നിരവധി ഗാനങ്ങളുടെ കവർ രൂപങ്ങൾ അവതരിപ്പിച്ച് ശ്രദ്ധ നേടി സൈബർ ലോകത്ത് ഹിറ്റായ ഗായികയാണ് ആര്യ ദയാൽ. സമൂഹമാധ്യമങ്ങളിൽ നിരവധി ആരാധകരുള്ള ആര്യ കഴിഞ്ഞ ദിവസം പുറത്തിറക്കിയ ഒരു കവർ ഗാനം പക്ഷേ ട്രോളുകളും വിമർശനങ്ങളും ഏറ്റു വാങ്ങുകയാണ്. ഗായിക ആര്യ ദയാലിന്‍റെ പുതിയ ജാം സെഷന് ട്രോൾ പെരുമഴയാണ് സോഷ്യൽ മീഡിയയിൽ.

ആര്യയും സുഹൃത്ത് സാജനും ചേർന്ന് പുറത്തിറക്കിയ ഹാരിസ് ജയരാജ് സംഗീത സംവിധാനം നിര്‍വഹിച്ച വാരണം ആയിരത്തിലെ 'അടിയേ കൊള്ളുതേ' എന്ന സൂപ്പർ ഹിറ്റ് ഗാനത്തിന്‍റെ കവർ വേർഷനാണ് യൂട്യൂബിൽ ഡിസ്‌ലൈക്ക് അടി വാങ്ങി ട്രെൻഡിങ്ങിൽ ഒന്നാമതെത്തിയത്.

പാട്ടിനെ ക്ലാസ്സിക്കൽ രീതിയിലേക്ക് മാറ്റിയ താരത്തിന്റെ പരീക്ഷണത്തെയാണ് ആരാധകർ ഡിസ് ലൈക്ക് കൊണ്ട് മൂടിയത്. ഇതിനിടെ ​ഗാനം യൂറ്റ്യൂബിൽ ട്രെന്റിങ്ങിൽ നമ്പർ 1ായി എത്തിയിട്ടുമുണ്ട്. ഇതിനോടകം 4 ലക്ഷത്തോളം അടുപ്പിച്ച് ആളുകളാണ് വീഡിയോ കണ്ടത്.

‘കുപ്രസിദ്ധി’ നേടി ട്രെൻഡിങ്ങിൽ ഒന്നാമതെത്തിയ ഗാനത്തിന് മിനിറ്റ് വച്ചാണ് ഡിസ്‌ലൈക്ക് വർധിച്ചു വരുന്നത്. വിമർ‌ശനങ്ങൾ വർധിച്ചതോടെ ഇതൊരു കവർ‌ ഗാനമല്ലെന്നും ‘ജാം സെഷൻ’ ആയിരുന്നുവെന്നും ആര്യ വിശദീകരണം നൽകിയിട്ടുണ്ട്. ‘ഉണ്ടല്ലോ എയറിൽ ഉണ്ടല്ലോ’, ‘പെർഫെക്റ്റ് ഒക്കെ’ തുടങ്ങി നിരവധി ട്രോൾ–വിമർശന കമന്റുകളാണ് യൂട്യൂബിൽ നിറയെ.

അതിൽ ഏറെ ഹിറ്റായ കമന്റ് ചൈനയുടെ ഒരു റോക്കറ്റ് പോണുണ്ട് അതിനെ തട്ടാതെ പറക്കണം എന്നായിരുന്നു. നിമിഷങ്ങൾക്കകം വിമർശിക്കാനെന്നോണം ഒത്തുകൂടിയവർ അവനാൽ പറ്റുന്ന കൊട്ട് കൊടുത്തിട്ടാണ് പോയതും.

പുറകിൽ നിക്കുന്ന പുള്ളി ഒറിജിനൽ വേർഷൻ ആണ് കേൾക്കുന്നത് എന്ന് തോന്നുന്നു അല്ലെങ്കിൽ അവൻ ഒരു നല്ല നടൻ ആണെന്നും പലരും ട്രോള്ളുന്നത് കണ്ടു എന്താ സംഭവം എന്നറിയാൻ വന്നതാണെന്നും പറഞ്ഞ് മറ്റു ചിലരും ഉണ്ട്.

ഹാരിസ് ജയരാജ് ഈണമിട്ട് ക്രിഷ്, ബെന്നി ദയാൽ, ശ്രുതി ഹാസൻ എന്നിവർ ചേർന്ന് പാടിയതാണ് ‘അടിയേ കൊല്ലുതേ’ എന്ന ഗാനത്തിന്റെ യഥാർഥ രൂപം. സൂപ്പർഹിറ്റ് ചിത്രമായ വരാണം ആയിരത്തിലെ ഈ ഗാനം അന്നും ഇന്നും പ്രേക്ഷകർക്ക് ഏറെ പ്രിയപ്പെട്ട ഒന്നാണ്. ചിത്രം പുറത്തിറങ്ങിയ കാലത്ത് ഹിറ്റ് ലിസ്റ്റിലും ഈ ​ഗാനം ഇടം പിടിച്ചിരുന്നു.

'സഖാവ്' എന്ന കവിതയുടെ ആലാപനത്തിലൂടെ സംഗീത പ്രേമികളെയാകെ കയ്യിലെടുത്ത ഗായികയാണ് കണ്ണൂർ സ്വദേശിയായ ആര്യ ദയാൽ. കഴിഞ്ഞ ലോക്ക്ഡൗണില്‍ ആര്യയുടെ കവര്‍ വേര്‍ഷനുകള്‍ വളരെ ശ്രദ്ധനേടി. ഷേപ്പ് ഓഫ് യൂ എന്ന ഗാനത്തിന്റെ കര്‍ണാടിക് ഫ്യൂഷന് ഗംഭീര വരവേല്‍പ്പ് ലഭിക്കുകയും അമിതാഭ് ബച്ചനടക്കം അഭിനന്ദിക്കുകയും ചെയ്തിരുന്നു.

കൊവിഡ് കാലത്ത് തന്റെ ആശുപത്രി ജീവിതത്തെ പ്രകാശ പൂരിതമാക്കിയ സംഗീതമെന്നാണ് ആര്യദയാലിനെക്കുറിച്ച് അമിതാബ് ബച്ചന്‍ പറഞ്ഞിരുന്നത്. ഈയിടെ ആര്യ ചെയ്ത സ്വതന്ത്ര മ്യൂസിക് വീഡിയോകളായ അങ്ങനെ വേണം, ട്രൈ മൈ സെല്‍ഫ് എന്നിവയെല്ലാം വലിയ ഹിറ്റുകളായിരുന്നു.

പിന്നാലെ തന്നെ വിമര്‍ശനങ്ങള്‍ക്കും ട്രോളുകള്‍ക്കും ഗായിക ആര്യദയാൽ മറുപടിയും നൽകിയിരുന്നു. 'പാട്ടിന്റെ കവര്‍ വേര്‍ഷനല്ല യൂട്യൂബ് ചാനലില്‍ അപ് ലോഡ് ചെയ്തിരിക്കുന്നതെന്നും പാടുന്നതിന് മുമ്പുള്ള ജാം സെഷനായിരുന്നുവെന്നും ദയവായി രണ്ടും തമ്മിലുള്ള വ്യത്യാസം മനസിലാക്കണമെന്നുമായിരുന്നു ആര്യ ദയാല്‍ പറഞ്ഞത്.