വൈഗ കൊലക്കേസ് നിര്‍ണായകമായ ഘട്ടത്തിലേക്കാണ് പോകുന്നത്. പ്രതിയും കുട്ടിയുടെ പിതാവുമായ സനു മോഹന്‍ പറയുന്നത് കെട്ടുകഥകളെന്ന് അന്വേഷണ സംഘം. മൊഴികള്‍ ശരിവയ്ക്കുന്നതൊന്നും തെളിവെടുപ്പില്‍ കണ്ടെത്താനായില്ല. പ്രതി പല കാര്യങ്ങളും ഒളിച്ചുവയ്ക്കുകയാണെന്ന് പൊലീസ് പറഞ്ഞു

മകളെ കൊലപ്പെടുത്തി ആത്മഹത്യയ്ക്ക് ശ്രമിച്ചുവെന്നാണ് സനു മോഹന്‍ അന്വേഷണ സംഘത്തോട് പറഞ്ഞത്. എന്നാല്‍ അത്മഹത്യയ്ക്ക് ശ്രമിച്ചതിന് തെളിവുകള്‍ കണ്ടെത്താന്‍ കഴിഞ്ഞില്ല. സാമ്പത്തിക ബാദ്ധ്യത കാരണം കുട്ടിയുമായി ആത്മഹത്യ ചെയ്യാനായിരുന്നു പദ്ധതിയെന്നാണ് പ്രതി നല്‍കിയ മൊഴി.

താന്‍ മരണപ്പെട്ടാന്‍ കുട്ടിയ്ക്ക് ആരും ഉണ്ടാകില്ലെന്നത് കൊണ്ടാണ് കൊലപ്പെടുത്താന്‍ തീരുമാനിച്ചത്. എന്നാല്‍ കുട്ടിയെ പുഴയില്‍ എറിഞ്ഞ ശേഷം ആത്മഹത്യ ചെയ്യാന്‍ മനസ് അനുവദിച്ചില്ല. ഇതോടെ കാറുമെടുത്ത് കടന്നുകളയുകയായിരുന്നുവെന്നും, പിന്നീട് പല തവണ ആത്മഹത്യയ്ക്ക് ശ്രമിച്ചെന്നും സനു മോഹന്‍ അന്വേഷണ സംഘത്തോട് പറഞ്ഞിരുന്നു.

അതേസമയം വൈഗയുടെ കൊലപാതകത്തില്‍ പിതാവ് സനു മോഹന്റെ വാദങ്ങള്‍ തള്ളി പൊലീസ്. വൈഗയെ കൊലപ്പെടുത്തിയത് സാമ്പത്തിക ബാധ്യതകളെ തുടര്‍ന്നാണെന്ന സനു മോഹന്റെ വാദം കള്ളമെന്ന് പൊലീസ് പറഞ്ഞു.

കുട്ടിയെ കൊലപ്പെടുത്തിയ ശേഷം ആള്‍മാറാട്ടം നടത്തി ജീവിക്കാനായിരുന്നു സനു മോഹന്റെ പദ്ധതി. ഗോവയില്‍ ഉള്‍പ്പെടെ എത്തി ആത്മഹത്യാ ശ്രമം നടത്തിയെന്ന സനു മോഹന്റെ മൊഴിയും കള്ളമാണ്. ഗോവയില്‍ എത്തിയ ശേഷം ചൂതാട്ട കേന്ദ്രങ്ങളിലും മാളുകളിലും തീയറ്ററുകളിലും പ്രതി കറങ്ങി നടക്കുകയായിരുന്നുവെന്നും പൊലീസ് കണ്ടെത്തി. സനു മോഹനെ മനോരോഗ വിദഗ്ധന്റെ നേതൃത്വത്തില്‍ ചോദ്യം ചെയ്യാന്‍ പൊലീസ് തീരുമാനിച്ചിട്ടുണ്ട്.

