മകൻ ശോഭിത്തിനും ഭാര്യക്കും കോവിഡ് പോസിറ്റീവ് ആയ സാഹചര്യത്തിൽ താൻ ക്വാറന്റീനിൽ പ്രവേശിച്ചതായി അറിയിച്ച് ആരോഗ്യമന്ത്രി കെ. കെ. ശൈലജ. മകനും മരുമകളുമായി പ്രൈമറി കോൺടാക്ട് വന്നതിനാലാണു മന്ത്രി ക്വാറന്റീനിൽ കഴിയാൻ തീരുമാനം എടുത്തത്.

തനിക്കു രോഗ ലക്ഷണങ്ങൾ ഇല്ലെന്നും തുടർന്നുള്ള ദിവസങ്ങളിൽ കോവിഡ് പ്രതിരോധ പ്രവർത്തനങ്ങൾ ഓൺലൈൻ വഴിയും ഫോണിലൂടെയും ഇടപെട്ട് നടത്തുമെന്നും സമൂഹമാധ്യമത്തിലൂടെ മന്ത്രി അറിയിച്ചു.

നേരത്തെ മുഖ്യമന്ത്രി പിണറായി വിജയൻ ഉൾപ്പെടെ മന്ത്രിസഭയിലെ ചില അംഗങ്ങൾക്കു കോവിഡ് ബാധിച്ചിരുന്നു. മകൾക്കു കോവിഡ് ബാധിച്ചിട്ടും മുഖ്യമന്ത്രി പ്രോട്ടോക്കോൾ പാലിക്കാതിരുന്നതായി വൻതോതിൽ ആക്ഷേപമുയർന്നിരുന്നു.

കെ.കെ. ശൈലജ ടീച്ചറുടെ കുറിപ്പ് ഇങ്ങനെയാണ്,

പ്രിയമുള്ളവരെ,

എന്റെ മകൻ ശോഭിത്തും ഭാര്യയും കോവിഡ് പോസിറ്റീവ് ആയിരിക്കുന്നു. അവരുമായി പ്രൈമറി കോൺടാക്ട് വന്നതിനാൽ ഞാൻ ക്വാറന്റീനിൽ കഴിയാൻ തീരുമാനിച്ചിരിക്കുകയാണ്.

എനിക്ക് രോഗ ലക്ഷണങ്ങൾ ഒന്നും ഇല്ല. കഴിഞ്ഞ ദിവസങ്ങളിൽ ഓൺലൈൻ മീറ്റിങ്ങുകൾ മാത്രമാണ് നടത്തിയിരുന്നത്. തുടർന്നുള്ള ദിവസങ്ങളിൽ കോവിഡ് പ്രതിരോധ പ്രവർത്തനങ്ങൾ ഓൺലൈൻ വഴിയും ഫോൺ വഴിയും ഇടപെട്ട് നടത്തുന്നതാണ്.