കേന്ദ്ര അന്വേഷണ ഏജന്‍സികള്‍ക്കെതിരെ ജുഡീഷ്യല്‍ അന്വേഷണം നടത്താന്‍ ഉത്തരവ് ഇറക്കിയതിന് പിന്നാലെ സ്വപ്ന സുരേഷിനെ കേരള പോലീസ് കസ്റ്റഡിയില്‍ വാങ്ങുമോ?
ഇതിനെയാണ് സാര്‍ ബുദ്ധി,ബുദ്ധി എന്ന് പറയുന്നത്. ഇല്ലെങ്കില്‍ കേന്ദ്ര അന്വേഷണ ഏജന്‍സികള്‍ക്കെതിരെ ജുഡീഷ്യല്‍ അന്വേഷണം നടത്താന്‍ ഉത്തരവ് ഇറക്കിയതിന് പിന്നാലെ സ്വപ്ന സുരേഷിനെ കേരള പോലീസ് കസ്റ്റഡിയില്‍ വാങ്ങുമോ?
സ്വര്‍ണ്ണക്കടത്ത് കേസ് പ്രതി സ്വപ്ന സുരേഷിനെ ഈ മാസം 22 വരെയാണ് ക്രൈംബ്രാഞ്ച് കസ്റ്റഡിയില്‍ വിട്ടിരിക്കുന്നത്. എയര്‍ ഇന്ത്യാ ജീവനക്കാരനായ സിബു എല്‍എസ്സിനെതിരെ വ്യാജപരാതികള്‍ ചമച്ച കേസിലാണ് നടപടി.
കസ്റ്റംസ് കസ്റ്റഡിയില്‍ കഴിയുകയായിരുന്നു സ്വപ്ന ഇതുവരെ. കഴിഞ്ഞ ദിവസമാണ് ക്രൈം ബ്രാഞ്ച് ജയിലിലെത്തി സ്വപ്നയെ അറസ്റ്റ് ചെയ്തത്.
ഇന്നലെ ഓണ്‍ലൈന്‍ വഴിയാണ് സ്വപ്നയെ കോടതിയില്‍ ഹാജരാക്കിയത്. തിരുവനന്തപുരം ജെഎഫ്‌സിഎം കോടതിയാണ് ക്രൈം ബ്രാഞ്ച് അപേക്ഷ പ്രകാരം കസ്റ്റഡിയില്‍ വിട്ടത്. എയര്‍ ഇന്ത്യാ സാറ്റ്‌സില്‍ എച്ച്ആര്‍ മാനേജര്‍ ആയിരിക്കെയാണ് സ്വപ്ന സിബുവിനെതിരെ വ്യാജപരാതികള്‍ ചമച്ചത്.
കേസില്‍ എയര്‍ ഇന്ത്യാ സാറ്റ്‌സ് മുന്‍ വൈസ് പ്രസിഡന്റ് ബിനോയ് ജേക്കബും പ്രതിയാണ്. കേസുമായി ബന്ധപ്പെട്ട് ബിനോയ് ജേക്കബും സ്വപ്ന സുരേഷും ക്രൈംബ്രാഞ്ച് അന്വേഷണം നേരിടുന്നുണ്ട്. എയര്‍ഇന്ത്യാ ഉദ്യോഗസ്ഥരെയും കേസില്‍ ക്രൈം ബ്രാഞ്ച് ചോദ്യം ചെയ്തിരുന്നു.
സ്വപ്നയുടെ അറസ്റ്റിന് പിന്നാലെ ഇതും വാര്‍ത്തകളില്‍ നിറഞ്ഞിരുന്നു. ഇതുമായി ബന്ധപ്പെട്ട് മാധ്യമ പ്രവര്‍ത്തകരോട് സംസാരിച്ചതിന് എല്‍എസ് സിബുവിനെതിരെ എയര്‍ ഇന്ത്യ നടപടിയെടുത്തിരുന്നു. എയര്‍ ഇന്ത്യാ സാറ്റ്‌സ് ജീവനക്കാരിയായിരിക്കെയാണ് സ്വപ്ന സുരേഷ് എല്‍എസ് സിബുവിനെതിരെ ഗൂഢാലോചന നടത്തി വ്യാജ പരാതി നല്‍കിയത്.
സ്വപ്നക്ക് വേണ്ടി അവരുടെ വീട്ടുകാര്‍ കഴിഞ്ഞ ദിവസം രംഗത്തെത്തിയിരുന്നു. സ്വര്‍ണക്കളളക്കടത്തുകേസില്‍ കൊഫേപോസ തടവുകാരിയായി തിരുവനന്തപുരത്ത് ജയിലില്‍ കഴിയുന്ന സ്വപ്ന സുരേഷിന്റെ ആരോഗ്യം ഉറപ്പാക്കണമെന്നാവശ്യപ്പെട്ട് കേന്ദ്ര സര്‍ക്കാരിന് അമ്മ കത്തയച്ചിരുന്നു. കൊവിഡ് വ്യാപനത്തിന്റെ പശ്ചാത്തലത്തില്‍ ജയിലില്‍ സ്വപ്ന രോഗബാധിതയാകാന്‍ സാധ്യതയുണ്ടെന്ന് കത്തില്‍ പറയുന്നു.