വൈഗ കൊല്ലപ്പെട്ട് ഒരു മാസത്തിനടുത്ത് ഒളിവില്‍ കഴിഞ്ഞ ശേഷമാണ് കര്‍ണാടകയില്‍ നിന്ന് സനു മോഹന്‍ പിടിയിലായത്. മൂകാംബികയില്‍ ഒളിവില്‍ കഴിയുന്നതിനിടെയായിരുന്നു ഇയാള്‍ അറസ്റ്റിലായത്. തുടര്‍ന്ന് വൈഗയുടെ മൃതദേഹം കണ്ടെത്തിയ സ്ഥലത്ത് ഉള്‍പ്പെടെ പ്രതിയെ എത്തിച്ച് തെളിവെടുത്തിരുന്നു.

മകളെ കൊലപ്പെടുത്തി നാടുവിട്ട സനു മോഹന്‍ ഗോവയില്‍ പലയിടത്തുംവച്ച് ആത്മഹത്യയ്ക്ക് ശ്രമിച്ചെന്ന മൊഴി വെറുമൊരു നാടകമാണെന്ന് അന്വേഷണ സംഘം കണ്ടെത്തിയിട്ടുണ്ട്.

സംഭവം നടന്ന സ്ഥലങ്ങളിലെല്ലാം പ്രതിയുമായി തെളിവെടുപ്പ് നടത്തിയെങ്കിലും ഇത് സ്ഥിരീകരിക്കാനുള്ള തെളിവുകള്‍ കിട്ടാതായതോടെയാണ് ആത്മഹത്യാശ്രമം കെട്ടിച്ചമച്ചതാണെന്ന നിഗമനത്തില്‍ അന്വേഷണ ഉദ്യോഗസ്ഥര്‍ എത്തിയത്. പിടിയിലായ ശേഷം നടത്തിയ ചോദ്യംചെയ്യലില്‍ മൂന്നുതവണ ആത്മഹത്യാശ്രമം നടത്തിയെന്നായിരുന്നു സനു മോഹന്‍ മൊഴി നല്‍കിയത്.

ഗോവയിലെ ഒരുസ്ഥലത്തു വച്ച് വിഷംകഴിച്ച് ആത്മഹത്യ ചെയ്യാന്‍ ശ്രമിച്ച് പരാജയപ്പെട്ടുവെന്നായിരുന്നു മൊഴി. പക്ഷേ, ഈ മരുന്ന് വാങ്ങിയെന്നു പറയുന്ന കടയില്‍ നടത്തിയ തെളിവെടുപ്പില്‍ ഇത് സാധൂകരിക്കാനുള്ള തെളിവൊന്നും കിട്ടിയില്ല. കടലില്‍ ചാടി ആത്മഹത്യയ്ക്ക് ശ്രമിച്ചപ്പോള്‍ ലൈഫ്ഗാര്‍ഡ് രക്ഷപ്പെടുത്തിയെന്ന് പറയുന്നതും വിശ്വസനീയമല്ല, സംഭവത്തിന് സാക്ഷികളുമില്ല.

സനു മോഹന്‍ ഗോവയിലെ ചൂതാട്ടത്തില്‍ എറിഞ്ഞത് അരലക്ഷത്തോളം രൂപയാണ്. കാര്‍ വിറ്റ തുകയില്‍ ഭൂരിഭാഗം ഇവിടെ ചെലവഴിച്ചതായി അന്വേഷണ സംഘം കണ്ടെത്തി. ഗോവയില്‍ മദ്യാപനവും ചൂതാട്ടവുമായിരുന്നു സനുവിന്റെ ആഘോഷം ബെംഗളൂരുവിലെ ബാറുകളിലും ചൂതാട്ട കേന്ദ്രങ്ങളിലും പണം കളഞ്ഞിട്ടുണ്ടെങ്കിലും കൂടുതല്‍ തുക ഗോവയിലാണ് ചെലവഴിച്ചിട്ടുള്ളതെന്ന് കണ്ടെത്തിയിട്ടുണ്ട്.