അതെങ്ങനെ ശരിയാകും... സുരേന്ദ്രനെ ശരിയാക്കാനായി 22 ദിവസം ജയിലിട്ടിട്ടും അയ്യപ്പന്റെ അനുഗ്രഹം പോലെ സുരേന്ദ്രന് ഉയര്ത്തെഴുന്നേറ്റു; ബിജെപിയിലെ പല നേതാക്കളുടേയും കണ്ണിലെ കരടായ സുരേന്ദ്രന് വച്ചടി വച്ചടി കയറ്റം; കെ സുരേന്ദ്രനെ നരേന്ദ്ര മോദി വിളിക്കുന്നത് ബഡാ ഫൈറ്റര് എന്ന്
കെ. സുരേന്ദ്രന് ഇന്ന് സംസ്ഥാനത്തെ ഏറ്റവും വിലപിടിപ്പുള്ള ബിജെപി നേതാവാണ്. ഒരിക്കല് കെ. സുരേന്ദ്രനെ തഴയാന് ശ്രമിച്ചവര് സുരേന്ദ്രന്റെ ഒരു വാക്കിനായി കാത്തിരിക്കുകയാണ്. അതാണ് കാലം കാത്തുവച്ച കാവ്യനീതി.
ഡല്ഹിയില് നരേന്ദ്രനെങ്കില് കേരളത്തില് സുരേന്ദ്രനാണ്. പാര്ട്ടിയിലെ പ്രിയപ്പെട്ട യുവപോരാളിയെക്കുറിച്ച് ബി.ജെ.പി അണികള് അഭിമാനത്തോടെ പറയുന്നത് ഇങ്ങനെയെങ്കില്, പ്രധാനമന്ത്രി നരേന്ദ്രമോദി കെ.സുരേന്ദ്രനെ വിശേഷിപ്പിക്കുന്നത് കേരളത്തിന്റെ 'ബഡാ ഫൈറ്റര്' എന്നാണ്.
ഈ അമ്പത്തിയൊന്നുകാരനെ അണികള്ക്ക് പ്രിയങ്കരനാക്കുന്നത് ചങ്കൂറ്റവും പോരാട്ടവീര്യവും സമരോത്സുകതയും. സുരേന്ദ്രന് മറ്റാര്ക്കും നല്കാത്ത പരിഗണനയാണ് മോദി നല്കിയത്. രണ്ട് സീറ്റില് മത്സരിക്കാന് അവസരം നല്കി. കൂടാതെ ഓടി നടക്കാന് ഹെലീ കോപ്ടറും.
കഠിന പരീക്ഷണത്തിലൂടെയാണ് സുരേന്ദ്രന് ഇന്നത്തെ സുരേന്ദ്രനായത്. കോഴിക്കോട് ജില്ലയിലെ ഉള്ളിയേരി സ്വദേശിയായ സുരേന്ദ്രന് ചെറുപ്പം മുതലേ ആര്.എസ്.എസ് ശാഖയില് സജീവം.
ചേളന്നൂര് എസ്.എന്.കോളേജില് പഠിക്കുമ്പോള് എ.ബി.വി.പി പ്രവര്ത്തകനായാണ് പൊതുരംഗത്തേക്കിറങ്ങിയത്. കോഴിക്കോട് ഗുരുവായൂരപ്പന് കോളേജില് ബി.എസ്സി കെമിസ്ട്രി വിദ്യാര്ത്ഥിയായിരിക്കെ എ.ബി.വി.പി ജില്ലാ നേതാവായി. വി. മുരളീധരനായിരുന്നു അന്ന് സംസ്ഥാന സംഘടനാ സെക്രട്ടറി.
കോഴിക്കോട് സര്വകലാശാലയിലെ ക്രമക്കേടുകള്ക്കെതിരെ ഉള്പ്പെടെ നിരവധി വിദ്യാര്ത്ഥി സമരങ്ങളില് മുന്നില് നിന്നു പോരാടി. പാലക്കാട്ട് കുറച്ചുകാലം എ.ബി.വി.പിയുടെ മുഴുവന് സമയ പ്രവര്ത്തകനായിരുന്ന ശേഷം വയനാട്ടില് ഒരു എസ്റ്റേറ്റില് മാനേജരായി. ഒരിക്കല് കൊയിലാണ്ടിയിലെ പാര്ട്ടി പരിപാടിയില് പ്രസംഗിക്കേണ്ടിയിരുന്ന കെ.ജി.മാരാര് വൈകിയതിനെ തുടര്ന്ന് അദ്ദേഹം വരുന്നതുവരെ പകരക്കാരനായി പ്രസംഗിച്ച സുരേന്ദ്രനെ പിന്നീടൊരിക്കല് വയനാട്ടില് വച്ച് യുവമോര്ച്ചയിലേക്ക് കൊണ്ടുവന്നത് മാരാര് തന്നെ.