മറ്റ് ആരോഗ്യ പ്രശ്‌നങ്ങള്‍ ഉളളതിനാല്‍ സുരക്ഷ ഉറപ്പാക്കണമെന്നാണ് ആവശ്യം. കത്തിന്റെ അടിസ്ഥാനത്തില്‍ കോഫോ പോസ വിംങ് ജയില്‍ അധികൃതര്‍ക്ക് കത്തയച്ചു. സ്വാഭാവികമായും സ്വപ്ന ജയില്‍ മോചിതയാകാന്‍ സാധ്യതയുണ്ട്. കാരണം കോവിഡ് വ്യാപനത്തിന്റെ പശ്ചാത്തലത്തില്‍ നിരവധി തടവുകാരെ സര്‍ക്കാര്‍ പരോളില്‍ അയച്ചിരുന്നു. അതിനു മുമ്പാണ് ക്രൈം ബ്രാഞ്ച് കസ്റ്റഡിയില്‍ വാങ്ങിയത്.
കേരള പോലീസിനോടാണ് മുഖ്യമന്ത്രിക്കെതിരെ മൊഴി നല്‍കാന്‍ കേന്ദ്ര ഏജന്‍സി തന്നെ നിര്‍ബന്ധിച്ചതായി സ്വപ്ന ആദ്യം പറഞ്ഞത്.ഇത് വലിയ ഒച്ചപ്പാടിന് ഇടയാക്കി.ഇതിനു ശേഷം സരിത്തും ഇതേ ആരോപണവുമായി രംഗത്തെത്തി. ഇതെല്ലാം കേരള പോലീസിനോട് മാത്രം പറഞ്ഞതെന്തിനാണെന്നാണ് കേന്ദ്ര ഏജന്‍സികള്‍ ചോദിക്കുന്നത്. ഏതായാലും രണ്ടാം പിണറായി സര്‍ക്കാര്‍ അധികാരത്തില്‍ എത്തിയതോടെ കേന്ദ്ര ഏജന്‍സികള്‍ ജീവനും കൊണ്ട് രക്ഷപ്പെട്ടു. അതെന്തായാലും കാത്തിരിക്കാന്‍ പിണറായി തയ്യാറല്ല. അതിന് മുമ്പ് തനിക്കെതിരായി കേന്ദ്ര ഏജന്‍സികള്‍ നടത്തിയ എല്ലാ നീക്കങ്ങളും റെക്കോര്‍ഡ് ചെയ്യണം. കാരണം സ്വപ്നയെ സര്‍ക്കാര്‍ വിശ്വസിക്കുന്നില്ല.
എന്നാല്‍ സ്വപ്നയും സ്വര്‍ണക്കടത്ത് കേസിലെ മറ്റ് പ്രതികളും പിണറായിക്ക് അനുകൂലമായ നിലപാടാണ് സ്വീകരിച്ചിട്ടുള്ളതെന്നാണ് റിപ്പോര്‍ട്ടുകള്‍.ഇന്നത്തെ സാഹചര്യത്തില്‍ തങ്ങളെ കേന്ദ്ര ഏജന്‍സികള്‍ക്ക് ഒന്നും ചെയ്യാന്‍ കഴിയില്ലെന്ന് സ്വപ്നയും സഹതടവുകാരും വിശ്വസിക്കുന്നു. കേരള സര്‍ക്കാര്‍ പ്രഖ്യാപിച്ച ജുഡിഷ്യല്‍ അന്വേഷണത്തിന്റെ വാര്‍ത്തകള്‍ കേട്ട് കേന്ദ്ര ഏജന്‍സികള്‍ ഭയന്നോടിയിരിക്കുകയാണെന്ന് അവര്‍ക്കറിയാം.
ക്രൈം ബ്രാഞ്ച് ഭരിക്കുന്നത് പിണറായിയുടെ വിശ്വസ്തരാണ്. അതുകൊണ്ടു തന്നെ പിണറായിക്ക് ഭയമില്ല.വെറും 24 മണിക്കൂര്‍ കൊണ്ട് സ്വപ്നയെ കൊണ്ട് തത്ത പറയിക്കും പോലെ എല്ലാം പറയിക്കാന്‍ കഴിയുമെന്ന് തന്നെയാണ് ക്രൈം ബ്രാഞ്ചിന്റെ പ്രതീക്ഷ. അങ്ങനെ കേന്ദ്ര ഏജന്‍സികളെ പിണറായി കെട്ടി പൂട്ടും.
https://www.facebook.com/Malayalivartha
