ട്രെയിനില്‍ യുവതിയെ ആക്രമിച്ച നൂറനാട് മറ്റപ്പള്ളി സ്വദേശി ബാബുക്കുട്ടന്‍ പിടിയില്‍.... എറണാകുളം മുളന്തുരുത്തിയില്‍ ട്രെയിനില്‍ യുവതിയെ ആക്രമിച്ച നൂറനാട് മറ്റപ്പള്ളി സ്വദേശി ബാബുക്കുട്ടനെ (35) ചിറ്റാറില്‍ നിന്ന് പൊലീസ് പിടികൂടി.


ഇവിടെ ഒളിവില്‍ കഴിയുകയായിരുന്നു. ചിറ്റാര്‍ സ്റ്റേഷനില്‍ വച്ച് ജന്നി വന്നതിനെ തുടര്‍ന്ന് പ്രതിയെ രാത്രി ആശുപത്രിയില്‍ പ്രവേശിപ്പിച്ചു.

കഴിഞ്ഞ 28ന് രാവിലെ ഗുരുവായൂര്‍- പുനലൂര്‍ പാസഞ്ചര്‍ ട്രെയിനില്‍വച്ച് ചെങ്ങന്നൂരിലെ വിദ്യാഭ്യാസ ഡപ്യൂട്ടി ഡയറക്ടറേറ്റ് ഓഫീസിലെ ക്ലര്‍ക്കും മുളന്തുരുത്തി കാരിക്കോട് കാര്‍ത്ത്യായനി ഭവനില്‍ രാഹുലിന്റെ ഭാര്യയുമായ ആശയാണ് (32) ആക്രമിക്കപ്പെട്ടത്.രക്ഷപ്പെടാന്‍ പുറത്തേക്ക് ചാടിയ ആശയ്ക്ക് സാരമായി പരിക്കേറ്റിരുന്നു.ഇന്നലെയാണ് ആശുപത്രി വിട്ടത്.


ഒളിവില്‍ കഴിയാന്‍ ഇന്നലെ രാവിലെ ചിറ്റാറിലെ പിതൃസഹോദരിയുടെ വീട്ടില്‍ എത്തിയെങ്കിലും അവര്‍ ഇറക്കിവിട്ടു. തുടര്‍ന്ന് വനത്തില്‍ ഒളിച്ചിരിക്കുകയായിരുന്നു. വിവരം അറിഞ്ഞ നാട്ടുകാര്‍ ബാബുക്കുട്ടനെ തെരയുന്നതിനിടെയാണ് ചിറ്റാര്‍ - നീലിപിലാവ് വനപാതയിലൂടെ വൈകുന്നേരം ആറരയോടെ ഒരാള്‍ നടന്നു പോകുന്നത് കണ്ടത്.

ഇരുവശവും കൊടുംവനമായ ഈ പാതയില്‍ കാട്ടുമൃഗങ്ങള്‍ ഇറങ്ങാറുണ്ട്. വൈകിട്ട് ഇരുട്ടുപരന്നാല്‍ ആളുകള്‍ ഒറ്റയ്ക്ക് നടന്നുപോകാറില്ല. ഈ സമയം ഒരാള്‍ കൂളിംഗ് ഗ്ലാസ് വച്ച് ഒറ്റയ്ക്ക് നടന്നു പോയത് ചിലരില്‍ സംശയം ജനിപ്പിച്ചു. അവര്‍ പൊലീസില്‍ അറിയിച്ചു.

എസ്.ഐ ബിജു കുമാറിന്റെ കാറില്‍ മഫ്തിയിലെത്തിയ പൊലീസ് ഇയാളെ തടഞ്ഞ് ചോദ്യം ചെയ്യുകയായിരുന്നു. പേര് ചോദിച്ചപ്പോള്‍ ബാബുക്കുട്ടനാണെന്ന് പറയുകയും കുറ്റം സമ്മതിക്കുകയും ചെയ്തു.

എറണാകുളം പരവൂരില്‍ നിന്ന് ബസ് കയറിയാണ് ചിറ്റാറിലെത്തിയതെന്ന് ബാബുക്കുട്ടന്‍ പറഞ്ഞു. എന്നാല്‍, സംഭവത്തിന്റെ പിറ്റേന്ന് പ്രതി ഉപേക്ഷിച്ച ആശയുടെ ഐഡന്റിറ്റി കാര്‍ഡ് ചെങ്ങന്നൂര്‍ സ്റ്റേഷന് സമീപത്തുനിന്ന് ലഭിച്ചിരുന്നു. ചെങ്ങന്നൂരില്‍ നിന്ന് കോഴഞ്ചേരി വഴി ഇയാള്‍ ചിറ്റാറിലെ വനമേഖലയില്‍ എത്തിയതായും പൊലീസ് സംശയിക്കുന്നു.

രണ്ട് ഡിവൈ.എസ്.പിമാരുടെ നേതൃത്വത്തില്‍ 20 അംഗസംഘം കേരളത്തിലും പുറത്തും അന്വേഷണം നടത്തുന്നതിനിടെയാണ് പ്രതി അറസ്റ്റിലായത്.റെയില്‍വേ പൊലീസ് ലുക്കൗട്ട് നോട്ടീസ് പുറപ്പെടുവിച്ചിരുന്നു.