ഇഡിക്ക് മുമ്പില്‍ ചോദ്യം ചെയ്യാന്‍ പോകുന്നതിന് മുമ്പ് ബിനീഷ് കോടിയേരി പറഞ്ഞത് തനിക്കെതിരെ ഒരു തെളിവും ഇല്ലെന്നും ചോദ്യം ചെയ്താല്‍ ഒന്നും കിട്ടില്ലെന്നുമാണ്. അതായത് ചായ കുടിക്കാന്‍ പോയ പോലെ ദാ തിരിച്ചു വരുമെന്നാണ് എല്ലാവരും കരുതിയത്. എന്നാല്‍ മാസം ആറായിട്ടും ബിനീഷ് കോടിയേരിക്ക് സ്വാഭാവിക ജാമ്യം പോലും കിട്ടുന്നില്ല. പലപല കാരണങ്ങള്‍ പറഞ്ഞെങ്കിലും ബിനീഷ് കോടിയേരി ഇപ്പോഴും പരപപന അഗ്രഹാര ജയിലിലാണ്.

മത്സ്യ, പച്ചക്കറി മൊത്തവ്യാപാരം നടത്തിയതിനെ തുടര്‍ന്നാണു തന്റെ ബാങ്ക് അക്കൗണ്ടില്‍ വന്‍ നിക്ഷേപമുണ്ടായതെന്നും അനധികൃത ഇടപാടുകളില്ലെന്നും ബിനീഷ് കോടിയേരി ഹൈക്കോടതിയെ അറിയിച്ചു.

കള്ളപ്പണം വെളുപ്പിക്കല്‍ കേസില്‍ ജാമ്യാപേക്ഷ പരിഗണിക്കുമ്പോഴാണു വിശദീകരണം. 2020 ഒക്ടോബര്‍ 29ന് അറസ്റ്റിലായ ബിനീഷ് 7 മാസത്തോളമായി ജയിലിലാണെന്ന് അഭിഭാഷകന്‍ ചൂണ്ടിക്കാട്ടിയപ്പോള്‍, അതു ജാമ്യഹര്‍ജി അടിയന്തരമായി പരിഗണിക്കാന്‍ തക്ക കാരണമല്ലെന്ന് ജസ്റ്റിസ് മുഹമ്മദ് നവാസ് പറഞ്ഞു. അര്‍ബുദം ബാധിച്ച് പിതാവ് കോടിയേരി ബാലകൃഷ്ണന്‍ ഗുരുതര നിലയിലാണെന്നും സന്ദര്‍ശിക്കാന്‍ അനുവദിക്കണമെന്നും അഭ്യര്‍ഥിക്കുന്ന ഹര്‍ജി 19നു വീണ്ടും പരിഗണിക്കും.

ഈ കേസിലെയും ലഹരിക്കേസിലെയും ഒന്നാം പ്രതി അനൂപ് മുഹമ്മദുമായി 2012 മുതല്‍ പണമിടപാടു നടത്തിയെന്നാണ് ഇഡി ആരോപിക്കുന്നത്. എന്നാല്‍ 2015 ലാണ് അനൂപിനെ പരിചയപ്പെട്ടതെന്നും ബാങ്ക് വഴിയാണ് അയാളുടെ അക്കൗണ്ടിലേക്ക് പണം കൈമാറിയതെന്നും ബിനീഷ് പറയുന്നു.

ബിനീഷിന്റെ ബാങ്ക് അക്കൗണ്ടുകളിലെ നിക്ഷേപവും ആദായനികുതി റിട്ടേണും തമ്മില്‍ വന്‍പൊരുത്തക്കേടുണ്ടെന്നും 2012'19 വരെയുള്ള 5.17 കോടി രൂപയുടെ വരുമാനത്തില്‍ 3.95 കോടിക്കുള്ള റിട്ടേണ്‍ സമര്‍പ്പിച്ചിട്ടില്ലെന്നും കുറ്റപത്രത്തില്‍ പറയുന്നു. അനൂപിനു പണം കൈമാറിയതു ലഹരി ഇടപാടിനാണോ എന്ന അന്വേഷണവും തുടരുന്നുവെന്ന് ഇഡി അറിയിച്ചു.

ബംഗളൂരു മയക്കുമരുന്ന് ഇടപാടുമായി ബന്ധപ്പെട്ട കള്ളപ്പണക്കേസിലെ ജാമ്യാപേക്ഷയാണ് കര്‍ണ്ണാടക ഹൈക്കോടതി ഇന്നലെ പരിഗണിച്ചത്. കഴിഞ്ഞ ആഴ്ച ഹര്‍ജി പരിഗണിച്ച കോടതി ബിനീഷിന്റെ അച്ഛന്‍ കോടിയേരി ബാലകൃഷ്ണനെ കാണാന്‍ ഇടക്കാല ജാമ്യം അനുവദിക്കുന്നതിനെ കുറിച്ച് ആരാഞ്ഞിരുന്നു. ഇതില്‍ ഇഡിയുടെ വാദമാണ് ഇന്നലെ നടന്നത്.



കാന്‍സര്‍ ബാധിതനായ അച്ഛനെ ശുശ്രൂഷിക്കാന്‍ നാട്ടില്‍ പോകാന്‍ ജാമ്യം അനുവദിക്കണമെന്നാണ് ബിനീഷിന്റെ പ്രധാന വാദം. കോടതി ആദ്യകേസായാണ് ഇത് പരിഗണിക്കുന്നത്. കേസുമായി ബന്ധപ്പെട്ട് ബിനീഷ് കോടിയേരി അറസ്റ്റിലായിട്ട് ഇന്ന് 205 ദിവസമാണ് പിന്നിട്ടത്.

അവധിക്ക് ശേഷം ജാമ്യാപേക്ഷ ലിസ്റ്റ് ചെയ്യാം എന്ന് കോടതി അഭിപ്രായപ്പെട്ടെങ്കിലും അടുത്ത ബുധനാഴ്ച തന്നെ അവധിക്കാല ബെഞ്ച് ജാമ്യാപേക്ഷ പരിഗണിക്കണമെന്ന് ബിനീഷിന്റെ അഭിഭാഷകന്‍ ആവശ്യപ്പെടുകയായിരുന്നു. നേരത്തേ രണ്ടു തവണ ബെംഗളൂരു പ്രത്യേക കോടതി (സെഷന്‍സ് കോടതി) ജാമ്യാപേക്ഷ തള്ളിയതിനെത്തുടര്‍ന്ന് പിതാവിന്റെ ആരോഗ്യ പ്രശ്‌നങ്ങള്‍ ചൂണ്ടിക്കാട്ടിയാണ് ബിനീഷ് ജാമ്യത്തിനായി ഹൈക്കോടതിയെ സമീപിച്ചത്.

മയക്കുമരുന്ന് കേസില്‍ കഴിഞ്ഞ വര്‍ഷം ഒക്ടോബര്‍ 29 നാണ് ബിനീഷ് അറസ്റ്റിലായത്. അന്ന് മുതല്‍ ബംഗളുരു പരപ്പന അഗ്രഹാര ജയിലില്‍ റിമാന്‍ഡില്‍ കഴിയുകയാണ് ബിനീഷ് കോടിയേരി.