അരുവിക്കര ഫോട്ടോ ഫിനിഷിലേക്ക്. വികസന മുദ്രാവാക്യമുയര്‍ത്തി യുഡിഎഫും. അഴിമതി ആയുധമാക്കി എല്‍ഡിഎഫും. ഒത്തു തീര്‍പ്പു രാഷ്ട്രീയം പറഞ്ഞ് ബിജെപിയും ഫൈനല്‍ റൗണ്ടിലെത്തിയപ്പോള്‍ ശബരീനാഥും രാജഗോപാലും വിജയത്തിനായുള്ള പോരാട്ടത്തില്‍ നേര്‍ക്കുനേര്‍. അവസാന അടിയൊഴുക്കുകള്‍ ശബരീനാഥിന് മുന്‍തൂക്കം നല്കുന്നുവെങ്കിലും ബിജെപി മോഡി തരംഗം പ്രവര്‍ത്തിക്കുമെന്ന പ്രതീക്ഷയിലാണ്. വിഎസ് അച്യുതാനന്ദനില്‍ കേന്ദ്രീകരിച്ചു മുന്നേറ്റത്തിനൊരുങ്ങിയ സിപിഎം വിഎസ് തന്നെ അഴിമതികേസില്‍ ശിക്ഷിച്ചില്ല. ആര്‍ ബാലകൃഷ്ണപിള്ളയെ മുന്‍നിര്‍ത്തി അഴിമതി വിരുദ്ധ നീക്കം അപഹാസ്യമായി.
സരിത വിഷയത്തിലെ മുഖ്യകക്ഷിയായ കെ ബി ഗണേഷ്‌കുമാര്‍ എല്‍ഡിഎഫ് ക്യാമ്പില്‍ സജീവമായപ്പോള്‍ സരിത വിഷയവും ഏശിയില്ല. കൈരളിയും റിപ്പോര്‍ട്ടറും മാറി മാറി പടക്കം പൊട്ടിച്ചു വിഷയം കൊഴുപ്പിക്കാന്‍ ശ്രമിച്ചെങ്കിലും വേണ്ടത്ര ജനശ്രദ്ധയുണ്ടായില്ല. ബാര്‍ക്കോഴ കേസില്‍ കെ എം മാണിയെ ഒറ്റ തിരിഞ്ഞാക്രമിക്കുക വഴി ന്യൂനപക്ഷ വോട്ടുകളില്‍ എല്‍ഡിഎഫ് വിള്ളല്‍ വീഴ്ത്തി. കാരുണ്യ ലോട്ടറി പോലുള്ള പദ്ധതികളിലൂടെ ജനങ്ങള്‍ക്കിടയിലുണ്ടായ കെ എം മാണിയുടെ ജനപ്രീതി അഴിമതി ആരോപണത്തിന്റെ മുള്‍മുനയില്‍ നിര്‍ത്തി പൊരിക്കാനുള്ള എല്‍ഡിഎഫ് തന്ത്രവും പാളി. പാന്നൂരില്‍ പൊട്ടിയ ബോംബും അക്രമ രാഷ്ട്രീയവും ടി. പി വധവുമെല്ലാം എല്‍ഡിഎഫിനെതിരെ ബിജെപി ആയുധമാക്കി.
ആക്രമണത്തില്‍ നിന്ന് പലപ്പോഴും പ്രതിരോധത്തിലേക്ക് പോര്‍മുഖം തിരിക്കേണ്ടി വന്നു എല്‍ഡിഎഫിന്. യുഡിഎഫിന് വിഴിഞ്ഞം, ലൈറ്റ് മെട്രോ തുടങ്ങി ഏറെ വികസന കഥകള്‍ നിരത്താനുണ്ടായിരുന്നു. തെളിവുകളില്ലാത്ത അഴിമതി ആരോപണങ്ങളെന്നു പറഞ്ഞ് സോളാറും, ബാര്‍ക്കോഴയുമെല്ലാം പ്രതിരോധിക്കാനും യുഡിഎഫിനായി.
