നേമത്ത് പുലി വരുമെന്ന് പറഞ്ഞത് യാഥാര്‍ത്ഥ്യാമായി. പക്ഷെ ഈ പുലിയെ തളച്ചില്ലെങ്കില്‍ ചെന്നിത്തലയ്ക്ക് കടുത്ത പാരയാകും.

തമാശയ്ക്കാണെങ്കിലും നേമം ഏറ്റെടുക്കുന്നവന്‍ മുഖ്യമന്ത്രി സ്ഥാനാര്‍ത്ഥിയെന്ന ഹൈക്കമാന്‍ഡിന്റെ നിര്‍ദേശമാണ് പ്രധാനം. അതിനാല്‍ തന്നെ നേമത്ത് മുരളിയെ തളയ്ക്കാനാണ് കോണ്‍ഗ്രസിലെ ഒരു വിഭാഗം ശ്രമിക്കുന്നത്. അതിനിടെ രാജിവച്ചിട്ട് മത്സരിക്കാനും ചാഞ്ചാട്ടക്കാരനായി ചിത്രീകരിക്കുകയും ചെയ്യുന്നു.

അതേസമയം കെ മുരളീധരന്‍ ഇതിനൊക്കെ മറുപടി പറയുകയാണ്. നേമത്ത് 2016 ല്‍ ബിജെപിയുടെ ഒ. രാജഗോപാലിനെ വിജയിപ്പിച്ചത് യുഡിഎഫ് ആണെന്ന ആക്ഷേപം സിപിഎം ഉന്നയിക്കുന്നു എന്നാണ് മുരളി പറയുന്നത്.

സീറ്റ് കോണ്‍ഗ്രസ് ഏറ്റെടുക്കുകയും എന്നെ സ്ഥാനാര്‍ഥിയാക്കുകയും ചെയ്തതിലൂടെ സിപിഎം ആരോപണത്തിന്റെ മുനയൊടിക്കുകയാണു ലക്ഷ്യം. ഇന്ത്യയിലും കേരളത്തിലും ബിജെപിയെ നേരിടുന്നത് കോണ്‍ഗ്രസ് ആണ്. ആരുമില്ലെങ്കില്‍ നേമത്ത് മത്സരിക്കാമെന്നു പാര്‍ട്ടി നേതൃത്വത്തോട് ഞാന്‍ സൂചിപ്പിച്ചിരുന്നു.

ഉറച്ച ആത്മവിശ്വാസമുണ്ട്. നേമത്ത് കോണ്‍ഗ്രസിനെതിരെ ബിജെപിയും സിപിഎമ്മും തമ്മില്‍ വോട്ടുകച്ചവടത്തിനുള്ള സാധ്യത തള്ളിക്കളയുന്നില്ല. ഇരുകക്ഷികളും കൈകോര്‍ത്താലും സാധാരണ ജനങ്ങളുടെ പിന്തുണയില്‍ എനിക്കു വിശ്വാസമുണ്ട്. ബിജെപിയെ തോല്‍പിക്കാനായി 2016 ല്‍ വട്ടിയൂര്‍ക്കാവില്‍ ഇടതുപക്ഷ വോട്ടുകളും എനിക്കു ലഭിച്ചു. അതു നേമത്തും ആവര്‍ത്തിക്കും.

നേമം തിരിച്ചുപിടിച്ച് കേരളത്തിലേക്കുള്ള ബിജെപിയുടെ പ്രവേശനം പൂര്‍ണമായി തടയുകയാണു കോണ്‍ഗ്രസിന്റെ ലക്ഷ്യം. സമീപത്തെ വട്ടിയൂര്‍ക്കാവില്‍ 8 വര്‍ഷം എംഎല്‍എയായിരിക്കെ ഞാന്‍ നടത്തിയ പ്രവര്‍ത്തനങ്ങള്‍ നേമത്തുകാര്‍ക്കു നന്നായി അറിയാം. എന്നെ നേമത്തു സ്ഥാനാര്‍ഥിയാക്കാനുള്ള ഒരു കാരണം അതായിരിക്കാം

.