യുവമോര്ച്ച വയനാട് ജില്ലാ സെക്രട്ടറി, പ്രസിഡന്റ്, സംസ്ഥാന സെക്രട്ടറി, പ്രസിഡന്റ്, ബി.ജെ.പി സംസ്ഥാന ജനറല് സെക്രട്ടറി എന്നീ ചുമതലകള് വഹിച്ചു. കോവളം കൊട്ടാരം സമരം തുടങ്ങി അഴിമതിക്കെതിരായ നിരവധി സമരങ്ങളില് പങ്കെടുത്ത് പൊലീസ് മര്ദ്ദനമേറ്റുവാങ്ങി. ജയിലുകളില് കഴിഞ്ഞു.
ശബരിമല യുവതീപ്രവേശന വിധിയെത്തുടര്ന്നുള്ള പ്രക്ഷോഭങ്ങള് എല്.ഡി.എഫ് സര്ക്കാരിന്റെ കണ്ണിലെ കരടും ഭക്തജനങ്ങളുടെ കണ്ണിലുണ്ണിയുമാക്കി.പാര്ട്ടിയില് കേന്ദ്രമന്ത്രി വി.മുരളീധരനുമായി വളരെ അടുപ്പം പുലര്ത്തുന്ന സുരേന്ദ്രന് നരേന്ദ്രമോദി, അമിത് ഷാ, ജെ.പി നദ്ദ, ബി.എല്. സന്തോഷ് തുടങ്ങിയ മുതിര്ന്ന നേതാക്കള്ക്കും പ്രിയങ്കരന്. 2016 നിയമസഭാ തിരഞ്ഞെടുപ്പില് മഞ്ചേശ്വരത്ത് നേരിയ വോട്ടിന് തോല്വി. കാസര്കോട്ടു നിന്നും പത്തനംതിട്ടയില് നിന്നും ലോക്സഭയിലേക്കും, 2019 ലെ കോന്നി നിയമസഭാ ഉപതിരഞ്ഞെടുപ്പിലും മികച്ച പ്രകടനം നടത്തി.
മഞ്ചേശ്വരത്തും കോന്നിയിലുമാണ് സുരേന്ദ്രന് മത്സരിക്കുന്നത്. ശബരിമല വിഷയം കത്തിനിന്ന 2019 ലെ ഉപതിരഞ്ഞെടുപ്പിലും കഴിഞ്ഞ തദ്ദേശ തിരഞ്ഞെടുപ്പിലും വലിയ മുന്നേറ്റമൊന്നും കോന്നിയില് നേടാന് ബി.ജെ.പിക്ക് കഴിഞ്ഞില്ലെങ്കിലും സംസ്ഥാന അദ്ധ്യക്ഷന് കെ.സുരേന്ദ്രന് വീണ്ടുമൊരങ്കത്തിന് തയ്യാറെടുക്കുന്നതാണ് കോന്നിയെ ഹോട്ട്സീറ്റാക്കുന്നത്. ഉപതിരഞ്ഞെടുപ്പ് മുതല് കോന്നിയിലെ കോണ്ഗ്രസ് പാര്ട്ടിയില് നിലനില്ക്കുന്ന ഭിന്നത വോട്ടാക്കി മാറ്റാന് കഴിയുമെന്ന പ്രതീക്ഷയിലാണ് ബി.ജെ.പി.
മണ്ഡലം നിലനിര്ത്താന് കോന്നി മെഡിക്കല് കോളേജ് ആശുപത്രി ഉദ്ഘാടനവും ഭരണ നേട്ടങ്ങളുമാണ് എല്.ഡി.എഫിന്റെ തുറുപ്പ് ചീട്ട്. എന്.ഡി.എ വിജയസാദ്ധ്യത കണക്കാക്കുന്ന എ ക്ളാസ് മണ്ഡലമാണ് കോന്നി. വോട്ട് കണക്കുകളില് കണ്ണുവച്ചു തന്നെയാണ് ഇത്തവണ മുന്നണികള് വീണ്ടും ത്രികോണ മത്സരം ശക്തമാക്കുന്നത്. എന്തായാലും സുരേന്ദ്രന്റെ ഭാവി കൂടിയാണ് ഈ തെരഞ്ഞെടുപ്പ്.
https://www.facebook.com/Malayalivartha