കണ്ണൂര്‍ മേലെചൊവ്വയില്‍ ഗ്യാസ് ടാങ്കര്‍ ലോറി അപകടത്തില്‍ പെട്ടു. വാതക ചോര്‍ച്ചയില്ല. ഇന്ന് പുലര്‍ച്ചെ മൂന്നുമണിയോടെയാണ് സംഭവം. പാചകവാതകവുമായി എറണാകുളത്തേക്ക് പോകുന്ന ടാങ്കര്‍ ലോറിയാണ് അപകടത്തില്‍പെട്ടത്.

റോഡില്‍ നിന്ന് തെന്നിനീങ്ങിയ ലോറി തൊട്ടടുത്ത പറമ്ബിലേക്ക് മറിഞ്ഞു. ഫയര്‍ഫോഴ്സ് സംഘവും പൊലീസും സ്ഥലത്തെത്തി. മേലേചൊവ്വ വഴിയുള്ള ഗതാഗതം ഭാഗികമായി തടസപ്പെട്ടു.

കഴിഞ്ഞ ദിവസവും ഇവിടെ ടാങ്കര്‍ ലോറി മറിഞ്ഞു വാതക ചോര്‍ച്ച ഉണ്ടായിരുന്നു. ഫയര്‍ ഫോഴ്‌സ് മണിക്കൂറുകള്‍ പരിശ്രമിച്ചാണ് അന്ന് ടാങ്കര്‍ മാറ്റിയത്. ഇവിടെ നിന്നും ഏതാനും കിലോമീറ്റര്‍ അകലെ ചാലയിലാണ് 2012ല്‍ ടാങ്കര്‍ ദുരന്തം നടന്നത്. ആഗസ്റ്റ് 27ന് നടന്ന ആ ദുരന്തത്തില്‍ 20 ജീവനുകളാണ് പൊലിഞ്ഞത്.

രാത്രി 11 മണിയോടെ മംഗലാപുരത്ത് നിന്നും കോഴിക്കോട്ടേക്ക് പാചക വാതകം കയറ്റി വന്ന ബുള്ളറ്റ് ടാങ്കര്‍ ലോറി, കണ്ണൂര്‍ കൂത്തുപറമ്ബ് റോഡിലുള്ള ചാല സാധു ജങ്ഷനില്‍ ഡിവൈഡറില്‍ തട്ടി മറിഞ്ഞാണ് പൊട്ടിത്തെറിച്ചത്. ഉത്രാട നാളിലായിരുന്നു കേരളത്തെ നടുക്കിയ ദുരന്തം.