കഴിഞ്ഞ തവണ ഇരുപതിനായിരത്തില്‍ താഴെ വോട്ടുകളാണു യുഡിഎഫ് സ്ഥാനാര്‍ഥിക്ക് നേമത്തു ലഭിച്ചത്. നേമവുമായി കാര്യമായ ബന്ധമില്ലാത്ത ഘടകകക്ഷിയാണ് അവിടെ മത്സരിച്ചത്. ദുര്‍ബലനായ സ്ഥാനാര്‍ഥിയെ നിര്‍ത്തിയപ്പോള്‍ യുഡിഎഫിന്റെ പരമ്പരാഗത വോട്ടുകള്‍ ബിജെപിയിലേക്കു പോയി. ഇക്കുറി കൈപ്പത്തി ചിഹ്നത്തില്‍ കോണ്‍ഗ്രസ് സ്ഥാനാര്‍ഥി വരുമ്പോള്‍ ചിത്രം മാറും. എന്തും നേരിടാനുള്ള മനക്കരുത്തുമായാണു ഞാന്‍ നേമത്തേക്കു പോകുന്നത്. ഇതൊരു യുദ്ധമാണ്; നേരിടാന്‍ തയാറാണ്.

കരുണാകരന്‍ എന്ന നേതാവിനോടു ജനങ്ങള്‍ക്കുള്ള ഇഷ്ടവും കോണ്‍ഗ്രസില്‍ അവര്‍ അര്‍പ്പിക്കുന്ന വിശ്വാസവുമാണ് തന്റെ കരുത്തെന്നും മുരളീധരന്‍ പറഞ്ഞു.

നേമത്തെ യു.ഡി.എഫ് സ്ഥാനാര്‍ഥി കെ. മുരളീധരന്‍ മത്സരം തൊഴിലാക്കിയ ആളാണെന്ന് എല്‍.ഡി.എഫ് സ്ഥാനാര്‍ഥി വി. ശിവന്‍കുട്ടി പറഞ്ഞു. 15 ദിവസം കൊണ്ട് മുരളീധരന് മണ്ഡലത്തില്‍ ഒന്നും ചെയ്യാനില്ല. നേമത്ത് കോണ്‍ഗ്രസ് വോട്ട് കച്ചവടം നടത്തുമോ എന്ന് വോട്ടെണ്ണിക്കഴിയുമ്പോള്‍ അറിയാമെന്നും വി ശിവന്‍കുട്ടി പറഞ്ഞു.

മുരളീധരന്‍ മന്ത്രിയായിരുന്നപ്പോഴാണ് വടക്കാഞ്ചേരിയില്‍ മത്സരിച്ച് തോറ്റ് തുന്നംപാടിയത്. അതിനാല്‍ അക്കാര്യത്തില്‍ ഒരു ആശങ്കയും എല്‍.ഡി.എഫിനില്ല. ത്രികോണ മത്സരം തന്നെയായിരിക്കും മണ്ഡലത്തില്‍ നടക്കുക. കോണ്‍ഗ്രസുകാര്‍ വോട്ട് കച്ചവടം നടത്തുമോ എന്ന് എണ്ണിക്കഴിയുമ്പോള്‍ മാത്രമേ പറയാന്‍ കഴിയുകയുള്ളു.



ഓരോ കാലത്ത് നടത്തുന്ന സമരങ്ങള്‍ അന്നത്തെ നയങ്ങളുടെ അടിസ്ഥാനത്തിലാണ് വിലയിരുത്തപ്പെടുക. സി.പി.എമ്മിന്റെ തീരുമാനപ്രകാരമാണ് മാണിക്കെതിരായ നിയസഭ പ്രതിഷേധത്തില്‍ പങ്കെടുത്തത്. ആ സംഭവത്തിന് ശേഷം നടന്ന തിരഞ്ഞെടുപ്പിലും തനിക്ക് വോട്ട് വര്‍ധിക്കുകയാണ് ചെയ്തതെന്നും വി ശിവന്‍കുട്ടി പറഞ്ഞു.

കുമ്മനവും മുരളീധരനെതിരെ രംഗത്തു വന്നിട്ടുണ്ട്. ജയിച്ചു കഴിഞ്ഞാല്‍ വീണ്ടും മാറില്ലെന്ന് എന്തുറപ്പാണുള്ളതെന്ന് കുമ്മനം ചോദിച്ചു.