കേരളം വലിയൊരു മഹാമാരിയ്‌ക്കെതിരായ പോരാട്ടത്തിലാണ്. അതിനിടയ്ക്കാണ് ഒരിക്കലും കാണാത്ത ചേരിതിരിഞ്ഞുള്ള അടി. പ്രധാനമായും വാക്‌സിന് കേന്ദ്രസര്‍ക്കാര്‍ വില ഏര്‍പ്പെടുത്തിയതോടെയാണ് അടി തുടങ്ങിയത്.

ഇതിനോടൊപ്പം വാക്‌സിന്‍ ചലഞ്ച് എല്ലാവരും ഏറ്റെടുക്കുകയും ചെയ്തു. വാക്‌സിന്‍ ചലഞ്ചിനെ അനുകൂലിച്ചും പ്രതികൂലിച്ചും വലിയ വാദപ്രതിവാദമാണ് സോഷ്യല്‍മീഡിയയില്‍ നടക്കുന്നത്.

മുഖ്യമന്ത്രി പിണറായി വിജയനെയും വാക്‌സിന്‍ ചലഞ്ചിനെയും അധിക്ഷേപിച്ചുകൊണ്ടുള്ള സോഷ്യല്‍ മീഡിയാ പോസ്റ്റുമായി സംവിധായകന്‍ അലി അക്ബര്‍ രംഗത്തെത്തിയിരിക്കുകയാണ്. 'മോദി നല്‍കിയ വാക്‌സിന്‍ എടുത്ത് താങ്ങുന്ന' മുഖ്യമന്ത്രിയോട് താന്‍ നല്ല നമസ്‌കാരം പറയുകയാണെന്നും 'ഓരോ ദുരന്തത്തിലും ബക്കറ്റെടുത്ത് തെണ്ടുന്ന സര്‍ക്കാര്‍ ഒന്നേയുള്ളൂ' എന്നും മറ്റും സംവിധായകന്‍ തന്റെ സോഷ്യല്‍ മീഡിയാ കുറിപ്പ് വഴി പറയുന്നുണ്ട്.

കൂട്ടത്തില്‍ ഡല്‍ഹി മുഖ്യമന്ത്രി അരവിന്ദ് കേജ്‌രിവാളിനെതിരെയും അലി അക്ബര്‍ വിമര്‍ശനമുയര്‍ത്തുന്നുണ്ട്. '2020 ഡിസംബറില്‍ 8 ഓക്‌സിജന്‍ പ്ലാന്റുകള്‍ മോദി അനുവദിച്ചിട്ടും അതുപണിയാതെ ഒന്നുമാത്രം പണിത് ജനങ്ങളെ കൊലയ്ക്ക് കൊടുക്കുകയാണ്' കേജ്‌രിവാള്‍ സര്‍ക്കാര്‍ ചെയ്തതെന്നാണ് സംവിധായകന്റെ ആരോപണം. കുറിപ്പ് വാര്‍ത്തയായി മാറിയതോടെ നിരവധി പേരാണ് അലി അക്ബറിനെതിരെ കമന്റുകളിലൂടെയും മറ്റും രംഗത്ത് വന്നത്.

'1921 പുഴ മുതല്‍ പുഴ വരെ' എന്ന തന്റെ ചിത്രത്തിന്റെ നിര്‍മ്മാണ ചെലവിനായി 'മമധര്‍മ്മ' എന്ന കൂട്ടായ്മയുടെ പേരില്‍ പണം പിരിച്ച അലി അക്ബര്‍ വാക്‌സിന്‍ ചലഞ്ചിനെ വിമര്‍ശിക്കാന്‍ എന്തവകാശം എന്നാണ് സോഷ്യല്‍ മീഡിയ ചോദിക്കുന്നത്. CMDRFലേക്ക് പണം ജനങ്ങള്‍ പണം നല്‍കണമെന്ന് മുഖ്യമന്ത്രിയോ സര്‍ക്കാരോ ആവശ്യപ്പെട്ടിട്ടില്ലെന്നും സംസ്ഥാനം നേരിടുന്ന പ്രതിസന്ധി മനസിലാക്കി ജനങ്ങള്‍ സ്വമേധയാ മുന്നോട്ട് വരുമ്പോള്‍ അതിനെ അപഹസിക്കുന്നത് എന്തിനെന്നും ഇവര്‍ കമന്റുകള്‍ ഇടുന്നവര്‍ ചോദിക്കുന്നുണ്ട്.

കുറിപ്പ് ഇങ്ങനേയാണ്

'മാതൃഭൂമി പറയില്ല, മനോരമായോ ഏഷ്യാനെറ്റോ പറയില്ല...2020 ഡിസംബറില്‍ 8 ഓക്‌സിജന്‍ പ്ലാന്റുകള്‍ മോദി അനുവദിച്ചിട്ടും അതുപണിയാതെ ഒന്നുമാത്രം പണിതു ജനങ്ങളെ കൊലയ്ക്ക് കൊടുക്കുന്ന കേജരിവാളിന്റെ ഭരണനേട്ടം... അതങ്ങിനെയാ കേരളവും ആ സൂത്രപ്പണി തുടരുന്നു... 70 വര്‍ഷം ഭരിച്ചു മുടിച്ച കുടുംബ വാഴ്ചയായിരുന്നു ഇന്ന് ഭാരതത്തിലെങ്കില്‍, എന്താകുമായിരുന്നു എന്നാലോചിച്ചിട്ടുണ്ടോ... ഇന്ന് ലോകത്തെവിടെനിന്നും അടിയന്തിര ഘട്ടത്തില്‍ സാങ്കേതികത എത്തിക്കാന്‍ 24ത7 എന്ന നിലയില്‍ പ്രവര്‍ത്തിക്കുന്ന ഒരു കേന്ദ്രമുണ്ട്...




മോദിക്ക് മുന്‍പ് എന്തായിരുന്നു ഭാരതം എന്നും ഇന്ന് എന്താണ് ഭാരതം എന്നും തിരിച്ചറിയാത്തവരായി കമ്യുണിസ്റ്റുകളും, ജിഹാദികളും, അവരെ താങ്ങുന്ന മാമാ പത്രങ്ങളും മാത്രേയുള്ളൂ...മോദി നല്‍കിയ അന്നത്തില്‍ അരിവാള്‍ ചുറ്റിക ഒട്ടിച്ചു കേമനായ ഒരു മുഖ്യമന്ത്രിയും, എന്തുപറഞ്ഞാലും നോട്ടടിച്ചുകൂടെ എന്ന് ചോദിക്കുന്ന കയറുപിരിയും ജയിക്കുന്നിടത്ത് സത്യം തോല്‍ക്കുമെന്ന് കരുതരുത്...

മോദി തന്ന വാക്‌സിനെടുത്ത് മോദിക്ക് താങ്ങുന്ന പിണറായിക്ക് നല്ലനമസ്‌കാരം...ഓരോ ദുരന്തത്തിലും ബക്കെറ്റെടുത്ത് തെണ്ടുന്ന സര്‍ക്കാര്‍ ഒന്നേയുള്ളു പിണറായി സര്‍ക്കാര്‍.... മലയാളിക്ക് മറവി നല്ലതാണ്.... മോദി വൈരാഗ്യം മൂത്ത് ജനങ്ങളെ കാലപുരിക്കയക്കുന്ന സകല പിന്തിരിപ്പന്മാര്‍ക്കും നടുവിരല്‍ നമസ്‌കാരം... ഞാന്‍ മോദിജിക്കൊപ്പമാണ് കാരണം മോദി ജനങ്ങള്‍ക്കൊപ്പമാണ്...'