കായംകുളത്തെ യു.ഡി.എഫില്‍ സ്ഥാനാര്‍ത്ഥിയെ സംബന്ധിച്ച് ഇന്നലെയാണ് തീരുമാനമുണ്ടായത്. കായംകുളത്ത് എല്‍.ഡി.എഫ്, എന്‍.ഡി.എ സ്ഥാനാര്‍ത്ഥികളായ യു. പ്രതിഭയും പ്രദീപ് ലാലും വോട്ടുപിടിത്തം നേരത്തെ തന്നെ തുടങ്ങിയിരുന്നു.

സിറ്റിംഗ് എം.എല്‍.എയും എല്‍.ഡി.എഫ് സ്ഥാനാര്‍ത്ഥിയുമായ യു. പ്രതിഭ കേരളത്തില്‍ തന്നെ ശ്രദ്ധ നേടിയിരുന്നു. ഇടയ്ക്ക് സഖാക്കളുടെ വിമര്‍ശനത്തിന് പോലും പ്രതിഭ പാത്രമായിരുന്നു. എതിര്‍പ്പിനിടെയും പ്രതിഭയെ തന്നെ സ്ഥാനാര്‍ത്ഥിയാക്കി.

അതേസമയം കായംകുളത്ത് 27 വയസുകാരിയായ അരിത ബാബു എത്തിയതോടെ ശക്തമായ വെല്ലുവിളിയാണ് ഉയര്‍ത്തുന്നത്. പാവപ്പെട്ട കുടുംബാംഗമായ അരിത ബാബുവിന്റെ കഥകള്‍ ഇപ്പോള്‍ തന്നെ വൈറലാണ്. അരിതയ്ക്ക് വിശേഷം ഏറെയാണ്.

കല്യാണം കഴിക്കാനുള്ള മുന്നൊരുക്കങ്ങള്‍ക്കിടെയാണ് കായംകുളം അജേഷ് നിവാസില്‍ തുളസീധരന്റെയും ആനന്ദവല്ലിയുടെയും മകള്‍ അരിതയെ കോണ്‍ഗ്രസ് കായംകുളത്ത് സ്ഥാനാര്‍ത്ഥിയാക്കിയത്.

ജ്യോതിഷപ്രകാരം ഇടവമാസത്തിലെ മൂലം നക്ഷത്രക്കാരിക്ക് ഈ വര്‍ഷം വിവാഹത്തിനുള്ള സമയമാണ്.മാട്രിമോണിയലുകള്‍ വഴിയും പരിചയക്കാര്‍ വഴിയും ആലോചനകള്‍ വന്നുതുടങ്ങി. പക്ഷേ ഇതുവരെ ആര്‍ക്കും ചായകൊടുക്കാന്‍ അവസരം കിട്ടിയില്ലെന്ന് അരിത പറയുന്നു.

അതിനിടെയാണ് അപ്രതീക്ഷിതമായി കോണ്‍ഗ്രസ് സ്ഥാനാര്‍ത്ഥി പട്ടികയില്‍ ഇടം പിടിച്ചത്. ഇനി, തിരഞ്ഞെടുപ്പ് കഴിഞ്ഞാവാം പെണ്ണുകാണല്‍ എന്നാണ് തീരുമാനം. നല്ല സമയം തിരഞ്ഞെടുപ്പ് ഫലത്തിലും പ്രതിഫലിക്കുമെന്ന ശുഭാപ്തി വിശ്വാസത്തിലാണ് അരിത.

ഇന്നലെ കോണ്‍ഗ്രസ് സ്ഥാനാര്‍ത്ഥി പട്ടികയുടെ പ്രഖ്യാപന വേളയില്‍ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ ഏറ്റവുമധികം സംസാരിച്ചത് കായംകുളത്തിന്റെ സ്വന്തം അരിതയെക്കുറിച്ചാണ്.

സംസ്ഥാനത്തെ ഏറ്റവും പ്രായം കുറഞ്ഞ യു.ഡി.എഫ് സ്ഥാനാര്‍ത്ഥി. അച്ഛന്‍ തുളസീധരനെ (ബാബു) സഹായിച്ച് കുഞ്ഞുനാളിലെ ക്ഷീരകര്‍ഷകയായി മാറിയ നിര്‍ദ്ധന കുടുംബാംഗമായ അരിതയെകുറിച്ച് സംസ്ഥാന അദ്ധ്യക്ഷന്‍ വാചാലനായതോടെ എല്ലാ കണ്ണുകളും കായംകുളത്തേക്ക് തിരിഞ്ഞു. പശുക്കളെ കറന്നും, സൊസൈറ്റികളില്‍ പാല്‍ എത്തിച്ചും ഉപജീവനം നടത്തുന്നതിനിടെ രാഷ്ട്രീയത്തില്‍ സജീവമായ അരിത 21ാം വയസില്‍ ജില്ലാ പഞ്ചായത്തംഗവും, യൂത്ത് കോണ്‍ഗ്രസ് സംസ്ഥാന സെക്രട്ടറിയുമായി.

കൈവന്നതെല്ലാം കോണ്‍ഗ്രസ് പ്രവര്‍ത്തകനായ അച്ഛന്റെ നേട്ടമായി കാണാനാണ് ഇഷ്ടം. സ്വന്തം നാട് പ്രവര്‍ത്തന മണ്ഡലമായത് ഏറെ ഗുണം ചെയ്യുമെന്നാണ് അരിതയുടെ പ്രതീക്ഷ. തന്നെ മനസിലാക്കി പിന്തുണ നല്‍കുന്നൊരാള്‍ ഈ വര്‍ഷംതന്നെ 'എം.എല്‍.എ' യുടെ വരനായി എത്തുമെന്ന ശുഭപ്രതീക്ഷയിലാണ് അരിത. കായംകുളം ഗവ. ഗേള്‍സ് ഹൈസ്‌കൂളില്‍ പ്ലസ് ടു വരെ പഠിച്ച അരിത, കേരള സര്‍വ്വകലാശാലയില്‍ നിന്നു ബി കോം ബിരുദം നേടി.

അരിത ബാബു എത്തിയതോടെ കായംകുളം കടുക്കുകയാണ്. അതേസമയം കഴിഞ്ഞ 5 വര്‍ഷം കായംകുളത്തിന്റെ ജനപ്രതിനിധി എന്ന നിലയില്‍ മണ്ഡലത്തിന്റെ സര്‍വതോന്‍മുഖമായ വികസനത്തിനായി പ്രവര്‍ത്തിക്കാന്‍ കഴിഞ്ഞിട്ടുണ്ടെന്നും പിണറായി സര്‍ക്കാരിന്റെ കാലത്ത് സമാനതകള്‍ ഇല്ലാത്ത വികസന പ്രവര്‍ത്തനങ്ങള്‍ക്കാണ് കേരളം സാക്ഷ്യം വഹിച്ചതെന്നും പ്രതിഭ ചൂണ്ടിക്കാട്ടി. അതിനാല്‍ വിജയം ഉറപ്പാണെന്നാണ് പ്രതിഭ അവകാശപ്പെടുന്നത്.

എന്തായാലും 27 വയസുള്ള അരിത ബാബു എത്തിയതോടെ അരിതയും പ്രതിഭയും തമ്മിലുള്ള പോരാട്ടം സംസ്ഥാനമാകെ ശ്രദ്ധിക്കുന്നതായി മാറി.