രണ്ടാം പിണറായി സര്‍ക്കാര്‍ മന്ത്രിസഭയില്‍ ആരൊക്കെയുണ്ടെന്നതിന്റെ സൂചനകള്‍ ഒന്നൊന്നായി പുറത്താകുകയാണ്. കഴിഞ്ഞ സര്‍ക്കാരിന്റെ കാലത്തെ മന്ത്രിമാരില്‍ ബഹുഭൂരിപക്ഷവും കാണില്ല എന്നാണ് വിലയിരുത്തുന്നത്. അതേസമയം പുതുമുഖങ്ങള്‍ക്ക് ഏറെ അവസരവും നല്‍കുമെന്നാണ് വിലയിരുത്തുന്നത്.

വിദ്യാഭ്യാസ വകുപ്പ് ആരെ ഏല്‍പ്പിക്കുമെന്നുള്ളതാണ് ഏറ്റവുമധികം ചര്‍ച്ച ചെയ്യുന്നത്. ഉന്നതവിദ്യാഭ്യാസ സ്ഥാപനങ്ങളുടെ ശാക്തീകരണം പ്രധാനലക്ഷ്യമായി രണ്ടാം പിണറായി സര്‍ക്കാരിന് മുന്നിലുള്ള സാഹചര്യത്തില്‍ മികച്ച പ്രകടനം കാഴ്ചവയ്ക്കാന്‍ കഴിയുന്നവരെ വകുപ്പ് ഏല്‍പ്പിക്കണമെന്നാണ് പൊതുഅഭിപ്രായം.

കെ.എന്‍.ബാലഗോപാലിന്റെയും വീണാ ജോര്‍ജ്ജിന്റെയും പേരുകളാണ് പ്രധാനമായും പരിഗണിക്കുന്നത്. കഴിഞ്ഞ അഞ്ചുവര്‍ഷക്കാലം സി.പി.എമ്മിന്റെ ഭാഗത്ത് നിന്ന് വിദ്യാഭ്യാസവകുപ്പിന്റെ പ്രവര്‍ത്തനങ്ങള്‍ ഏകോപിപ്പിച്ചത് ബാലഗോപാലാണ്. വിദ്യാഭ്യാസ രംഗവുമായുള്ള അദ്ദേഹത്തിന്റെ പരിചയസമ്പത്തും അനുകൂല ഘടകമാണ്. അതേസമയം വീണാജോര്‍ജിനെ പരിഗണിക്കുന്നതില്‍ സാമുദായിക ഘടകം കൂടിയുണ്ട്.

ക്രൈസ്തവ വിഭാഗങ്ങള്‍ക്ക് കഴിഞ്ഞ സര്‍ക്കാരിന്റെ കാലത്ത് നല്‍കിയ പരിഗണന കുറവായിരുന്നുവെന്ന പരാതി ഉയര്‍ന്നിരുന്നു. തിരഞ്ഞെടുപ്പിന് മുന്നോടിയായി പിണറായി വിജയന്‍ നടത്തിയ കേരളയാത്രയില്‍ പങ്കെടുത്ത ക്രൈസ്തവ മേലദ്ധ്യക്ഷന്‍മാരും ഇക്കാര്യം ഉന്നയിച്ചിരുന്നു. ക്രൈസ്തവ വിഭാഗങ്ങള്‍ക്ക് നിര്‍ണായക സ്വാധീനമുള്ള വിദ്യാഭ്യാസമേഖലയുടെ ചുമതല അവരില്‍ ഒരാളെ ഏല്‍പ്പികുകയെന്ന ലക്ഷ്യവും ഇതിന് പിന്നിലുണ്ട്. സുപ്രധാന വകുപ്പ് ആവശ്യപ്പെട്ടുന്ന ജോസ്.കെ.മാണി വിഭാഗത്തിലും വിദ്യാഭ്യാസ വകുപ്പില്‍ താത്പര്യമുണ്ട്.

രണ്ടാം പിണറായി വിജയന്‍ സര്‍ക്കാരിന്റെ കാലത്ത് വിദ്യാഭ്യാസത്തെ വീണ്ടും ഒറ്റ വകുപ്പാക്കാനുള്ള ആലോചനയാണ് നടക്കുന്നത്. പൊതുവിദ്യാഭ്യാസത്തെയും ഉന്നതവിദ്യാഭ്യാസത്തെയും രണ്ടായി പിരിച്ച് രണ്ട് മന്ത്രിമാര്‍ക്ക് നല്‍കിയ പരീക്ഷണം ഫലം കണ്ടില്ലെന്ന വിലയിരുത്തലിലാണിത്.

പൊതുവിദ്യാഭ്യാസ മേഖലയുള്ള ഉന്നമനത്തിന് കഴിഞ്ഞ അഞ്ചു വര്‍ഷം നടപ്പാക്കിയ പൊതുവിദ്യാഭ്യാസ സംരക്ഷണ യജ്ഞത്തിന്റെ വിജയപാത പിന്തുടര്‍ന്ന് ഉന്നതവിദ്യാഭ്യാസ മേഖലയ്ക്കാണ് അടുത്ത അഞ്ചുവര്‍ഷം പിണറായിസര്‍ക്കാര്‍ മുന്‍ഗണ നല്‍കുന്നത്. ഇത് മുന്നില്‍ കണ്ടാണ് ലയനത്തെ കുറിച്ച് ആലോചിക്കുന്നത്. കഴിഞ്ഞ സര്‍ക്കാരിന്റെ തുടക്കത്തില്‍ വിദ്യാഭ്യാസ വകുപ്പിന്റെ ചുമതല പ്രൊഫ.സി.രവീന്ദ്രനാഥിനായിരുന്നെങ്കിലും കാര്യക്ഷമത വര്‍ദ്ധിപ്പിക്കാനെന്ന പേരിലാണ് ഉന്നതവിദ്യാഭ്യാസത്തെ പിരിച്ച് കെ.ടി.ജലീന് നല്‍കിയത്.

എന്നാല്‍ ഇത് ഇരുവകുപ്പുകളിലും പ്രതിസന്ധിയുണ്ടാക്കി. സ്‌ക്കൂള്‍ തലത്തില്‍ കരിക്കുലം കമ്മിറ്റികളില്‍ ഉള്‍പ്പെടെ ഉന്നതവിദ്യാഭ്യാസ വകുപ്പിന്റെ സഹകരണം ആവശ്യമാണ് എന്നാല്‍ ഉദ്യോഗസ്ഥരെ യഥാസമയം പരിശീലനങ്ങളില്‍ നിയോഗിക്കാന്‍ പോലും കഴിയാതെ വന്നു. തൊഴിലധിഷ്ഠിത പഠനം ലക്ഷ്യമിടുന്ന അസാപ്, വിദ്യാഭ്യാസ മേഖലയ്ക്ക് ഒന്നാകെയുള്ള കൈറ്റ് തുടങ്ങിയ മേഖലകളുടെ പ്രവര്‍ത്തനത്തെയും സാരമായി ബാധിച്ചു.

വിദ്യാഭ്യാസത്തിന് ഒരു മന്ത്രിയാണെങ്കില്‍ തീരുമാനങ്ങള്‍ നടപ്പാക്കുന്നതില്‍ കാലതാമസം ഒഴിവാകുമെന്നതാണ് വിലയിരുത്തല്‍. അതിനാല്‍ തന്നെ ആരാകും വിദ്യാഭ്യാസ മന്ത്രിയാകുമെന്ന ആകാംക്ഷയിലാണ് കേരളം.