മോഡി തരംഗം വോട്ടായി മാറും എന്ന കണക്കുകൂട്ടലിലാണ് ബിജെപി ഇപ്പോള്‍. ബിജെപി വിജയിക്കുമെന്ന ഉറച്ച ആത്മവിശ്വാസത്തിലാണ്. അരുവിക്കരയിലെ ജനങ്ങള്‍ താമരയെ രണ്ട് കൈനീട്ടിയും സ്വീകരിക്കുമെന്ന് തന്നെയാണ് ബിജെപിയുടെ വിശ്വാസവും. ബിജെപി വിജയിക്കുന്നതിനായി നടന്‍ സുരേഷ് ഗോപി ആവേശത്തോടെ മുന്നോട്ടിറങ്ങിയതും ബിജെപിയ്ക്ക് ഗുണം ചെയ്യുമെന്നാണ് മനസിലാക്കേണ്ടത്. അരുവിക്കരയില്‍ ബിജെപി സ്ഥാനാര്‍ഥി ഒ.രാജഗോപാല്‍ വിജയിച്ചാല്‍ വികസനത്തിന്റെ മാജിക് സംഭവിക്കുമെന്നാണ് സുരേഷ് ഗോപി പ്രചാരണത്തിനിടെ പറഞ്ഞത്.
ഒരുപക്ഷെ, അത് സംഭവിച്ചേക്കാം. അരുവിക്കരയില്‍ ബിജെപി ചരിത്രവിജയം നേടുമെന്ന് കേരള കോണ്‍ഗ്രസ് (നാഷണലിസ്റ്റ്) ചെയര്‍മാന്‍ അഡ്വ.നോബിള്‍ മാത്യു അടുത്തിടെ വ്യക്തമാക്കിയിരുന്നു. ബിജെപി വിജയം ഉറപ്പാക്കിയതിനെ തുടര്‍ന്ന് തെരഞ്ഞെടുപ്പ് അട്ടിമറിക്കാന്‍ കോണ്‍ഗ്രസും അക്രമത്തിന് സിപിഎമ്മും ശ്രമം തുടങ്ങിയിരിക്കുകയാണെന്നും മാത്യു പറഞ്ഞിരുന്നു. ബിജെപി സമൂഹത്തിന്റെ നന്മ നിറഞ്ഞ സംസ്‌കാരത്തെ തുറന്ന് കാട്ടുകയാണ് ചെയ്യുന്നത്. കൂടാതെ നടന്‍ മോഹന്‍ലാല്‍ ബിജെപിയിലേക്ക് വരുന്നുവെന്ന വാര്‍ത്തയും ബിജെപിയെ വിജയിക്കാന്‍ സഹായിക്കുമെന്ന് വേണം കരുതാന്‍.
അരുവിക്കര ഉപതെരഞ്ഞെടുപ്പ് പോരാട്ടത്തിന്റെ പരസ്യപ്രചാരണം ഇന്ന് വൈകിട്ടോടെ അവസാനിക്കും. വൈകിട്ട അഞ്ചിനാണ് കലാശക്കൊട്ട്. കേരളം ഉറ്റുനോക്കുന്ന ഫലത്തിനായി അരുവിക്കരയിലെ 1,84,223 പേര്‍ 27ന് വിധിയെഴുതും. ബിജെപിയും കോണ്‍ഗ്രസും സിപിഎമ്മും ഒരുപോലെ പ്രതീക്ഷയിലാണ് ഇപ്പോള്‍. അരുവിക്കരയില്‍ വന്‍സുരക്ഷയാണ് ഏര്‍പ്പെടുത്തുന്നത്. 1,600ന് മുകളില്‍ പോലീസുകാരെ വിന്യസിക്കുമെന്നാണ് ഇപ്പോള്‍ അറിയുന്നത്. മൂന്ന് കമ്പനി ബിഎസ്എഫും സുരക്ഷയ്ക്കായുണ്ട്.
നാളെ നെടുമങ്ങാട് ഗവ. ഗേള്‍സ് ഹൈസ്‌കൂളില്‍ നിന്നും പോളിങിനുള്ള ഉപകരണങ്ങള്‍ വിതരണം ചെയ്യും. 308 ഇലക്ട്രോണിക് വോട്ടിങ് യന്ത്രമാണ് തിരഞ്ഞെടുപ്പില്‍ ഉപയോഗിക്കുന്നത്. കേടായാല്‍ മാറ്റി ഉപയോഗിക്കാനുള്ള യന്ത്രങ്ങളുമുണ്ട്. ഒരു ബൂത്തില്‍ രണ്ട് വോട്ടിങ് യന്ത്രമുണ്ടാകും. ഒരു യന്ത്രത്തില്‍ സ്ഥാനാര്‍ഥികളായ 16 പേരും രണ്ടാമത്തെ യന്ത്രത്തില്‍ നോട്ടയുമാണ്. നിശബ്ദ പ്രചാരണം അവസാനിക്കുന്നതോടെ സ്ഥാനാര്‍ത്ഥികളും ജനങ്ങളും പിന്നെ പോളിംഗ് ബൂത്തിലേക്ക്. വിധിയെഴുതാന്‍ ഇനി മണിക്കൂറുകള്‍ മാത്രം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha