ഭക്ഷ്യ കിറ്റും പെന്‍ഷനുമാണ് സര്‍ക്കാരിന് തുടര്‍ഭരണം നല്‍കിയതെന്ന് എല്ലാവര്‍ക്കുമറിയാം. എന്നാല്‍ ജയിച്ച സാഹചര്യത്തില്‍ കിറ്റ് ഇനി ഗോവിന്ദ എന്ന രീതിയില്‍ ആക്ഷേപമുണ്ടായിരുന്നു. പക്ഷെ എല്ലാവരേയും ഞെട്ടിപ്പിച്ച് സംസ്ഥാനം വീണ്ടും ഭക്ഷ്യ കിറ്റ് വിതരണം ചെയ്യുകയാണ്.

കോവിഡ് രൂക്ഷമായി തുടരുന്ന സാഹചര്യത്തില്‍ റേഷന്‍ കടകള്‍ വഴിയുള്ള ഭക്ഷ്യക്കിറ്റ് വിതരണം 15 ന് ആരംഭിച്ചേക്കും. ആദ്യഘട്ടത്തില്‍ അന്ത്യോദയ അന്നയോജന (മഞ്ഞ) റേഷന്‍ കാര്‍ഡ് ഉടമകള്‍ക്കാണു കിറ്റ് നല്‍കുക. 10 ഇനങ്ങളാകും കിറ്റില്‍. എല്‍ഡിഎഫിനു തുടര്‍ഭരണം ലഭിച്ച ശേഷം വിതരണം ചെയ്യുന്ന ആദ്യ കിറ്റാണിത്. പുതിയ സര്‍ക്കാര്‍ അധികാരമേല്‍ക്കും മുന്‍പു തന്നെ കിറ്റ് നല്‍കുന്നുവെന്ന സവിശേഷതയുമുണ്ട്.
കഴിഞ്ഞ സര്‍ക്കാരിന്റെ കാലത്ത്, 2020 ലെ ലോക്ഡൗണ്‍ കാലം മുതല്‍ ഈ വര്‍ഷം ഏപ്രില്‍ വരെ 9 കിറ്റുകളാണു നല്‍കിയത്. ഏപ്രിലിലെ കിറ്റ് വിതരണം ഇപ്പോഴും തുടരുകയാണ്.

അസംഘടിത മേഖലയിലുള്ളവരും സ്ഥിരം തൊഴില്‍ ഇല്ലാത്തവരും കോവിഡും ലോക്ഡൗണും മൂലം പ്രതിസന്ധിയിലായതിനാല്‍ കിറ്റ് ഉടനടി നല്‍കാന്‍ സപ്ലൈകോയ്ക്കു ഭക്ഷ്യപൊതുവിതരണ വകുപ്പ് വാക്കാല്‍ നിര്‍ദേശം നല്‍കി. ഉത്തരവ് ഈയാഴ്ച ഇറങ്ങും.

പ്രധാനമന്ത്രി ഗരീബ് കല്യാണ്‍ അന്ന യോജന (പിഎംജികെഎവൈ) അനുസരിച്ചു കേന്ദ്ര സര്‍ക്കാര്‍ 2 മാസത്തേക്കു പ്രഖ്യാപിച്ച സൗജന്യ റേഷന്‍ വിതരണം 15 നു ശേഷം തുടങ്ങും. ഏകദേശം 31 ലക്ഷത്തോളം വരുന്ന മഞ്ഞ, പിങ്ക് കാര്‍ഡുകളിലെ ഓരോ അംഗത്തിനും 5 കിലോ അരി അല്ലെങ്കില്‍ ഗോതമ്പ്, ഒരു കിലോ പയര്‍ അല്ലെങ്കില്‍ കടല നല്‍കുന്ന സംവിധാനമാണിത്. കഴിഞ്ഞ വര്‍ഷം 6 മാസമാണ് പിഎംജികെഎവൈ പദ്ധതി പ്രകാരം സൗജന്യ റേഷന്‍ നല്‍കിയത്.

അതേസമയം കിറ്റിനെ ചൊല്ലി ഇപ്പോഴും രാഷ്ട്രീയ പാര്‍ട്ടികള്‍ തമ്മില്‍ തര്‍ക്കം തുടരുകയാണ്. കേന്ദ്രത്തില്‍ നിന്ന് സംസ്ഥാനത്തിന് അരിയെത്തിയ വിവരം പങ്കുവച്ച് ഭക്ഷ്യക്കിറ്റ് ഈ മാസവും തുടരും എന്ന് ബി.ജെ.പി നേതാവ് എം.ടി.രമേശിന് മറുപടിയുമായി സി.പി.എം കണ്ണൂര്‍ ജില്ലാ സെക്രട്ടറി എം.വി. ജയരാജന്‍ രംഗത്തെത്തി. കേന്ദ്രത്തില്‍ നിന്ന് 70,000 മെട്രിക്ക് ടണ്‍ അരിയെത്തി, വീണ്ടും കിറ്റ് വിതരണം എന്ന വാര്‍ത്ത പങ്കുവച്ചായിരുന്നു എം.ടി. രമേശിന്റെ പോസ്റ്റ്.

എന്നാല്‍ കിറ്റ് വിതരണം സംബന്ധിച്ച് ആശയക്കുഴപ്പുണ്ടാക്കാനുള്ള ശ്രമമാണ് ബി.ജെ.പി നേതാവ് നടത്തുന്നത് എന്നാണ് എംവി ജയരാജന്റെ മറുപടി. ബിജെപി നേതാവേ, ഒരുകാര്യം പ്രത്യേകം ഓര്‍മ്മിപ്പിക്കട്ടെ ' കിറ്റില്‍ അരിയില്ല' എന്ന് തുടങ്ങുന്ന ഫേസ്ബുക്ക് പോസ്റ്റില്‍. ദുരിതാശ്വാസ നിധിയിലേക്ക് നന്മ ചോര്‍ന്നുപോകാത്തവര്‍ ഇതിനായി നല്‍കിയ തുകയുള്‍പ്പടെ ഉപയോഗിച്ചാണ് മഹാമാരി ഘട്ടത്തില്‍ ആരും പട്ടിണിയാകാതിരിക്കാന്‍ സംസ്ഥാന സര്‍ക്കാര്‍ ഇടപെട്ടതെന്ന് അദ്ദേഹം വ്യക്തമാക്കുന്നു. ഒപ്പം, കോവിഡ് രോഗികള്‍ക്കുള്‍പ്പടെ സമയത്ത് ഭക്ഷണമെത്തിച്ചുനല്‍കാന്‍ സാമൂഹ്യ അടുക്കളകളും ആരംഭിച്ചു.



കേരളത്തില്‍ കോവിഡ് പ്രതിസന്ധി ഘട്ടത്തില്‍ ആരും പട്ടിണിയാകാതിരിക്കാനാണ് സൗജന്യ ഭക്ഷ്യകിറ്റുകള്‍ നല്‍കാന്‍ പിണറായി സര്‍ക്കാര്‍ തീരുമാനിച്ചത്. ആരും പട്ടിണിയാകാതിരിക്കാനുള്ള ആ നന്മ ജനങ്ങളാകെ ഏറ്റെടുത്തപ്പോള്‍, അതിന്റെ ഉടമസ്ഥാവകാശം പേറാന്‍ പലരും രംഗത്തുണ്ട്. കേന്ദ്രസര്‍ക്കാരാണ് കിറ്റ് നല്‍കിയതെങ്കില്‍, എന്തുകൊണ്ട് രാജ്യത്താകെ അത് നല്‍കുന്നില്ല എന്ന് ആരും ബി. ജെ. പിക്കാരോട് ചോദിക്കല്ലേ..!

ദുരിതാശ്വാസ നിധിയിലേക്ക് സംഭാവന നല്‍കരുതെന്ന് വാശിപിടിച്ചവര്‍ക്കും, നന്മ ചോര്‍ത്തിക്കളയുന്ന ആ വലതുപക്ഷ പ്രഖ്യാപനം ഏറ്റെടുത്തവര്‍ക്കും ഉള്‍പ്പടെ എല്ലാവര്‍ക്കുമാണ് പിണറായി സര്‍ക്കാര്‍ ഭക്ഷ്യകിറ്റ്. സൗജന്യമായി കുറച്ചൊക്കെ നാടുമായി ബന്ധം വേണമെന്നേ പറയാനുള്ളൂ. ചുരുങ്ങിയപക്ഷം സാധാരണക്കാരായ കിറ്റ് വാങ്ങിക്കുന്ന ബി. ജെ. പിക്കാരോടെങ്കിലും ചോദിക്കാമായിരുന്നു എന്ന് എം..വി ജയരാജന്‍ പറയുന്നു.