ഭരണ നിര്വ്വഹണ സംവിധാനങ്ങളില് നിന്ന് ലക്ഷദ്വീപ് നിവാസികളെ തുടച്ചു നീക്കിയുള്ള ഏകാധിപത്യ നീക്കം; പ്രതികരണവുമായി സിപിഎം സംസ്ഥാന സെക്രട്ടറി വിജയരാഘവന്
ഭരണ നിര്വ്വഹണ സംവിധാനങ്ങളില് നിന്ന് ദ്വീപ് നിവാസികളെ തുടച്ചു നീക്കിക്കൊണ്ടുള്ള ഏകാധിപത്യ നീക്കമാണ് ലക്ഷദ്വീപ് അഡ്മിനിസ്ട്രേറ്റര് നടത്തുന്നതെന്ന് സിപിഎം സംസ്ഥാന സെക്രട്ടറി എ വിജയരാഘവന്. സംഘപരിവാറിന്റെ ഹിന്ദു രാഷ്ട്രീയത്തിന്റെ പരീക്ഷണശാലയായി ലക്ഷദ്വീപിനെ മാറ്റാനുള്ള ഹീന ശ്രമമാണ് നടക്കുന്നതെന്നും അദ്ദേഹം ആരോപിച്ചു.
ലക്ഷദ്വീപിന്റെ പ്രത്യേക അവകാശങ്ങള് ഇല്ലാതാക്കുന്ന കേന്ദ്രസര്ക്കാര് നീക്കങ്ങള്ക്കെതിരെ ശക്തിയായ പ്രതിഷേധം ഉയര്ന്നുവരണമെന്നും അദ്ദേഹം ആവശ്യപ്പെട്ടു.
തീരദേശ സംരക്ഷണ നിയമത്തിന്റെ മറവില് മത്സ്യജീവനക്കാരുടെ ഷെഡ്ഡുകളെല്ലാം പൊളിച്ചു മാറ്റുകയും, ടൂറിസം വകുപ്പില് നിന്ന് കാരണമില്ലാതെ 190 ജീവനക്കാരെ ലക്ഷദ്വീപ് അഡ്മിനിസ്ട്രേറ്റര് പിരിച്ചുവിടുകയും ചെയ്തിരിക്കുകയാണ്. ഗവണ്മെന്റ് സര്വ്വീസിലെ തദ്ദേശീയരായ മുഴുവന് താത്ക്കാലിക ജീവനക്കാരെയും അഡ്മിനിസ്ട്രേറ്റര് ഒഴിവാക്കി. അംഗനവാടികള് അടച്ചുപൂട്ടി, 90% മുസ്ലീംങ്ങളുള്ള മദ്യഉപയോഗം തീരെയില്ലാത്ത ലക്ഷദ്വീപില് ടൂറിസത്തിന്റെ പേരുപറഞ്ഞ് ആദ്യമായി മദ്യശാലകള് തുറക്കുകയും,
സ്കൂള് വിദ്യാര്ത്ഥികളുടെ ഉച്ചഭക്ഷണ മെനുവില് നിന്ന് മാംസാഹാരം ഒഴിവാക്കുകയും, പഞ്ചായത്ത് തെരഞ്ഞെടുപ്പില് മത്സരിക്കുന്നവര്ക്ക് 2 കുട്ടികളില് കൂടുതല് ഉണ്ടാകാന് പാടില്ലെന്ന നിയമം കൊണ്ടുവരികയും ചെയ്തു. ലക്ഷദ്വീപിനെ അടിമുടി തകര്ക്കുന്ന നടപടികളാണ് കേന്ദ്ര സര്ക്കാര് നടപ്പാക്കുന്നതെന്നും അദ്ദേഹം വ്യക്തമാക്കി.
ജില്ലാ പഞ്ചായത്തിന് കീഴിലുണ്ടായിരുന്ന വിദ്യാഭ്യാസം, ആരോഗ്യം, കൃഷി, മത്സ്യബന്ധനം, മൃഗസംരക്ഷണം തുടങ്ങിയ വകുപ്പുകളില് ജനാധിപത്യവിരുദ്ധമായ ഇടപെടല് നടത്തി അഡ്മിനിസ്ട്രേറ്റര് അധികാരം കവര്ന്നെടുക്കുകയാണ്. ജനങ്ങളുടെ അഭിപ്രായ സ്വാതന്ത്ര്യം വരെ അടിച്ചമര്ത്തുകയാണ്.
കുറ്റവാളികളില്ലാത്ത ജയിലുകളും പോലീസ്സ്റ്റേഷനുമെല്ലാം ഒഴിഞ്ഞു കിടക്കുന്ന മാതൃകാപ്രദേശമായ ലക്ഷദ്വീപില് അനാവശ്യമായി ഗുണ്ടാ ആക്ട് നടപ്പിലാക്കി. ലക്ഷദ്വീപുകാരുടെ ഭക്ഷണ സ്വാതന്ത്ര്യത്തില് വരെ ഭരണകൂട കൈകടത്തല് ഉണ്ടാകുന്നുവെന്നും വിജയരാഘവന് പറഞ്ഞു.
എല്.ഡി.എ.ആര് വഴി ലക്ഷദ്വീപിലെ ഭൂസ്വത്തുക്കളുടെ മേലുള്ള ദ്വീപുവാസികളുടെ അവകാശം ഇല്ലാതാക്കാനുമുള്ള നടപടിയും ആരംഭിച്ചു. മറൈന് വൈല്ഡ് ലൈഫ് വാച്ചേഴ്സിനെ കാരണമില്ലാതെ ജോലിയില് നിന്ന് പിരിച്ചു വിട്ടു. ഈ വിധത്തിലുള്ള നടപടികള് സ്വീകരിക്കുന്ന ലക്ഷദ്വീപ് അഡ്മിനിസ്ട്രേറ്ററുടെ നടപടികള്ക്കെതിരെ ശക്തമായ പ്രതിഷേധം ഉയര്ന്നുവരണമെന്നും അദ്ദേഹം ആഹ്വാനം ചെയ്തു.
https://www.facebook.com/Malayalivartha
