തോട് അടുത്ത വൃത്തങ്ങള്‍ വ്യക്താക്കി.

നിയമസഭാ തിരഞ്ഞെടുപ്പില്‍ സുരേഷ് ഗോപി സ്ഥാനാര്‍ഥിയാകണമെന്ന് ചര്‍ച്ച നടക്കുന്നതിനിടെയാണ് താരത്തെ ആശുപത്രിയില്‍ പ്രവേശിപ്പിച്ചത്. തൃശൂര്‍, തിരുവനന്തപുരം മണ്ഡലങ്ങളിലാണ് സുരേഷ് ഗോപിയെ പരിഗണിച്ചത്. തിരഞ്ഞെടുപ്പില്‍ മത്സരിക്കണമെന്ന് ബിജെപി കേന്ദ്ര നേതൃത്വം സുരേഷ് ഗോപിയോട് ആവശ്യപ്പെട്ടിരുന്നു. എന്നാല്‍, സിനിമ തിരക്കുകള്‍ ഉള്ളതിനാല്‍ മത്സരിക്കാനില്ലെന്ന് സുരേഷ് ഗോപി അറിയിക്കുകയായിരുന്നു. അവസാനം സുരേഷ് ഗോപിയെ തൃശൂരില്‍ നിശ്ചയിച്ചത്.

കഴിഞ്ഞ ലോക്‌സഭാ തിരഞ്ഞെടുപ്പില്‍ തൃശൂരില്‍ ഏറെ ഓളമുണ്ടാക്കിയയാളാണ് സുരേഷ് ഗോപി. അതിനാല്‍ തന്നെയാണ് സുരേഷ് ഗോപിയെ തൃശൂരില്‍ പരിഗണിച്ചത്.



നിയമസഭാ തിരഞ്ഞെടുപ്പില്‍ ബി.ജെ.പിയുടെ 112 സീറ്റുകളിലെ സ്ഥാനാര്‍ത്ഥികളെ ഇന്നലെയാണ് പ്രഖ്യാപിച്ചത്. സംസ്ഥാന അദ്ധ്യക്ഷന്‍ കെ. സുരേന്ദ്രന്‍ പത്തനംതിട്ട ജില്ലയിലെ കോന്നിയിലും കാസര്‍കോട് ജില്ലയിലെ മഞ്ചേശ്വരത്തുമാണ് മത്സരിക്കുന്നത്. മെട്രോമാന്‍ ഇ.ശ്രീധരന്‍ പാലക്കാട്ടും. വി. മുരളീധരന്‍ ഉള്‍പ്പെടെ പ്രമുഖരെ പരിഗണിക്കുന്നതിനാല്‍ കഴക്കൂട്ടം അടക്കം മൂന്നിടത്ത് സ്ഥാനാര്‍ത്ഥികളെ പ്രഖ്യാപിച്ചിട്ടില്ല.

കെ. സുരേന്ദ്രന്‍ കോന്നിയില്‍ മത്സരിക്കുമെന്ന് നേരത്തേ പ്രതീക്ഷിച്ചതാണ്. എങ്കിലും കഴിഞ്ഞ തവണ വിജയത്തിന്റെ വക്കിലെത്തിയ മഞ്ചേശ്വരത്തെ സാദ്ധ്യത മുതലെടുക്കാന്‍ അവിടെയും മത്സരിപ്പിക്കാന്‍ തീരുമാനിക്കുകയായിരുന്നു. പട്ടികയില്‍ 12 വനിതകളുണ്ട്. 10 പേര്‍ പട്ടികജാതിക്കാരും രണ്ടുപേര്‍ പട്ടിക വര്‍ഗക്കാരും. തൊടുപുഴയില്‍ ജനറല്‍ സീറ്രിലാണ് യുവമോര്‍ച്ച ജനറല്‍ സെക്രട്ടറി ശ്യാംരാജ് മത്സരിക്കുന്നത്

. സംസ്ഥാന വൈസ് പ്രസിഡന്റ് ശോഭാ സുരേന്ദ്രന്‍ ,പ്രഖ്യാപിച്ച പട്ടികയിലില്ല. കഴക്കൂട്ടം, കരുനാഗപ്പള്ളി, കൊല്ലം എന്നിവിടങ്ങളിലെ സ്ഥാനാര്‍ത്ഥികളെ ഇന്ന് പ്രഖ്യാപിക്കും.

കഴക്കൂട്ടത്ത് കോണ്‍ഗ്രസില്‍ നിന്ന് ഒരു അപ്രതീക്ഷിത സ്ഥാനാര്‍ത്ഥി വരുമെന്നും അതല്ല, കേന്ദ്ര മന്ത്രി വി. മുരളീധരന്‍ മത്സരിക്കുമെന്നും കേള്‍ക്കുന്നു. നേതൃത്വം ആവശ്യപ്പെട്ടാല്‍ മത്സരിക്കുമെന്ന് വി. മുരളീധരന്‍ ഇന്നലെയും ആവര്‍ത്തിച്ചു. തൃശൂരില്‍ സുരേഷ് ഗോപിയെയാണ് നിശ്ചയിച്ചത്. അതാണിപ്പോള്‍ ഉറപ്പാകാതെയിരിക്കുന്നത്.