നിയമസഭാ തിരഞ്ഞെടുപ്പിൽ മത്സരിച്ച എല്ലാ മണ്ഡലങ്ങളിലും ബി.ജെ.പി പരാജയപ്പെട്ടതിനു പിന്നാലെ പരിഹാസവുമായി യൂത്ത്‌ കോൺഗ്രസ് സംസ്ഥാന പ്രസിഡന്റ് ഷാഫി പറമ്പിൽ എം.എൽ.എ.

കേരളത്തിലെ ജനങ്ങള്‍ വിവേകവും വിദ്യാഭ്യാസവും ഉള്ളവരാണെന്ന് പ്രധാനമന്ത്രി നരേന്ദ്ര മോദി നേരത്തെ പറഞ്ഞിട്ടുണ്ടെന്നും അതാണ് ബി.ജെ.പി സംസ്ഥാന അദ്ധ്യക്ഷന്‍ കെ. സുരേന്ദ്രനോടുള്ള മറുപടിയെന്നും അദ്ദേഹം ഫേസ്ബുക്കിൽ കുറിച്ചു.

മോദിയുടെ പാലക്കാട് തിരഞ്ഞെടുപ്പ് പ്രചാരണത്തിനിടയിലെ വാക്കുകള്‍ പങ്കുവച്ചു കൊണ്ടാണ് ഷാഫിയുടെ മറുപടി. പൂജ്യത്തെ മലയാളികള്‍ ഇത്രയും ഇഷ്ടപ്പെട്ട ഒരു കാലമുണ്ടായിട്ടുണ്ടാവില്ലെന്നും അദ്ദേഹം കൂട്ടിച്ചേര്‍ത്തു.

വാശിയേറിയ പോരാട്ടത്തിനൊടുവിൽ മെട്രോമാൻ ഇ. ശ്രീധരനെ നിലംപരിശാക്കി കൊണ്ടാണ് ഷാഫി പാലക്കാട് മണ്ഡലത്തിൽ നിന്നും വീണ്ടും നിയമസഭയിലേക്കെത്തുന്നത്. 3859 വോട്ടിന്റെ ഭൂരിപക്ഷത്തിലാണ് ശ്രീധരനെ അദ്ദേഹം പരാജയപ്പെടുത്തിയത്.

കേരളത്തിലെ ബി.ജെ.പിയുടെ അവസാന സീറ്റ് പ്രതീക്ഷയും ഇല്ലാതാക്കിയത് ഷാഫിയുടെ വിജയമായിരുന്നു. ബി.ജെ.പിയുടെ കേരളത്തിലെ ഒരോയൊരു സിറ്റിം​ഗ് സീറ്റായ നേമവും ഇത്തവണത്തെ തിരഞ്ഞെടുപ്പോടെ അവർക്ക് നഷ്ടമായിരുന്നു.

അതേസമയം, സംസ്ഥാനത്ത് വിവിധ മണ്ഡലങ്ങളിൽ ബിജെപി വോട്ടുകച്ചവടം നടത്തിയെന്ന മുഖ്യമന്ത്രി പിണറായി വിജയന്റെ ആരോപണം നിഷേധിച്ച് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ കഴിഞ്ഞ ദിവസം രംഗത്തെത്തിയിരുന്നു.

2016 ലെ തിരഞ്ഞെടുപ്പിനെ അപേക്ഷിച്ച് ബിജെപിക്ക് വോട്ട് കുറഞ്ഞു. പാർട്ടിക്ക് സംഭവിച്ച തോൽവിയുടെ പ്രാഥമിക ഉത്തരവാദിത്വം സംസ്ഥാന അദ്ധ്യക്ഷനായ തനിക്കാണെന്നും തോൽവിയെ സംബന്ധിച്ചുള‌ള കാര്യങ്ങൾ കേന്ദ്ര ഘടകത്തെ അറിയിച്ചിട്ടുണ്ടെന്നും കെ.സുരേന്ദ്രൻ പറയുകയുണ്ടായി.